Habakkuk 2 (YAPE)
1 Bay gu wan nga p’ebugul tafen e damit rog, mu gu son ngug gguy ko mang e bayi yog SOMOL ngog ni nggu weliy ngak e girdi’, nge fulweg rok ngog ko tin kugog ngak nike kireban’ug ngay. 2 Ba’aray e fulweg ni pi’ SOMOL ngog, “Mu yoloy nga but’ e pin’en ni kug dag ngom, ya nge mom nni be’eg. 3 Mu yoloy, ya dawori taw nga nap’an ni nge yib i m’ug. Machane ngal’an e be yib nib machreg, ma n’en kugog ngom e bay yib i m’ug. Bay mu leamnag nib sowath ni be yib, machane ngam sonnag; ya ra yib i m’ug ko ngiyal’ ni kug turguy, ma dabi sowath. 4 Ba’aray e thin rog ngom: ‘Pi’in yad ba kireb e dab ra fosgad; ma pi’in yad bmat’aw e yad ra fos ni bochan e yad ba yul’yul’ ngak Got.’” 5 Fla’ab e ma ban nigey. Girdi’ ni yad ba chogow e yad ba tolngan’ ma der gapas lanin’rad, yad bod e yam’ ni yugu be fek e pogofan rok e girdi’ ma der gaman u wan’. Aram fan ni yad be m’ag e mael ko pi nam i yan ngar koled. 6 Girdi’ ko pi nam ni kan kolrad e bay u rogned e thin nib kireb ngak e re nam ni kar koled yad u fithik’ e mael, ma yad be moning ngorad. Bayi lungurad, “Gimed be fek e pin’en ni gathi gimed e fanmed, machane bay yib e gechig ngomed! Uw n’umngin nap’an ni ngu’um pired ni be yo’or ban’en romed u daken e modyargal ngak e pi’in bay e malfith rorad ngomed ni ngar thanged?” 7 Gimed ra gin, gimed e pi’in kam koled boch e girdi’ ko mael, ma kam awgad nga fithik’ e malfith, ma bay ni gelfen ngomed ni ngam pi’ed e ris riy. Pi to’ogor e bay rabad mu um t’on gad. Bay ra giliw niged gimed! 8 Pire’ e nam ni kam giliw niged e girdi’ riy, ma chiney e pi’in kar mageygad e bay ra giliw niged gimed, ni bochan e pogofan ni um thanged nge gafgow nrib gel ni ka’um ted ngak e girdi’ nu fayleng nge pi binaw riy. 9 Bayi aw e gechig ngomed! Kam yo’or niged ban’en rok e girdi’ u tabinaw romed ko pin’en ni mfeked u fithik’ e yargal, ma kam guyed rogon ni ngi i par e tabinaw romed ndabi buch ban’en rok e girdi’ riy! 10 Machane luguy romed e ke girengiy e tamra’ nga daken e tabinaw romed; kam girngiyed e gafgow nga dakenmed ni bochan e kam kireb niged bo’or e nam. 11 Mus ko malang ko rungrung ni bay ra tolulgad nib togopluw ngomed, me yan i kumong lingan nga tan e chig ko naun. 12 Bay yib e gechig ngomed! Kam sunumiyed ba binaw nga daken e kireb ni gimed be ngongliy, kam fal’eged rogon urngin ban’en riy u daken e pogofan ni gimed be thang. 13 Pi nam ni kam koled e ke aw porowrad ko maruwel nib m’ay fan, ya urngin e pin’en ni kar ngongliyed e yibe guy nike yik’ be yan e daramram riy ngalang. I SOMOL ni Gubin ma Rayag Rok e ke rin’ e ren’ey. 14 Bayi sug e fayleng ko tamilangan’ ni bay nnang felngin nge maluplup’en SOMOL ni bod feni sug e regur ko day. 15 Bay yib e gechig ngomed! Fithik’ e damumuw romed e mu tamra’ niged mi gimed darifannag e girdi’ u to’obmed i yan; gimed tapgin ma yad be thigthig i yan ni bod be’ nike balyang ko rrum. 16 Bay mu tamra’gad ma dab kun tay famed. Gimed e bay mu unumed ngu’um thigthiggad. I SOMOL e bayi pi’ ngomed e kap ko gechig ngam unumed e n’en ni ba’ riy, ma tayfan ni yibe tay ngomed e bayi thil ngan darifan nagmed. 17 Kam th’abed fa yu chuwo’ i gek’iy nu Lebanon, ma chiney e bay ni th’abmed u but’. Kam li’ed e gamanman ni immoy riy, ma chiney e gamanman e bayi k’ar marus ngomed. Ra buch e ran’ey ni bochan e pogofan ni um thanged nge gafgow ni kam ted ngak e girdi’ nu fayleng nge pi binaw riy. 18 Mang e yira fanay ba liyos ngay? Ya kemus ni ban’en ni pa’ e girdi’ e ni ngongliy ngay, ma dabiyag rok ni nge weliy ngom e tin riyul’. Mang e n’en ni bfel’ nrayag ni rin’ ngak e en ni toy nra pagan’ ngay, ni ba got ni mus ko numon ma dabiyag rok! 19 Bay yib e gechig ngomed! Ma lungumed ngak bangi ren, “Mu od!” ara ngak ba malang, “Mu sak’iy!” Gur rayag rok ba liyos ni nge tamilangeg nem u ban’en? Ra manga kan ing ko gol nge silber, machane dariy e yafos u fithik’. 20 I SOMOL e bay u lan e Tempel rok nib thothup; gubin e girdi’ nu fayleng ma nge th’ab gulungan u p’eowchen.