1 Samuel 3 (YAPE)

1 Re pagel nem i Samuel e bay u tan pa’ Eli ni be pigpig ngak SOMOL. Ma ri buchu’uw e thin nma yib i yog SOMOL e re ngiyal’ i n’em, nge tin ma piliyeg e changar rok e girdi’ ngar guyed e rib lich. 2 Mi Eli e ngiyal’nem e ke chugur ni nge dabki guy ban’en, me reb e nep’ ni be mol u lan e singgil rok; 3 ma bay Samuel ni be mol u lan fare Tempel rok SOMOL, ni aram e gin ni bay fare Kahol ko M’ag riy. Ma bay e magal ni ka be gak’. 4 Me pining SOMOL Samuel, me fulweg ni ga’ar, “Gub aray!” 5 Me mil i yan ngak Eli me ga’ar ngak, “Kam piningeg, ere gub aray.”Machane me ga’ar Eli, “Dawor gu piningem; mu sul ngam mol.” Ma aram me sul Samuel ko chob rok. 6 Me pining SOMOL Samuel bayay; me suwon ngalang, nge yan ngak Eli me ga’ar ngak, “Kam piningeg, ere gub aray.”Machane me ga’ar Eli, “Fakag, dawor gu piningem; mu sul ngam mol.” 7 Ma dawori nang Samuel ni SOMOL, ni bochan e dawori non ngak bangiyal’. 8 Me pining SOMOL Samuel bayay, ni aram e yay ni gaman e dalip yay ngay; me suwon Samuel ngalang, nge yan ngak Eli me ga’ar, “Kam piningeg, ere gub aray.”Ma aram me nang Eli ni SOMOL e be pining e re pagel nem, 9 me ga’ar ngak, “Mu sul ngam mol, ma fa’an ku ra piningem bayay ma nge lungum, ‘SOMOL, mu non, ya be motoyil e tapigpig rom.’ Me sul Samuel ko chob rok. 10 Me yib SOMOL i sak’iy ngaram, nge pong ni bod ni ka’e pong ni be ga’ar, “Samuel! Samuel!”Me fulweg Samuel ni ga’ar, “Mu non; ya be motoyil e tapigpig rom.” 11 Me ga’ar SOMOL ngak, “Bay gu ngongliy ban’en ngak piyu Israel nrib gel e gafgow riy, ni gubin e girdi’ ni bay rrung’aged murung’agen e yad ra dada’ ngay. 12 Rofen nem e bay gu pi’ urngin e gafgow ni kugog ni bay gu pi’ ngak e tabinaw rok Eli, ni tin gog ko som’on nge yan i mada’ ko tin tomur. 13 Kugog ngak ni bay gu gechignag e tabinaw rok ndariy n’umngin nap’an ni bochan e fa gali pagel ni fak e karognew e thin nib kireb nib togopluw ngog. Manang Eli ni yow be rin’ e pin’ey, machane de talegrow. 14 Ere ri gu be micheg ngak girdi’en e tabinaw rok Eli ni dakuriy ba maligach ni gamanman ara ban’en ni ngar pi’ed ngog ni ku rayag ni nge chuweg wenegen e re denen ney nrib kireb.” 15 Me par Samuel u chob rok nge yan i mada’ ko kadbul; me suwon nge bing fapi mab ko fare naun rok SOMOL. Ma be rus ni nge weliy ngak Eli e tin ke weliy SOMOL ngak. 16 Me pong Eli ni ga’ar, “Samuel, ni fakag!”Me ga’ar Samuel, “Mang e ga be yog?” 17 Me fith Eli ngak ni ga’ar, “Mang e ke weliy SOMOL ngom? Dab mmithag ban’en rog. Ya fa’anra dabmog ngog urngin e tin ke weliy ngom mra gechig nagem Got nib gel.” 18 Ma aram me weliy Samuel ngak ni urngin; nde mithag buchu’uw riy. Me ga’ar Eli, “I ir SOMOL; bayi rin’ e tin be finey ni ir e bfel’.” 19 Me ilal Samuel, ni bay SOMOL rok, me gagiyegnag nge yib i m’ug nib rriyul’ urngin e tin yog Samuel. 20 Ma aram me par ni urngin e girdi’ nu Israel u baley e nam nge mada’ nga baley ni yad manang ni Samuel e riyul’ ni ir ba profet rok SOMOL. 21 Me par SOMOL ni be yib i m’ug u Shiloh, ko fa gin’em ni yib i m’ug riy ngak Samuel nge welthin ngak. Ere fa’anra welthin Samuel, ma urngin e girdi’ nu Israel ni yad ma motoyil ngak.

1 Samuel 3 (YAPE)

In Other Versions