1 Chronicles 23 (TOMA)
1 Siɛgi zu Davide wola wɔlɔzaɠani da, sii ma voloi wola mɔinɗai, é ná-doun zunui Salomɔn zeɠeni, é sei Izilayɛle unda ga masagi. 2 É Izilayɛle lotuɠɔiti pɛ gaalɛɛni ba ta zalaɠa ɠula nuiti, naa ʋɛɛ Levi nuiti ba. 3 Naama ziɛgi zu é Levi nuiti gaaluni, niiti ta-ɠonagi zeeliai na puusaʋagɔ (30) zu, ti ɠɛni ga nu waaʋuusaʋa maazu lɔsaʋa (38.000). 4 Ti zaama, masagi Davide yeeloni nu waaʋuufele maazu naanigɔ (24.000) ʋa ga ti lo Ɠɔoɠɔ GALAGI zei ʋɛlɛi lo fai ma wotiiti tuɠɔ. É yeelo nu waadɔzita (6.000) ʋa, naati ti ɠɛ ga kundiɠiiti ta tukpɔɠaaleʋe nuiti. 5 É yeelo nu waanaanigɔ (4.000) ʋa, naati ti ɠɛ ga siɠida makɛ nuiti, é nu waanaanigɔi (4.000) zɔiti kɛ ga guye loo nuiti Ɠɔoɠɔ GALAGI maamusɛ vai zu ga gɛingɛin ganigiti niiti é ti ɓɛtɛni naama vai ma. 6 Davide Levi nuiti gaaɠwɛɛni su ga saʋagɔ, ʋelei ta-ʋɛlɛyeɠeiti seiɗai la kpasu Levi ná-doun saʋagɔiti ba: Gɛɛlɛson, Keɠate, ta Melali. 7 Doun zunu felegɔ ɠa Gɛɛlɛson sɔlɔɔni: Layedan ta Simeyi. 8 Layedan doun zunu saʋagɔ zɔlɔɔni: Ma mɔungi ɠɛni ga Yeɠiyɛle, naa ʋolu Zetame ta Zowɛle. 9 Simeyi ɓalaa doun zunu saʋagɔ zɔlɔɔni: Selomite, Ɠaziyɛle ta Ɠalan. Pɛlɛyeɠe lotuɠɔiti kana, niiti ti ɠulaai Layedan vofodai zu. 10 Simeyi zunu loun naanigɔ ɠiligaa zɔlɔɔni: Yaɠate, Zina, Yeyuse ta Ɓelia. 11 Yaɠate ɠa é ɠɛni ga doun mɔungi, felesiɛi ɠɛ ga Ziza. Yeyuse ta Ɓelia ti la ɠɛni doun mɔinmɔin sɔlɔɔni, naa ɠa é kɛɛni ti ti felegɔ ɓɔni su, ti kɛ ga pɛlɛyeɠe ɠila gaalu bo siɛgi zu. 12 Doun naanigɔ ɠa Keɠate sɔlɔɔni: Amalame, Yiseɠaal, Eɓelɔn, ta Uziyɛle. 13 Amalame ná-doun zunuiti kaa: Aalɔn, ta Moize. Zeelogi woni Aalɔn ta mavofodaiti ba ɠɔoɠɔ faa ma ga ti ɗa botii ɠɛ yeenɔpɛ ada ɲadega wolai, nii a kɛ ti ɗa ansansegiti gala Ɠɔoɠɔ GALAGI ʋɛ, ti botii ɠɛ bɛ, ta ti ɗa tuyai loo daaseigi zu ɠɔ. 14 GALA botiɠɛ nui Moize mavofodaiti gaaluni Levi wolodamaiti saama. 15 Moize ná-doun zunuiti ti ɠɛni ga: Gɛɛlɛsome, ta Eliyezɛɛl. 16 Gɛɛlɛsome ná-doun zunui ɠɛni ga kundiɠii Seɓuwɛle. 17 Doun zunu ɠila nɔ ɠa Eliyezɛɛl sɔlɔɔni, kundiɠii nii daaseigi ɠɛni ga Leyaɓia. Kɛlɛ Leyaɓia mavofodaiti ti wola mɔinni. 18 Yiseɠaal ná-doun zunui ɠɛni ga kundiɠii Selomite. 19 Eɓelɔn ná-doun zunuiti kaa: Doun mɔungi ɠɛni ga Yeliya, felesiɛi ɠɛ ga Amalia, saʋasiɛi ɠɛ ga Yaɠaziyɛle, naanisiɛi ɠɛ ga Yekameyame. 