Habakkuk 2 (TOMA)

1 Nɔ̀un nà yɛsu nà-ada makɛsuʋɛ,gè loni siɠigi ɠa,ga gè kwɛɛ nii GALA ge bosu mà,ta ʋelei nà nà-kpee wooiti gaaʋote da. 2 Ɠɔoɠɔ GALAGI gòoɠaaʋoteni, ga niima wooiti:«Nii gè dɛɛzu ga ɗe, naa zɛʋɛ,yeeʋozɛ ba kokologiti ma,naa ɠa a kɛ nuiti ti ɗa kala ga pagɔ. 3 Yeeɠɛɠalai la dɛ zeeliniga kulakɛlɛmai tɛi daa ʋa zeeli,kɛlɛ toɠa na maaɓuɠa kɛɛyeei ʋa,é la valiboga pɛ.Sulɛbi pa, maaɓɔun,mazɔlɔɔ daa ɠa zeeli nɔ ti,é la zeɠea ma pɛ. 4 Nui daavegai ga wasogi, é la zɔlega ziimaʋɛ,kɛlɛ telebo nui ɠa ziɛ ga ná-kidaaleʋei maaʋele. 5 Gaamazu, dɔɔi yaavaʋɛ,gaazulɛɛ nui la ɗa ga zeiɗa kpɛ,toɠa ɗa ɠɔdayeɠei zuwɔɔlɔ eɠɛ gɔvɛalaazu.Zii la lɛiɗa eɠɛ saai.É ɗa li nɔ ga zooiti soga,é ɗa nuɓusɛiti pɛ gaalɛ ba ɓɔɠɔ ma.» 6 Nuɓusɛiti ti zogai,ti pɛ ta ʋaazu ɲɛɛɠulasu ɓɔɛi wosu ti laalɔɠɔma, ta faalaalii,ti ɗa ɠɛ ma: «Nimizai ɠa naama nui luɠɔ,zɔi é aniiti gaalɛɛzu ba, tama nɔnɔ laade!É ɗa ta ɓɔ maaɠuye ɠasɔiti ba!Ɗa yɛsu naa ɠa, eyɛsu yeelɛ?» 7 Zɔiti wo kuyei ʋɛɛni ti ma, ti la wuzeɠea gaamanɔ?Niiti ta ɠɛ ɓadɔzu wo ma, ti la wuzeɠea ɓaa?Tiya ɓalaa, ta loo wo ma! 8 Tɔɔzei wo looni zii mɔinmɔin ma,nuɓusɛi mɔtaiti pɛ ta loo wo ma,tɔɔzei nuɓusɛi ɲamai ʋa wo puuzu,faa zuɠoloɠologi zu wo kɛɛzu ga zooiti,ta taa wolaiti, ta ta-laaʋeaiti! 9 Nimizai ɠa naama nui luɠɔ,zɔi é kakama anii ɠaalɛɛzu ba ná-pɛlɛyeɠei ʋɛ,nii a kɛ é zei ɛsɛ pɛ unda,ga maanɔɠɔ mina zeeli ma. 10 Ɗa-ʋɛlɛyeɠei ná-unfe fai ɠa na è deveai,è nuɓusɛi ma mɔinmɔin koloɠoloni,è ʋalaga ɗa-eteai ma. 11 Mazɔlɔɔ siɠigi zu ɠɔtuiti ta kpeei loo,pɛlɛi unsuʋɛ wuluiti ti daazo. 12 Nimizai ɠa naama nui luɠɔ,é ɲamai ʋuuzu, é taai lo da,é taai ʋuuzu ga faaɠaaza golai. 13 Siɛgi zu nuɓusɛiti ti botii ɠɛɛzu la,naama aniiti faa zu ti ɠalazu abui ɠa,ziiti ti ɗa ɓɔɠɔ ɓɔlɔ wafuun,naa la ga Ɠɔoɠɔ GALAGI ná-devei ɓaa,nii é ga Fai-Pɛ-Maliɠii? 14 Mazɔlɔɔ etea nuɓusɛi pɛ ka Ɠɔoɠɔ GALAGI ná-lɛbiyai ɠwɛɛ ga pagɔ,eɠɛʋelei ziɛi kpoloɗɛi ɓomaʋɛ zulaavegai da. 15 Nimizai ɠa naama nui luɠɔ,zɔi é dɔɔi losu seiɲɔɠɔi la,kɛai eɠɛ anivebɛi, é so,é ɓɔɠɔ maaɲakai ɠula, ti ɗa ka! 16 Lɛbiyai ɗa sɔlɔɔ, naa ɠa valibo ga è maaɓoo,ɗa ɓɔɠɔ ɓalaagi, dɔɔi ɓɔle, è ɠabei ɠula!Ɗa-voloi ɠa zeelizu,è ɓɔɔle ga Ɠɔoɠɔ GALAGI ná-ziiɠaawana ɗaawɔi.Ɗa-lɛbiyai ɠa valibo ga è unfegai. 17 Faa zuɠoloɠologi é ɠɛɛni Liɓan,naa ʋoto ka ɠula è ma.Suaiti undaaʋili fai ɠa la è unma, ga é è lɛɛvɛ.Mazɔlɔɔ è nuɓusɛiti ɲamai ʋuuni,è tooma vaiti kɛɛni zooi laalɔɠɔma,ta ná-taa wolai, ta su nuɓusɛiti. 18 Leeni ɠa kɔɔɠɔ ganigi paazu, nii ɲɛɛliɠi nui kpɛtɛzu?Ɓaa kɔlu ɠaawuungai kpɛtɛai ga salei,é losu nuiti tuɠɔ zɛɛ vaiti su?Mazɔlɔɔ zɔi é kpɛtɛzu, naa ɠa ɓɔɠɔ ɠalivaazu ná-kpɛtɛanii ma,kɔɔɠɔ ganigi é la ɓɔɛzu. 19 Nimizai ɠa naama nui luɠɔ,é ɠɛɛzu gulu ɓuɠai ma:«Ɠaazuzeɠe ma!»É ɠɛɛzu kɔtui ma, é la ɓɔɛzu: «Wuzeɠe!»Ta zoo nɛi ti nu ɠala ɓaa?Pɛtɛ dɛɛ, zanugi ta wali ɠaei zɛlɛni ba,kɛlɛ zɛnvu viilɛ ɠila kpalaa ge la su. 20 Ɠɔoɠɔ GALAGI ɓɔɠɔi ɠa zeini ná-pɛlɛ ɲadegai wu.Eteai pɛ ge maaɠɛ kpɔ, tɔun gaazu!

Habakkuk 2 (TOMA)

In Other Versions