2 Chronicles 21 (TOMA)

1 Zozafate zaani. Ti maaɠuluni mɛmɛwolani ta-ɠabamaʋɛ, Davide ná-taa wolai zu. Ná-doun zunui Yolame ɠa é masadai ɠɛɛni potogi zu. 2 Yolame kɛɛɠɛloin mɔinni: Azalia, Yeɠiyɛle, Zakali, Azaliaɠu, Mikayɛle ta Sefatia, niiti pɛ ti ɠɛni ga Izilayɛle masagi Zozafate ná-doun zunuiti. 3 Ti-ɠɛɛ ani mɔinmɔin feeni ti ʋɛ, walii, zanugi ta ani ɓiigiti, naa ʋoluma é totuɠɔlai veeni ti ya Zuda laa wolai ma mɔinmɔin su, ʋɛti siɠigi náti ma, kɛlɛ Yolame ɠa é masadai ɠalivaani ma, tɔɔzei naa ɠa é ɠɛni ga doun zunu mɔungi. 4 Yolame ɓegai ma ga kɛɛɠɛ ná-masadai zɔlɔɔ, é ná-masadai zapelɔ, é kɛɛɠɛlointi pɛ paani, naa ʋɛɛ Izilayɛle lotuɠɔiti tanigaani ba. 5 Yolame ná-konagi ɠɛni ga puusaʋa maazu fele (32), siɛgi zu é zeini la ga masagi. Kona dɔsaʋa ɠa é kɛɛni masadai zu Zeluzalɛme. 6 É ziɛ ʋele ɲɔuni ga Izilayɛle masagiti kɛʋele, eɠɛʋelei nɔ Akaɓe ná-pɛlɛyeɠei kɛɛni la, mazɔlɔɔ é Akaɓe ná-doun anzanui gila fuluni. É Ɠɔoɠɔ GALAGI wanama vai ɠɛɛni. 7 Kɛlɛ Ɠɔoɠɔ GALAGI la ɠɛni kɛɛni é ʋa Davide ná-masadai ɠoloɠolo, mazɔlɔɔ é minazeɠe boni Davide ʋɛ ga naa mavofodaiti ta ɠɛ masadai ɠɛɛzu nɔ ɠɔ. 8 Yolame ná-masa fai ma ziɛgi zu ɠa Edɔme nuiti ti ɓakani la Zuda masadai laalɔɠɔma, ti ɓɔɠɔ masa sei. 9 Yolame ta ná-salaʋusu ɠundiɠiiti, naa ʋɛɛ ná-kɔɔɠɔ wotoloiti pɛ ba, ti liini. Kua zaamai, ti lɔɔni Edɔme nuiti saama, niiti ti maaɠakuni niina, ti vɔni naati ma. 10 É zo názu ma niina, é zeeli za ma, Edɔme nuiti ti la mɔ Zuda masadai yeema, ta ɓɔɠɔ yeema. Naama yeeɠɛɠalai nɔ Liɓina taa wolai wuzeɠeni Zuda laalɔɠɔma, é ɠula Yolame ná-zobogi wu, tɔɔzei é ʋoluaveni Ɠɔoɠɔ GALAGI ʋa, mɛmɛwolani ta-ƓALAGI. 11 É zalaɠa ɠula adaʋɛti kpɛtɛni vɔlɔ gala kiligiti bɛ Zuda ɠize yooi zu. Ʋele ɠana é Zeluzalɛme nuiti diini la kɔɔɠɔ gani kɔɔ vai ma, é Zuda nuiti daaʋili faa ɲɔu ɠɛɛ vai ma. 12 Yeeta, Yolame GALA goo wo nui Eli ná-sɛʋɛ zɔlɔɔni, nii é zɛʋɛni su ga: «È-mɛmɛwola Davide ná-GALAGI, Ɠɔoɠɔ GALAGI wooi ɠaa: ‹È la mɔ ziɛni ga Zuda masagiti è-ɠɛwola Aza ta è-ɠɛɛ Zozafate ti-ziɛ ʋele. 13 Kɛlɛ ɗɔun è ʋokɔɠɔgɛ Izilayɛle masagiti ma, è Zuda nuiti ta Zeluzalɛme nuiti dii kɔɔɠɔ gani kɔɔ vaiti ma, è ɗa ʋokɔɠɔ Akaɓe ná-pɛlɛyeɠei ná-kɔɔɠɔ gani kɔɔ vai ma. È yɛsu vɔlɔ è è-ɠɛɛlointi paa, ɗa-ʋɛlɛyeɠei wu nuiti, niiti mu ti vizɔga ɠɛa de è ʋa. 14 Naa ɠa é ba, Ɠɔoɠɔ GALAGI ɠa ɗa-nuɓusɛiti, è-loun zunuiti, è-anzaiti ta è-ɠɔligiti pɛ doɠazu ga maanɔɠɔ wolai. 15 Ɗa ɓɔɠɔ mu, seeɓɛ ɲɔiti ka ti laalɛɛzu è wu, ma un ge daa ma mɛɛ ga koozu zeeɓɛi nii folo-o-folo ta ɠa ɠɛ liizu ga ʋiliga su, eyɛsu é è-ʋuluiti kula è ɠoozu.› » 16 Ɠɔoɠɔ GALAGI Filisiti nuiti buzeɠeni Yolame laalɔɠɔma, naa ʋɛɛ Alaɓuiti ba, niiti ti Etiyopi ɠoba. 17 Ti kɔɔ valani Zuda ʋa, ti vaza zooi zu, ti li ga naavoloi pɛ nii gaalɛɛni ba masa pɛlɛ wolai wu, ti liini ga ná-doun zunuiti ta anzaiti duɔlai zu, doun zunui ɠila kpe nɔ ɠa é yɛni zea, Yoaɠaze, nii é ɠɛni ga ti pɛ ma loungoi. 18 Naama vaiti pɛ poluma, Ɠɔoɠɔ GALAGI Yolame loɠani ga koozu zeeɓɛi, nii é la ʋaloa. 19 Folo-o-folo ta ɠɛni ɓɔsu nɔ ba, konagi velesiɛi ɠaaɓelasuʋɛ, seeɓɛi koozu zɔɔlaiti kulani kogi zu, naa maaʋele ma é zaani soolɛ wolai zu. Nuɓusɛiti ti la ɠɛni abu wolai lo ná-lɛbiyai vaa ma, eɠɛʋelei ti kɛɛni la mɛmɛwolani bɛ. 20 Yolame ná-konagi ɠɛni ga puusaʋa maazu felegɔ (32), siɛgi zu é zeini la ga masagi. Kona dɔsaʋa ɠa é kɛɛni masadai zu Zeluzalɛme. É zaani, nu nɔpɛ ge la nimizani. Ti maaɠuluni Davide ná-taa wolai zu, kɛlɛ ti la ɠɛni maaɠuluni masagiti ta-ɠabamaʋɛ.

2 Chronicles 21 (TOMA)

In Other Versions