20 Uziyɛle ná-doun zunu mɔungi ɠɛni ga Misé, felesiɛi ɠɛ ga Yisiya. 21 Melali ná-doun zunuiti kaa: Maali ta Musi. Maali ná-doun zunuiti ti ɠɛni ga Eleazaal ta Kise. 22 Eleazaal zaani, é la doun zunu zɔlɔɔni, anzanu lointi nɔ ɠa é ti zɔlɔɔni. Naati ti zeini Kise ná-doun zunuiti bɛ, ta niiti ti ɠɛni ga bolodamaiti. 23 Zunu loun saʋagɔ ɠa Musi sɔlɔɔni: Maali, Edɛɛl ta Yelemɔte. 24 Levi mavofodaiti kana, ʋelei ti zeiɗai la su kpɛkpɛ ga pɛlɛyeɠe ʋelei, pɛlɛyeɠe lotuɠɔiti ɓalaa kana ti laaseigiti sɛʋɛai ga gilagila daasei sɛʋɛ ziɛgi zu, ti ɠɛni lɔɔzu Ɠɔoɠɔ GALAGI zei ʋɛlɛi wu wotii zu, é zo kona ʋuufelegɔ (20) ma, é lɛ zeemaazu. 25 Tɔɔzei Davide ɠɛni ma: «Izilayɛle ná-GALAGI, Ɠɔoɠɔ GALAGI dooɠogi vea ná-nuɓusɛiti bɛ, é zeizuʋɛ ɠɛa ga Zeluzalɛme eyɛsu ɠɔ. 26 Levi nuiti ti la mɔ seɠe ʋɛlɛ ɲadegai zeɠea, ti ʋa ɗa leʋe da, ta bu zɔɔlaiti pɛ.» 27 Davide ná-deve ɠaaɓelagi ɠa é kɛɛni ti Levi nuiti daaseigiti sɛʋɛni gaalu sɛʋɛi zu, é zo kona ʋuufelegɔ (20) ma, é lɛ zeemaazu. 28 Ta-wotii ɠɛni ga ti ɗa ɓɔ Aalɔn mavofodaiti ba Ɠɔoɠɔ GALAGI zei ʋɛlɛi wu, tiya ɠa ti ɠɛni wɛlɛzu ma ɠoizuʋɛ ma, ta pɛɛ ba ʋɛlɛ goiti, ti ɗa aniiti maaɲade niiti ti veai Ɠɔoɠɔ GALAGI ʋɛ, ta GALA sei ʋɛlɛi wu wotii pɛ. 29 Ti ɗa ɓuluiti kpɛtɛ, niiti ti veai Ɠɔoɠɔ GALAGI ʋɛ, ti ɓulu vukɔi ɓɛtɛ vebɛ zalaɠaiti kula vai zu, ti ɓulu lɛɛvɛiti kpɛtɛ, nii lɛʋɛ la su, ti vebɛ zalaɠaiti kpɛtɛ niiti ti mɔsu, ta niiti ti ɠaayɔgai ga gulɔi, ta ani ɠɔɠɔ ganii ma zii pɛ. 30 Naa ʋoluma, tanigaa ti maanɛɛni ga folo-o-folo ti ɗa li sobu ɠilagila ta kpɔkɔ ɠilagila, ti ɗa Ɠɔoɠɔ GALAGI maamusɛ, ti dɛbi. 31 Ti ɗa gala zalaɠaiti kula Ɠɔoɠɔ GALAGI ʋɛ, dooɠo foloiti, alu toga niinɛi ma vɛtiiti ma, ta gaalɛbaiti su, é zoloo naa liegɔi ma nii ma levei zɛʋɛni, é ve ti ya. 32 Ti maanɛɛni ga ti ɗa wɛlɛ GALA daaɠomi seɠe ʋɛlɛi ma ta seizu ɲadegai, ti ɓɔ ti-ɠɛɛlointi Aalɔn mavofodaiti ba Ɠɔoɠɔ GALAGI zei ʋɛlɛi wu wotii pɛ su.
In Other Versions
1 Chronicles 23 in the ANTPNG2D
1 Chronicles 23 in the BNTABOOT
1 Chronicles 23 in the BOATCB2
1 Chronicles 23 in the BOGWICC
1 Chronicles 23 in the BOHNTLTAL
1 Chronicles 23 in the BOILNTAP
1 Chronicles 23 in the BOKHWOG
1 Chronicles 23 in the KBT1ETNIK
1 Chronicles 23 in the TBIAOTANT