1 Chronicles 19 (TOMA)

1 Naa ʋoluma, Amɔn masagi Naɠase zaani, ná-doun zunui zei potogi zu ga masagi. 2 Davide ɠɛni ma: «Nà wooɠɛɠilada ɠɛɛzu Ɠanun ʋɛ, eɠɛʋelei kɛɛɠɛ Naɠase wooɠɛɠiladai ɠɛni la bɛ̀.» Davide keelai tanigaa leʋeni ga ti ɓena fe bɛ kɛɛɠɛ zaa vai zu. Siɛgi zu Davide ná-botiɠɛ nuiti ti zeelini la Amɔn yooi zu Ɠanun ʋɔ bɛ ga ti ɓena fe bɛ, 3 Amɔn ɠundiɠiiti ti ɠɛni Ɠanun ma: «Ɗa kaazu ga è-ɠɛɛ ná-lɛbiya ɠa é kɛɛzu Davide gaanɛɛnɛ nua leʋesu la è ma ɓaa? Zooi ɠwɛɛ fai ta pɛtɛ fai laade ɓaa, nii a kɛ ti ʋa koloɠolo yeeta?» 4 Ɠanun zɛba é Davide ná-keelaiti so, ti ti-ɓɛlɛiti bo, ti ti ɠɔba zeɠeiti teʋe ga ti-ʋunɔgi letemaʋɛ, naa ʋoluma ti ɓe ti ʋa, 5 ti ɗa li. Davide mɛnini nii kɛai. É keela leʋeni ti luɠɔ, mazɔlɔɔ naati ti wola unfeni. É ɠɛ ti ma: «À yɛ Zeliko eyɛsu wo-ɓɛlɛiti ti lɛ ʋolu, wa ʋa niina.» 6 Amɔn nuiti ti kaani ga ti ɓɔɠɔ wɔinzeɠea Davide ma. Ɠanun ta Amɔn nuiti ti walii kilo waaʋuusaʋagɔ (30.000) teʋeni Siili nuiti ma, niiti ti Mezopotami ʋele, ta Maaka ʋele, naa ʋɛɛ Soɓa ʋele ʋa, nii a kɛ ti soo ɓizɛ zalaʋusuiti seɠe ʋɛ. 7 Ʋele ɠana ti kɔɔɠɔ wotolo waaʋuusaʋagɔ maazu felegɔ (32.000) zɔlɔɔni da, naa ʋɛɛ Maaka masagi ʋa ta ná-kɔɔʋɛbɛi. Naati ti ʋaa, ti ta-ɠɔɔlaaɠai ʋu Medeɓa ɠobaʋɛ. Amɔn nuiti ma, ti ɠula ta-laa wolaiti su, ti ɠaalɛ ba, ti ʋa kɔɔɠɔ vai ma. 8 Davide mɛnigai ma, é Zoaɓe leʋeni ti laalɔɠɔma, ta Izilayɛle ɠɔɔʋɛbɛiti pɛ. 9 Amɔn nuiti ti ɠulani, ti lo kɔɔɠɔ vai ma, ta-laa wolai laaʋɛ. Masagi niiti ti ʋaani ɓɔsu ti ʋa, naati ti ɠɛni loni yɛ kɔɔ lɔɓɔi zu. 10 Zoaɓe kaai ma ga kɔɔɠɔzuʋɛ ɠa fele ʋɔɔma, ʋelelaʋɛ ta ʋoluzu ʋelei, é yeeloni kɔɔɠɔ nu ɠɛzɛɠɛzɛgiti ba, é ti ʋilɛ Siili nuiti daawu kɔɔɠɔ vai ma. 11 É kɔɔʋɛbɛi mɔtai ma lotuɠɔlai ɠalivaani kɛɛɠɛloin Aɓisayi ma, naati ti lo Amɔn nuiti daawu kɔɔɠɔ vai ma. 12 Zoaɓe ɠɛni kɛɛɠɛloin Aɓisayi ma: «Ni Siili nuiti zeevi ka mɔinna mà, ɗa ʋa è ɓɔ bà. Ni Amɔn nuiti zeevi ka mɔinna è ma, nà ʋa, gè ɓɔ è ʋa. 13 Zɛbɛzeɠe, ade kɔɔi ɠɔ, de da-nuɓusɛiti maalobo, ta da-ƓALAGI ná-taaiti. Ɠɔoɠɔ GALAGI naa ɠɛ, nii pagai gaazu!» 14 Zoaɓe ta ná-kɔɔʋɛbɛi ti lopele ɓɛtɛni kɔɔɠɔ vai ma, Siili nuiti daalɔɠɔma, naati ti ʋelani ba. 15 Amɔn nuiti ti kaai ma ga Siili nuiti ti ʋela, tiya ɓalaa ti ʋelani Zoaɓe kɛɛɠɛloin Aɓisayi ʋa, ti li ta-laazu. Zoaɓe ɠaleni ma Zeluzalɛme. 16 Siili nuiti ti kaai ma ga Izilayɛle nuiti ti vɔniga ti ma, ti keela leʋeni, ga ti Siili nui zɔiti gaalɛ ba, niiti ti ziɛ wolai Efelate ʋoluʋelei. Ɠadadezɛɛl ná-kɔɔɠuluɓai Sofake loni ti luɠɔ. 17 Davide faa ɠwɛɛgai ma su, é Izilayɛle ɠɔɔɠɔ nuiti pɛ gaalɛɛni ba, ti Zuludɛn ɓudɛ, ti li Siili nuiti daalɔɠɔma. Ti ɠɛʋele ɓɛtɛni, ti vala naati ba, naati mɔunpa ka ti kɔɔi lɔɔzeini. 18 Kɛlɛ ti ʋelani Izilayɛle nuiti ba. Davide kɔɔɠɔ wotolo waadɔfela (7.000) zu zalaʋusuiti paani, ta siɛ kɔɠɔa zalaʋusu waaʋuunaanigɔ (40.000). É ta-ɠɔɔɠuluɓai Sofake ʋaani ɓalaa. 19 Tɛi masagi niiti kpein ti ɓɔni Ɠadadezɛɛl ʋa, ti kaani ga Izilayɛle ziaa ti wu, ti ziilɛigi ɠaiziɛni Davide ya, ti ɠolo bɛ. Naa ʋoluma Siili nuiti ti la mɔ ɠɛni kɛɛzu, ti ʋa li ɓɔsu Amɔn nuiti ba.

1 Chronicles 19 (TOMA)

In Other Versions