Haggai 1 (TOMA)

1 Masagi Daliyuse ná-masadai ma ɠona felesiɛi ma alu dɔzitasiɛi ma volo mɔungi ma, Ɠɔoɠɔ GALAGI ɓɔɛni GALA goo wo nui Azé ʋɔ, ga é daazeeli Zuda you zɛʋɛ ɠundiɠii Zoloɓaɓɛle ma, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ma, Yewosadake ná-doun zunui, é ɠɛ ti ma: 2 Ɠɔoɠɔ GALAGI, Fai-Pɛ-Maliɠii wooi ɠaa: «Niima nuiti ta ɠɛɛzu ma: ‹Yeeɠɛɠalai la dɛ zeelini, ga Ɠɔoɠɔ GALAGI zei ʋɛlɛi ʋa lo ʋolu.› » 3 Ɠɔoɠɔ GALAGI laawooi laazeelini ti ma, GALA goo wo nui Azé ya, é ɠɛ ti ma: 4 «Yeeɠɛɠalai ɠa nɛi wo ʋɛ ɓaa, wo zei wa-ʋɛlɛ ʋagɔiti bu, ti maanɛai, tama GALA sei ʋɛlɛi ɠoloɠologai?» 5 Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 6 Wo ani mɔinmɔin fazaga, kɛlɛ tago nɔ ɠa wo sɔlɔɔsu, wa daami wosu, é la kula ɠɛɛzu ga woye, wa ɓɔɔlezu, kɛlɛ é la wo yiilɛizu, wa ɓɔɠɔ maaɠilizu, die ge la zeiɗa wo ma, botiɠɛ nui zalai ɠa ɠɛɛzu, eɠɛ a ɠɛ ʋuuzu ɓɔlɔ zaɠai zu.» 7 Ɠɔoɠɔ GALAGI, Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 8 À lɛ gizeiti ma, wo ʋa ga guluiti, wo sèi ʋɛlɛi lo. Naazu kòozu ɠa nɛɛ miná, ná lɛbiyai zɔlɔɔ.» Ɠɔoɠɔ GALAGI ɠa é boga. 9 «Wo ɠigi loni ani mɔinmɔin ba, kɛlɛ tago nɔ ɠa wo sɔlɔɔni wa-ɓalagaʋɛti. Nágoi ɠa wo ʋaani la wa-ʋɛlɛiti bu, kɛlɛ gè laa viilɛi ʋuuni ma, gaaʋala ba. Leeni vaa zu? Tɔɔzei sèi ʋɛlɛi vai ʋa, koloɠologai, tama wo pɛ wa ɠaaɓaazu wa-ʋɛlɛiti nɔ ma,» Ɠɔoɠɔ GALAGI, Fai-Pɛ-Maliɠii wooi ɠana. 10 «Naa ɠa é kɛɛzu, geeɠɔlɔgi la kɛɛzu, é ʋa duɓui ve, zooi la vaazu bu, ani a ʋa ʋɔnɔ. 11 Nà ɠa gè fɔɔvɔgi maaloliga zooi ma, ta gizeiti ma, ta kpalagiti ma, ta leezɛn ɓeleiti, ta wolive ɓeleiti, ta ziinziin ganigiti kpein zooi ma, ta nuɓusɛiti ta suaiti pɛ, é ɠɔkula nuɓusɛiti ta-wotiiti pɛ ma.» 12 Zoloɓaɓɛle, Seyalitiyɛle ná-doun zunui, ta zalaɠa ɠula ɠundiɠi wolai Zozuwe, Yewosadake ná-doun zunui, ta nuɓusɛi mɔtaiti pɛ, niiti ti ʋaani ti ɠula duɔlai zu, naati pɛ ti Ɠɔoɠɔ GALAGI, ta-ƓALAGI wooi zeɠeni ga gaamai, niigi GALA goo wo nui Azé boni ti ma. Keela wooi Ɠɔoɠɔ GALAGI ta-ƓALAGI feeni zea, é naa ɠaaɓelani ga pagɔ, nuɓusɛiti ti luani Ɠɔoɠɔ GALAGI ʋa. 13 Naa ʋoluma, Azé, Ɠɔoɠɔ GALAGI ná-keelai é teʋeni, é Ɠɔoɠɔ GALAGI wooi woni ti ma, é ɠɛ ti ma: «Nà ya, nà wo ʋa! Ɠɔoɠɔ GALAGI wooi ɠana.» 14 Ɠɔoɠɔ GALAGI zɛbɛ niinɛ veeni Zuda you zɛʋɛ ɠundiɠii Zoloɓaɓɛle ʋɛ, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ʋɛ, Yewosadake ná-doun zunui, ta nuɓusɛi mɔtaiti pɛ bɛ, niiti ti ʋaani ti ɠula duɔlai zu. Ti pɛ ti liini Ɠɔoɠɔ GALAGI, Fai-Pɛ-Maliɠii zei ʋɛlɛi wu, ti botii lɔɔzei, 15 naa ɠɛɛni, masagi Daliyuse ná-konagi velesiɛi ma alu dɔzitasiɛi ma folo ʋuufelegɔ maazu naanigɔi (24) ma.

Haggai 1 (TOMA)

In Other Versions