1 Corinthians 6 (TOMA)

1 Ni kpɔɛ ɠa wo ta yɔɠɔzu ta kɛɛɠɛloin, toɠa zoo ɠale, é lii la tukpɔɠaaleʋe nuiti pɔ bɛ, ti la luazu GALA ba, é la lia la GALA ná-nuiti pɔ bɛ? 2 Wo la suɠwɛɛ ɓaa, ga GALA ná-nuiti ka ti ʋaazu eteai lukpɔɠaaleʋezu? Ni tama wa ɠa wo maanɛai ga wo eteai lukpɔɠaaleʋe, wo la zooga wo ʋa faa goiti ma lukpɔi ɠaaleʋe ɓaa? 3 Wo la suɠwɛɛ ɓaa, ga ada geezuɠeelaiti tukpɔɠaaleʋezu? Faa ɓɛgele ɠa mu é eteai zu, nii de la zooga ma lukpɔi ɠaaleʋezu? 4 Tama, siɛgi zu tukpɔɠaaleʋe vai ta wo zaama la, ga niima eteai zu vai ta, zɔiti ti la levezu ga ani nɔpɛ Egilisii zu, naati ka wo ti zeɠezu ga tukpɔɠaaleʋe nuiti! 5 Nà nii wosu wo unfe fai ma. Ɠima nu ɠila kpalaa ge la wo zaama mu ɓaa, nii a zoo é ɠɛɛɠɛlointi ta-vaawogi wo! 6 Kɛlɛ ɠɛɛɠɛloin ɗa kɛɛɠɛloin lukpɔ, naa ɗa ɠɛ kidaaleʋelala lukpɔɠaaleʋe nuiti gaazu! 7 Toobu mu ka niina é wo zaama, ga wo ɓɔɠɔ lukpɔ vai. Leeni vaa zu wo la yiilɔɔzu telebotala vai tanigaani bu? Leeni vaa zu wo la laazu ga ti ʋa la loo wo ma? 8 Kɛlɛ tɔun, wa ɠa wo telebotala vai ɠɛɛzu, wo ɗa toomai ɠɛ, wo ɗa naa ɠɛ ɠana ga wo-ɠɛɛlointi! 9 Wo la suɠwɛɛ ɓaa, ga telebotala nuiti ti la GALA ná-masadai zɔlɔɔga ga tɔnɔ? À mina ɓɔɠɔ yaava, koloɠolo nuiti ti la GALA ná-masadai zɔlɔɔga ga tɔnɔ, ta kɔɔɠɔ gani kɔɔ nuiti, naa ʋɛɛ wɛɛnziɛ nuiti ba, ta zunuiti ti laazu ga ɓɔɠɔ, 10 naa ʋɛɛ unma nuiti, ta koozu yii nuiti ba, naa ʋɛɛ nuiti ba ti ɓɔɠɔ veai dɔɔ ya, ta tɔɠɔ ɠoloɠolo nuiti, é ʋɛɛ ladalala nuiti ba. Ti pɛ ti la GALA ná-masadai zɔlɔɔga ga tɔnɔ. 11 Zekana wo tanigaani wo ɠɛni la. Kɛlɛ wo gbani, wo makɛ yɛ GALA bɛ, wo ɠɛ ga telebo nuiti GALA gaazu ga da-ƓALAGI ná-Zɛnvui maaʋele, Maliɠii Yesu Kilista laaseigi zu. 12 «Zobo feeʋɛ bɛ̀ ga gè fai ma zii pɛ kɛ,» kɛlɛ kulanuma la fai pɛ ba. «Zobo feeʋɛ bɛ̀ ga gè fai ma zii pɛ kɛ,» kɛlɛ gè la ɓɔɠɔ vea faa nɔpɛ zea, é ʋa zei ùnda. 13 «Daamianigi ɠa ná nu ɠogi vaa ma, nu ɠogi ɠa ná daamianigi vaa ma.» GALA ka ti zeizu felegɔ pɛ koloɠolo. Nui ɓusɛi la ga koloɠologi nɔnɔ. Toɠa ga Maliɠii nɔnɔ, Maliɠii ɠa ga kpusɛi nɔnɔ. 14 GALA nii é Maliɠii wuzeɠeni, é kula saai ya, toɠa de wuzeɠe ɓalaa, é de ɠula saai ya ga ná-zɛbɛi maaʋele. 15 Wo la kwɛɛ ɓaa, ga wo-ɓusɛiti ta ga Kilista ɓusɛi ʋaalobazuʋɛti? Gè Kilista ɓusɛi ʋaalobazuʋɛ ta zeɠena, gè kɛ ga koloɠolo anzanui ɓusɛi ʋaalobazuʋɛ ta? Naa li poun! 16 Wo la kwɛɛ ɓaa, ga zɔi é ɠilizu koloɠolo anzanui ʋa, ta naa ta ga kpusɛ ɠila? Mazɔlɔɔ sɛʋɛʋɛ GALA Sɛʋɛi zu ga:«Ti felegɔ ta ɠɛ ga kpusɛ ɠila.» 17 Kɛlɛ nui é ɠilizu Maliɠii ʋa, ta naa ta ga zɛnvu ɠila. 18 À ɓizɛ koloɠologi ʋa! Zɔɔma ɠotoiti nui ti ɠɛɛzu, naati ta kpusɛi ʋoluʋelei, kɛlɛ zɔi é ɓɔɠɔ veezu koloɠologi ya, toɠa kotoi ɠɛɛzu ɓɔɠɔ ɓusɛi laalɔɠɔma. 19 Wo la kwɛɛ ɓaa, ga wo-ɓusɛi ɠa ga Zɛnvu Ɲadegai zei ʋɛlɛi, nii é wo-yiimaʋɛ, wo sɔlɔɔgai GALA zea? Wo la ga ɓɔɠɔ nɔnɔ. 20 Mazɔlɔɔ wo unmɔɔgɛ ga sɔngɔ ɓaa. Deɠɛmu à GALA dɛbi ga wo-ɓusɛi.

1 Corinthians 6 (TOMA)

In Other Versions