Genesis 3 (TOMA)

1 Kaalii ɠeleɠelega ɠɛni de, é leʋe dɔɓɔ zuaiti kpein ba, niiti Ɠɔoɠɔ GALAGI ti ɓɛtɛni. É ɠɛni anzanui ma: «GALA ge bogɛ nɛi ga ɠite, ga wo mina guluiti kpein ma waai mi, niiti ti kpelei zu?» 2 Anzanui kaalii wooɠaaʋoteni, é ɠɛ ma: «Gá zoo gi kpelei zu wuluiti ma waai ta mi. 3 Kɛlɛ nii é ga gului é loni kpelei zaamaʋɛ, naa ma waai, GALA ge ɠɛni ma: ‹À mina ta mi, wo mina vɔɔɠu ba, naa ɠa a kɛ wo mina za.› » 4 Kaalii ɠɛni anzanui ma: «Wo la zaa ɲɛgɛlɛin! 5 Kɛlɛ GALA ge kwɛɛ ga foloi nɔpɛ wo ta miizu la, wo-ɠaazuʋɛti ta zeɠe ma, wa ɠɛ eɠɛ GALA, wa faa ʋagɔi ta faa ɲɔi yɔɠɔzuɠwɛɛ.» 6 Anzanui kaani ga gului naa ma waaiti pɛtɛ ga maanɛɛʋɛ, ta pagɛ ga nu mi, fizɔgɛ ga é keleɠelegi ve nu ya. É ma waai ta ɠulani, é mi. Naa ʋolu é ta veeni sinigi ya, nii é ɠɛni koba, naa ɓalaa ge miini. 7 Ti felegɔ ti-ɠaazuʋɛti ti zeɠeni ma. Ti kwɛɛni ga ti ɠabei ʋe. Ti kooleɠoole gului ma laaiti daɠani, ti gili ɓɔɠɔ ma. 8 Kpɔkɔ lɛilɛigi, ti Ɠɔoɠɔ GALAGI lugi mɛnini, é ɗa ziɛziɛ kpelei zu. Zunui ta anzai ti lɔɔɠuni poun Ɠɔoɠɔ GALAGI ʋa kpele zu wuluiti saama. 9 Ɠɔoɠɔ GALAGI zunui lolini, é ɠɛ ma: «Mini ɠa è ná?» 10 É gooɠaaʋoteni, é ɠɛ ma: «Gè è-lugi mɛnigɛ kpelei zu. Dùaʋɛ, mazɔlɔɔ kàbei ʋe, naa ɠa é kɛa gè lɔɔɠua.» 11 Ɠɔoɠɔ GALAGI ɠɛni ma: «Ɓɛ ɠa kɛai è ma, è ɠabei ʋe? È gulu waai naa ta mia ɓaa, nii gè ɠɛni è ma, mina ta mi?» 12 Zunui gooɠaaʋoteni, é ɠɛ ma: «Anzanui nii è fea zèa, ga gi eteai ziɛ ʋɔɔma, naa ɠa é gulu waai vea zèa, gè ta mi.» 13 Ɠɔoɠɔ GALAGI ɠɛni anzanui ma: «Leeni vaa zu è naa ɠɛai?» É gooɠaaʋoteni, é ɠɛ ma: «Kaalii ɠa é yàava, gè gulu waai ta mi.» 14 Ɠɔoɠɔ GALAGI ɠɛni kaalii ma:«Tɛi è naa ɠɛa, gè è ɠotoa,toganiiti kpein ta dɔɓɔ zuaiti saama.Ɗa ɗa ɓokpo è-ɠogi ma,è ɗa pɔlɔi mi, è-zii ma voloi pɛ su. 15 Nà kpaai lɔ wo yɔɠɔzu wa anzanui,naa ɠa ɠɛ mavofodai ta ɗɔnɔiti zɔɠɔzu.Nɔnɔi ɠa ɗɔungi maawana,ɗɔun ɗa kɔɠɔ libiligi maawana.» 16 É ɠɛni anzanui ma:«Nà ta la ɗa-ɓɔlɔi ma, kogi a ɠɛna è ma,ɗa ɓɔlɔ pɛ, ɗa ʋa dointi sɔlɔɔ.È yiima vai ɠa è mɛɛn è-zinigi ʋɔ pelei,toɠa zei è unda.» 17 É ɠɛni zunui ma:«Tɛi è woiloga è-anzai wooi ma,è gulu waai mi, nii gè ɠɛni è mina mi,zooi ɠa ɠoto è maaʋele ma.Kɛni è zuvikɛi ɠula, è ɓɔlɔ pɛ,é ʋa leɠa è-laamianigi zɔlɔɔ, è-zii ma voloi pɛ su. 18 Toɠa ɠaingiti pɔnɔ è laalɔɠɔma.Ɗa ɠɛ zooi ɠa lufaiti miizu. 19 Ɗa è-laamianigi zɔlɔɔ,kɛlɛ kɛni fɔdɔi ɠula è-loʋalaʋɛ,eyɛsu è ɠale ma zooi wu,ʋɛ è zeɠeai ná.Mazɔlɔɔ è ɓɛtɛʋɛ ga pɔlɔi,ɗa ɠale ma pɔlɔi zu.» 20 Adama anzai laasei pɛɛni ga Ɛve, mazɔlɔɔ tɔ ɠa é ɠɛni ga nu vuluiti kpein ti-lee. 21 Ɠɔoɠɔ GALAGI sua ɠɔlɔi ɓɛtɛni ga seɠei Adama ta anzai ʋɛ, é too ti ɠɔba. 22 Ɠɔoɠɔ GALAGI ɠɛni ma: «Pɛtɛ, zunui ɠɛa eɠɛ ade taɠila, faa ʋagɔi ta faa ɲɔi yɔɠɔzuɠwɛɛ fai zu. Ade pele leʋe tuɠɔ niina, é mina yeemaale, é ʋa zɛnvu wului ma waai ɠula, a ʋa mi, a ʋa yɛ vulua ɠɔoɠɔ.» 23 Ɠɔoɠɔ GALAGI zunui ɠulani Edɛn kpelei ʋa, ga é ɗa zooi woli, ʋɛ kulaai ná. 24 É zunui ɓɛai ma, geezuɠeelaiti ti-laaseigi ga seeluɓɛin, é naati toni Edɛn kpelei zu folo ɠulazu ʋelei, ta boɠa zɔkpɔi nii abui ba, é ɗa lati, ti ɗa zɛnvu wului ma ʋelei makɛ.

Genesis 3 (TOMA)

In Other Versions