Ezra 5 (TOMA)

1 GALA goo wo nuiti Azé ta Zakali, Ido ná-doun zunui, ti ɓɔɛni Zuifuiti pɔ Zuda yooi zu ta Zeluzalɛme ga GALA daawooi, Izilayɛle ná-GALAGI. 2 Zoloɓaɓɛle, Seyalitiyɛle ná-doun zunui, ta Zozuwe, Yosadake ná-doun zunui, ti wuzeɠe ʋele ɠana, ti GALA sei ʋɛlɛi lo fai lɔɔzei Zeluzalɛme, GALA goo wo nuiti ti ɗa ɓɔ ti ʋa. 3 Gaamago nɔ, Tatenayi nii é ɠɛni ga zou zɛʋɛ ɠundiɠii ziɛ wolai Efelate folo liizu ʋelei pɛ unda, ta Setaal-Ɓozinayi, é ʋɛɛ ti-wɔɔlaiti pɛ ba, ti liini ti ʋɔ bɛ, ti ɠɛ ti ma: «Ɓɛ ɠa é niima levei vea wo ya ga wo GALA sei ʋɛlɛi nii lo ʋolu, wo ma ziɠigiti niinɛ? 4 Nuiti kpein ti niima ʋɛlɛi losu, à ti pɛ daaseigiti fe gi ya.» 5 Kɛlɛ GALA ge ɓaani Zuifuiti ta-ɠundiɠiiti maazu. Nu la ta-wotii loni pele zu, eyɛsu sɛʋɛ zeeli Daliyuse ma, ta é ná-gooɠaaʋotegi ve é ʋilɛ niima vai ʋa. 6 Wɛlɛ sɛʋɛi zu wooi ʋa, nii é leʋeni masagi Daliyuse ma, é ɠula Tatenayi ya, nii é ɠɛni ga zou zɛʋɛ ɠundiɠii ziɛ wolai Efelate folo liizu ʋelei pɛ unda, ta Setaal-Ɓozinayi, é ʋɛɛ ti-wɔɔlaiti pɛ ba. 7 Ʋele ɠaa ti ɓɔɛni la ta-zɛʋɛi zu:«Masagi Daliyuse, ziilɛi daazeeliai ɠɛ è ʋɛ. 8 Masagi, gá bosu è ma ga gi liiʋɛ Zuda you zɛʋɛi ma, gi zeeli GALA golai zei ʋɛlɛi ʋɔ bɛ. Nuiti ta ga pɛlɛi naa lo ga kɔtu zaɠaai, ti ɗa guluiti dɔ ma ziɠigiti su, ti zɛbɛzeɠeʋɛ botii zu, é ɗa zoloo ti ya. 9 Gi kundiɠiiti gaazaɠagɛ, gi ɠɛ ti ma: ‹Ɓɛ ɠa é niima levei vea wo ya ga wo GALA sei ʋɛlɛi nii lo ʋolu, wo ma ziɠigiti niinɛ?› 10 Gi ɠɛɛʋɛ ti ma ɓalaa, niiti kpein ti unda, ti naati kpein daaseigiti sɛʋɛ, ti fe gi ya. 11 Ti gi wooɠaaʋotegɛ ga: ‹GALAGI nii é geeɠɔlɔgi ta zooi ɓɛtɛa, naa ná-botiɠɛ nuiti ka ga giye, gá sei ʋɛlɛi nii losu ʋolu, nii Izilayɛle masa golai gila ge toni kaite, é gaaɓela. 12 Kɛlɛ gi-mɛmɛwolani ti geeɠɔlɔgi ɓɛtɛ ƓALAGI yiiɠaawanaai ma, naa ti ɠwɛɛni Neɓukadenɛzaal ma, Ɓaɓilɔne masagi, Kaledé nui, tɔ ɠa é GALA sei ʋɛlɛi nii ɠoloni, é li ga tiye duɔlai zu Ɓaɓilɔne. 13 Kɛlɛ anɛɛ naa ʋe, Ɓaɓilɔne masagi Siluse ná-kona mɔungi ma, é devei veeni ga GALA sei ʋɛlɛi nii lo ʋolu. 14 Masagi Siluse ɓɔɠɔi devei veeni ga sɔɔlai niiti kpein ti ɓɛtɛai ga zanugi ta walii, niiti Neɓukadenɛzaal ti ɠulani GALA sei ʋɛlɛi wu Zeluzalɛme, é li ga tiye, é ti la ná-galagi ná-pɛlɛi wu Ɓaɓilɔne, ti sɔɔlai naati feeni Sɛsɛɓasaal ya, nii tɔ ɓɔɠɔi é kɛɛni ga Zuda you zɛʋɛ ɠundiɠii. 15 É valini ma ga: Li ga sɔɔlai niiti. Siɛgi zu GALA sei ʋɛlɛi ɓesu la ga lo tosu wɔlɔmai Zeluzalɛme, wo ti la bu. 16 Názu ɠa Sɛsɛɓasaal ʋaa la ʋɛ Zeluzalɛme, é GALA sei ʋɛlɛ niinɛi ma zeɓasemai la. É zo naazu ma botii ɠa ba, é ɗa ɠɛ, kɛlɛ gaa la dɛ ɓelani.› 17 Niizu niina, masagi, ni ɗa kaana ga faa ʋagɔ, bo, ti wɛlɛ Ɓaɓilɔne masagiti ta-zɛʋɛ wɔlɔmaiti su, é ɠwɛɛ ni masagi Siluse deve veeni ga ɠite vaa GALA sei ʋɛlɛi nii lo fai zu Zeluzalɛme, naa ʋoluma ɗa ɗa-levei lɛ ga giye niina niima vai zu.»

Ezra 5 (TOMA)

In Other Versions