Colossians 3 (TOMA)

1 Kɛlɛ wo wuzeɠeni, wo ɠula saai ya wa Kilista. Deɠɛmu, à geezuʋɛ vaiti gaiziɛ, ʋɛ Kilista zeini ná, GALA zeezazuʋɛ. 2 Wa-ɠigaiziɛi pɛ ge lo geezuʋɛ vaiti ba, é mina mɔ li ga etea geleiti pɔ pelei. 3 Mazɔlɔɔ wo zaani, wo-yɛnvui ʋɛɛ Kilista ʋa, ti lɔɔɠu GALA zea. 4 Siɛgi zu Kilista, é ga wo-yɛnvui, é ɠulazu la kɛlɛma, wa ɓalaagi wa ɠula kɛlɛma wa tɔun, wo wɔnɔ zɔlɔɔ ná-lɛbiyai zu. 5 Deɠɛmu, à etea vaa ɲɔiti suɠoloɠolo, ti wo-yiimaʋɛ: koloɠologi, kɔzɔba vai, ɓɔɠɔyiimai, ani wɔin ɲɔu vaiti, ta koozu yii, é ga kɔɔɠɔ gani kɔɔ vai. 6 Naama ziɛ ʋeleiti ka ti GALA ná-ziiɠaawanai maalolisu naati ma, niiti ti la kɛɛzu ti ʋa gooi zo. 7 Wo ɠɛni ziɛzu ɠana mɔungi zu, siɛgi zu wo ɠɛni eteai ziɛzu la naama ɠotoiti su. 8 Kɛlɛ niizu, à ɠɛlɛ niima vaiti pɛ ba: ziiɠaawanai, ziiɠulagi, keleɠele ɲɔi, tɔɠɔ ɠoloɠologi, ta woo ɲɔu wo faiti ti ɠulazu wo-laaʋɛ. 9 À mina ɗa ga zɛɛ wo ɓɔɠɔ ma mɔnɔ, mazɔlɔɔ wo nu wɔlɔmalai ta ma ziɛ ʋelei ɠulaa ɠɔba. 10 Wo ɓɔɠɔ maaɠilia ga nu niinɛlai, nii é niinɛzu, é zoloo Kpɛtɛ ƓALAGI ma niinigi ma, nii a kɛ wo kwɛɛ. 11 Zeeɠaaɠwɛɛzu nɔpɛ ge la Zuifuiti ba ta nuiti ti la ga Zuifua, ɓaa tatipɛlɛʋolu nuiti ta tatipɛlɛʋolulala nuiti, ɓaa dɔɓɔzu nuiti, ɓaa kalatala nuiti, ɓaa duɔiti ta wɔɔlɔiti, kɛlɛ Kilista ɠa é ga ma ɓiigi fai pɛ su. 12 Naa ɠa é ba, tɛi wo ga nu ɲadegaiti, GALA ge wo nɛai ʋɛ, é yiimazeɠe ga woye ga wo ɠɛ ga nɔnɔ, à ɓɔɠɔ maaɠili ga niima vaiti: maawɔinɠai, nuɓɔɠɔlai, ɓɔɠɔmaayeii, sɛsɛbogi, ta ziilɔɔi. 13 À yeezei ɓɔɠɔ wu wo ɠilagilagi pɛ. Ni ta-zɔ ka bɔɔla ɠisu, à ɓɔɠɔ zuvaayɛ. Eɠɛʋelei Maliɠii wo zuvaayɛgai da, wa ɓalaagi, wo maanɛɛʋɛ wo zɔiti suvaayɛ ɠana. 14 Kɛlɛ nii bɔɔlɔai ti pɛ ba, à ɓɔɠɔ maaɠili ga nɛɛbɛi, nii é wo ɠilizu ɓɔɠɔ ʋa kpaan. 15 Kilista ná-ziilɛigi lo wo luɠɔ, naama yiilɛigi ɠa GALA ge wo loligai ma ʋɔɔma, wo ɠɛ ga kpusɛ ɠilagi ʋaalobazuʋɛti. À ɠɛ ga faanɛɛ wuuɠwɛɛ nuiti. 16 Kilista laawooi yɛ wo zaama ga bɔɔlɔa. À ɓɔɠɔ ɠala, wo ɓɔɠɔ lɛnɛ wo ɠilagilagi ɠimalai pɛ su. À GALA guyeiti too, ta GALA dɛbi wuyeiti, naa ʋɛɛ guyeiti ba Zɛnvu Ɲadegai ti lɛɛzu ga woye. À ti loo GALA bɛ ga yii pɛ ta faanɛɛ wuuɠwɛɛgai. 17 Nii nɔpɛ wo kɛɛzu, kpɔɛzuɠulai zu ɓaa kɛɛwotii zu, à ti pɛ kɛ, é zoloo Maliɠii Yesu yiimai ma, wo ɗa Ɠɛɛɠɛ GALA mama ga tɔun maaʋele. 18 Anzaiti, à ɓɔɠɔmaayei wo-zinigiti bɛ, eɠɛʋelei soloogai da anzanuiti ma, niiti ti ga Maliɠii nɔnɔiti. 19 Anzazinigiti, à wo-anzaiti nɛɛ ʋɛ, à mina ti zopele ɲɔu. 20 Dointi, à ɠolo fai pɛ su wo zɔlɔɔ nuiti bɛ, mazɔlɔɔ Maliɠii yiimai ɠana. 21 Doun kɛɛɠɛiti, à mina wo-lointi ziiɓɔlɔ vaa ɠɛ, wo ʋa ti iɲɔteʋe. 22 Duɔiti, à ɠolo fai pɛ su wa-luɔ kɛɛɠɛiti bɛ eteai zu, naa mina ɠɛ ga ti ɠaazu vaa nɔ, wo ʋa nu ɛnɛkɛ nɔ, kɛlɛ à kɛ ga zii zɔledai, unfemai maaʋele ma wo feezu Maliɠii ʋɛ. 23 Boti nɔpɛ wo kɛɛzu, à kɛ ga wo-yiimaʋɛ pɛ, eɠɛʋelei wo kɛɛzu la Maliɠii ʋɛ, nuiti taade wo ʋa ɠɛ kɛɛzu ti ʋɛ. 24 À suɠwɛɛ ga Maliɠii ɠa wa-ɠulanumai ve wo ya, wo wɔnɔ zɔlɔɔ poganiiti su. Kilista ɠa é ga Maliɠii nii wo botii ɠɛɛzu bɛ. 25 Mazɔlɔɔ zɔi nɔpɛ é telebotalai ɠɛɛzu, toɠa naama zalai zɔlɔɔ nii soloogai telebotalai ma nii é kɛai. GALA ge la ɗa ga zeelɔzɔɠɔzu ɠɛ nuɓusɛiti su.

Colossians 3 (TOMA)

In Other Versions