1 Samuel 3 (TOMA)

1 Zunu loungoi Samiyɛle ɠɛni Ɠɔoɠɔ GALAGI ná-botii ɠɛɛzu, Eli ɠobaʋɛ. Naama ziɛgi zu, Ɠɔoɠɔ GALAGI la ɠɛni ɓɔɛni nuiti pɔ, valafala, ti la mɔ ɠɛni ná-kulakɛlɛma vaiti sɔlɔɔsu valafala. 2 É ɠɛni ga kpidii ta, zalaɠa ɠula nui Eli ɠɛni laani daazuʋɛ, naama ziɛgi zu Eli ɠaazuʋɛti maaɓidini niina. É la mɔ ɠɛni wozaɠaazu fɔɔn. 3 Samiyɛle ɓalaa ɠɛni Ɠɔoɠɔ GALAGI zei ʋɛlɛi wu, é ɠɛni laani minazeɠe kesui ɠobaʋɛ, naazu GALA ná-fitinai ɗa zo dɛ. 4 Naama ziɛgi zu, Ɠɔoɠɔ GALAGI Samiyɛle lolini, Samiyɛle ɠɛ ma: «Nà ɠaa!» 5 Samiyɛle ɓizɛni, é li Eli ʋɔ bɛ, é ɠɛ ma: «Nà ɠaa, mazɔlɔɔ è tòligɛ.»Eli gooɠaaʋoteni, é ɠɛ ma: «Gè la toli boni, ɠale ma, è li, è la.» Samiyɛle liini, é la ʋolu. 6 Ɠɔoɠɔ GALAGI Samiyɛle lolini ʋolu. Samiyɛle wuzeɠeni, é li Eli ʋɔ bɛ, é ɠɛ ma: «Nà ɠaa, mazɔlɔɔ è tòligɛ.»Eli gooɠaaʋoteni, é ɠɛ ma: «Dòun zunu! Gè la toli boni, li, è la.» 7 Samiyɛle ma ge la ɠɛni dɛ Ɠɔoɠɔ GALAGI ɠwɛɛ, tɔɔzei kaipa naa la ɠɛni dɛ ɓɔɛni tɔ ɓɔɠɔi ʋɔ. 8 Ɠɔoɠɔ GALAGI Samiyɛle lolini ʋolu, ná zeizu zaʋasiɛi. Samiyɛle ɠaleni ma Eli ʋɔ bɛ, é ɠɛ ma: «Nà ɠaa, mazɔlɔɔ è tòligɛ.»Eli gaaɠaani niina ga Ɠɔoɠɔ GALAGI ɠa é doungoi lolisu. 9 Eli ɠɛni Samiyɛle ma naazu: «Liina, è la, ni ɗa toli kili mɛnina, ɗa ɠɛ ma: ‹Ɓɔɛna, Ɠɔoɠɔ GALAGI, ɗa-wotiɠɛ nui woilogɛ.› » Samiyɛle liini, é la daazuʋɛ. 10 Ɠɔoɠɔ GALAGI ʋaani, é lo kobaʋɛ, é toli ga ma mɔungiti kɛʋele, é ɠɛ ma: «Samiyɛle! Samiyɛle!»Samiyɛle gooɠaaʋoteni, é ɠɛ ma: «Ɓɔɛna, mazɔlɔɔ nɛ̀i gè ga ɗa-wotiɠɛ nui gòilogɛ.» 11 Ɠɔoɠɔ GALAGI ɠɛni Samiyɛle ma: «Nà ʋaazu faa laazu Izilayɛle nuɓusɛiti ma, nu-o-nu a ma wooi mɛnina, daa ɠa vɔ. 12 Naama voloi, maanɔɠɔi nii kpein gè deveai Eli ta ná-pɛlɛyeɠei ʋɛ, nà ti pɛ daazeeli, gè la gila kpalaa zɛga ʋoluzu. 13 Gè dɛɛʋɛ la ga, nà ná-pɛlɛyeɠei ʋeelalazu eyɛsu ɠɔ, mazɔlɔɔ é ɠɛa suɠwɛɛ ga ná-dointi ta bɛ̀lɛlalazu, kɛlɛ é la kɛɛni, é ʋa naati maaɠolo. 14 Naa ɠa é ba, gè ɠona Eli ná-pɛlɛyeɠei ʋɛ, gè ɠɛ ma: ‹Zalaɠai ɓaa vebɛaniiti ti la zooga ti ʋa Eli ná-pɛlɛyeɠei ná-kotoi gba eyɛsu pɛ.› » 15 Samiyɛle yɛni laani eyɛsu geelaalao. Naa ʋoluma, é wuzeɠeni, é Ɠɔoɠɔ GALAGI zei ʋɛlɛi ma ʋɛlɛlaʋɛti daalao. Kɛlɛ nii GALA ge boni ma, é ɠɛni luazu ga é ʋa naa wo Eli ma. 16 Kɛlɛ Eli tolini, é ɠɛ ma: «Samiyɛle, dòun zunui!»Doungoi gooɠaaʋoteni, é ɠɛ ma: «Nà ɠaa.» 17 Eli ɠɛ ma: «Lee ɠa Ɠɔoɠɔ GALAGI bogai è ma? Mina tanɔpɛ dɔɔɠu bà. GALA ka è zo ná-ziiɠaawanai pɛ su, ni ɗa gila kpalaa dɔɔɠuna bà!» 18 Samiyɛle daani ma kpɛ, é ti pɛ daazeeli ma, é la ɠɛni tanɔpɛ dɔɔɠuni Eli ʋa. Eli ɠɛni ma: «Tɔ ɠa é ga Ɠɔoɠɔ GALAGI, é naa ɠɛ, nii pagai gaazu.» 19 Samiyɛle ɠɛni wɔɔlɔzu, Ɠɔoɠɔ GALAGI ɠɛni ba yeenɔpɛ, wooi ɠilagilagi kpein é ɠɛni bosu, Ɠɔoɠɔ GALAGI laaseigi zu, ti pɛ daa ɠɛni zeelizu. 20 Naa ɠa é kɛɛni, Izilayɛle kpein, é zo Dan, é li Ɓeel-Seɓa, ti pɛ ti kwɛɛni ga Samiyɛle ɠa ga Ɠɔoɠɔ GALAGI laawoo wo nui. 21 Ɠɔoɠɔ GALAGI la ɠɛni ɓeni ɠula vai ʋa kɛlɛma Silo, mazɔlɔɔ miná ɠa é ɠɛni ɓɔɠɔ lɛɛzu ná ga Samiyɛle, é ɗa daawooi lɛɛ la.

1 Samuel 3 (TOMA)

In Other Versions