Ezekiel 47 (TOMA)

1 Zunui liini ga ze nu lɛɛzuʋɛ GALA sei ʋɛlɛi wu. Gè ziɛi ɠaani, é ɗa ɠula GALA sei ʋɛlɛi wuʋɛ nu lɛɛzuʋɛ folo ɠulazu ʋelei, mazɔlɔɔ GALA sei ʋɛlɛi ɠaaʋoteni folo ɠulazu ʋelei ma. Ziɛi ɠɛni ɠulazu ga GALA sei ʋɛlɛi yeezazu ʋelei, é ɗa leʋe ga lɛkpɛmaʋɛ nu yeezazu ʋelei zalaɠa ɠulazuʋɛ ma vaa ʋa. 2 É ɠulani ga ze ga nu ɠɔʋɛzu ʋele ziɠidaʋɛ ʋɔ pelei, gi latini koizuʋɛ ma, gi li folo ɠulazu ʋelei ma ziɠidaʋɛ. Miná ɓalaa ziɛi ɠɛni ɠulazu ga lɛkpɛmaʋɛ nu yeezazu ʋelei. 3 É lago liini folo ɠulazu ʋelei, galui ɠɛni zea, é zeezakpa waagila (1.000) kɔɠɔni miná ʋele. É ɠɛni gi ziɛ ziɛi wu, gi ɓudɛ, ziɛi sòni tɛ̀ɛ ɠain ʋa. 4 É zeezakpa waagila (1.000) kɔɠɔni ʋolu é zɛba é li ga ze ziɛi wu, ziɛi sòni ɲìibizuʋɛ. É zeezakpa waagila (1.000) kɔɠɔni mɔnɔ, é li ga ze ziɛ wu, ziɛi sòni sàamaʋɛ. 5 É zeezakpa waagila (1.000) kɔɠɔni mɔnɔ, kɛlɛ gè la zooni gè ʋa ɓudɛ, mazɔlɔɔ ziɛi wuuzeini gola, kɛni nu a la lase ga. É ɠɛni niina ga kɔtuɗɛ wolai, nu la ɓena maazuɓudɛ. 6 É ɠɛni mà: «Ɗa ʋe, zunui, è kaani?»É loni tùɠɔ, é li ga ze kɔtuɗɛi laaʋɛ. 7 Gè kaani miná ga gulu wolai mɔinni ziɛlaʋɛ ná felegɔ pɛ. 8 É nii ɠaalɛɛni ga ze, é ɠɛ ma: «Kɔtuɗɛi nii ɠa liizu folo ɠulazu ʋelei zooi letema ʋelei, é yei Zuludɛn ma ʋɛtu nɛmɛi zu, é ʋilɛ Kpoloɗɛ Wanai ʋa. Siɛgi zu é ʋuuzu la Kpoloɗɛ Wanai ma, toɠa ma ɗɛi valibo, é niinɛ ʋolu. 9 Ziɛ wu anii kpein ka zɛnvui wo adaʋɛ pɛ, ʋɛ ziɛi nii zeelizu ná, kaleiti ta ɓuɠu gola, mazɔlɔɔ toɠa kpoloɗɛi niinɛ, ʋɛti é zeelizu náti. Ziɛi nii ɠa zɛnvui ve miná pɛ, ʋɛ é zeelizu ná. 10 Naazu kale ɓɛɛ nuiti ta ɠɛ losu ziɛlaʋɛti. É zo En-Gedi é zeeli En-Egelayime, ta ɠɛ ta-lumɔiti suviesu ná pɛ ga ti vɔ. Naama ɠaleiti ta ɠɛ ga kpoloɗɛ wolai wu ɠalei ma ziiti, ti mɔin gola. 11 Ba ɓoigiti ta ma ɓekegiti ti la niinaa, ti ʋa ɲade, kpoloi ɠa yɛ naati ba ɠana nɔ. 12 Gwaa wului ma zii pɛ ka ʋɔnɔ kɔtuɗɛi laaʋɛ felegɔi pɛ. Ti-ɠaalaagiti ti la vɔa eyɛsu pɛ, ti-ɠaawaaiti ti la ɓega eyɛsu pɛ. Alu-o-alu nii seeliai, naa ɠa ɗa ɠula ga, ma niinɛi ɗa ʋu ga, mazɔlɔɔ GALA seizu ɲadegai ɠa ziɛi zeɠezu ná, é ɗa ti ɠɔ. Ti-ɠaawaai ɠa ɠɛ ga daamianigi, ti-ɠaalaagiti ta ɠɛ ga nu ɠɛdɛ salei.» 13 Maliɠii Ɠɔoɠɔ GALAGI wooi ɠaa: «Nà zooi ɠwɛgiti dɛɛzu ga woye nii Izilayɛle woloda puugɔ maazu felegɔi (12) ʋaazu ɠaaɠwɛɛzu ʋa. Zozɛfe ná-bolodai ɠa felegɔ zɔlɔɔ. 14 Wa zooi ɠaaɠwɛ ɓɔɠɔ ʋa ga lietie. Eɠɛʋelei gè ɠonani la wo-mɛmɛwolani bɛ ga nà feezu ti ya, zooi nii gaaɠwɛɛzu wo ʋa ga poganii. 15 «Zooi ma ɠwɛmaʋɛ ɠa ga nii: Nu ɠɔʋɛzu ʋelei, é zo Kpoloɗɛ Wolai ma, é ziɛ ga pelei é leʋesu Etilon, é li Sedade, 16 Ɠamate, Ɓelota, Sibalayime, Damase ɠwɛpelemaʋɛ ta Ɠamate, ta Ɠasɛl-Tikɔn gelei, maaɓuɠaai Awulan ʋa. 17 Kwɛpelemaʋɛ ɠa zosu Kpoloɗɛ Wolai ʋa, é li Ɠasaal-Enon, folo ɠulazu ʋelei, é ɠwɛ Damase ɠwɛpelemaʋɛ ʋa ta Ɠamate. Naa ɠa a ɠɛ ga nu ɠɔʋɛzu ʋelei ma ɠwɛgi. 18 «Folo ɠulazu ʋelei ma ɠwɛgi ɠa ɠɛ Awulan ta Damase ti yɔɠɔzuʋɛ, é leʋe ga Zuludɛn ma ʋɛtugi zu ʋele, Galaade ɠoʋii ta Izilayɛle yooi ti yɔɠɔzuʋɛ, eyɛsu é zei Kpoloɗɛ Wanai ʋa. Naa ɠa a ɠɛ ga folo ɠulazu ʋelei ma ɠwɛgi. 19 «Lɛkpɛmaʋɛ nu yeezazu ʋelei, kwɛmaʋɛ ɠa zo Tamaal, é zeeli Meliɓa ɗɛiti ma, Kadɛse, naa ʋolu é lɛ ga Ezipete ɠɔtuɗɛi, é lo Kpoloɗɛ Wolai ʋa. Naa ɠa a ɠɛ ga nu yeezazu ʋelei ma ɠwɛgi. 20 «Folo liizu ʋele ɠwɛgi ɠa ɠɛ ga Kpoloɗɛ Wolai, é zo nu yeezazuʋɛ ma ɠwɛpelemaʋɛ, eyɛsu é zei Leɓo-Ɠamate ʋa nu ɠɔʋɛzuʋɛ. Naa ɠa a ɠɛ ga folo liizu ʋelei ma ɠwɛgi. 21 «Wa niima yooi ɠaaɠwɛ Izilayɛle nuɓusɛiti ba ga bolodama ʋelei. 22 Wa gaaɠwɛ ɓɔɠɔ ʋa ga kpakutoomai. À mina yeema seikɔɠɔma nuiti ma ti zeini wo zaama, ti ʋaazu dointi sɔlɔɔsu wa-yooi zu. Wa naati so ga ɠɛʋele ta Izilayɛle nuiti, eɠɛ zou lointi, ti tɔnɔ zɔlɔɔ zooi zu Izilayɛle wolodamaiti su. 23 Bolodamai nii ma nu zeini su, miná ɠa a nɔnɔi zɔlɔɔ ná,» Maliɠii Ɠɔoɠɔ GALAGI wooi ɠana.

Ezekiel 47 (TOMA)

In Other Versions