Hosea 10 (TOMA)

1 Izilayɛle ɠɛni ga leezɛn ansaɠɔgi, é waazu gola.Ʋelei ma waai ɠɛni mɔinzu la,ʋele ɠana ná-zalaɠa ɠulazuʋɛ ɠɛni mɔinzu la.Ʋelei ná-zooi ʋaga ɠɛni de la,ʋele ɠana é ɠɛni sale ɠɔtuiti maaʋɛlupɛlusu da. 2 Nui niiti ta ga nu ɲakaitié zeeli ti yiima munu,kɛlɛ niizu, ta ta-ɠotoi ma zalai zɔlɔɔsu.Ɠɔoɠɔ GALAGI ɠa ta-zalaɠa ɠulazuʋɛti tokasu,é ta-zale ɠɔtuiti kpezeɠele. 3 Naazu ta ɠɛ ma niina:«Masa ge la gi unda,tɔɔzei gi la Ɠɔoɠɔ GALAGI lɛbini.Tɔun anɛɛ ɓalaa masa ga la ɠɛni gi ʋɛ,lee ɓa ka a kɛ gi ʋɛ?» 4 Ta wooiti bosu, ti ɗa zɛɛ ɠonaiti bo,ti ɗa minazeɠe yɔɠɔzu.Kɛlɛ sɔledai ɠa ti ʋɛ niina nɔ,eɠɛ wanaba lufai é ʋɔnɔsu kpalagi zu. 5 Samali nuiti ta zanu nikɛ yiʋoi lɛbizu, nii é Ɓɛte-Avɛn.Ná-nuɓusɛiti ta ná-zalaɠa ɠula nuitita saa wɔlɔi wosu nikɛ yiʋoi ná-faa zu.Ta zoo ɓaagi ná-lɛbiyai maamusɛzu, kɛlɛ é loa ya zea! 6 Tɔɔzei tɔ ɓalaa kɛni nɔ ta lii la ti Asiili, masa golai ɠakala ga maazoloo ganii.Unfegi ɠa yei ga Efelayime.Izilayɛle ɠa unfe ga ná-faazeikpasuiti. 7 Samali ɠoloɠologa,ná-masagi ɠulaʋɛ gaeɠɛ gulu ɓuɠai nii ziɛi liizu la. 8 Ɓɛte-Avɛn zalaɠa ɠula adaʋɛti,ʋɛti Izilayɛle kotoi ɠɛai náti,ti pɛ ta ɠoloɠolo.Kpele tufaiti ta ɠaingiti ta ʋɔnɔ ta-zalaɠa ɠulazuʋɛti.Názu ta ɗa ɠɛ gizeiti ma:«À gi maalɔɔɠu!»,ti ɗa ɠɛ gize goiti ma: «À loo gi ma!» 9 «Ee, Izilayɛle è kotoi ɠɛɛ vai lɔɔzeini kpein Giɓea,è la dɛ valiboni pɛ!Kɔɔi buzeɠeai telebotala nuiti daalɔɠɔma,é la zeelia ti ma Giɓea ɓɔɠɔɓɔɠɔgi ɓaa? 10 Nà ti loɠazu ga yiimai,nuɓusɛiti ta-ʋɛbɛiti ta ɠaalɛ ba ti laalɔɠɔma,ta ti ɠili ga yɔlɔɠɔi,tɔɔzei ta-ɠoto zeizeimai ʋa. 11 Efelayime ɠazaʋini nikɛ zaa ɓokpagi ma, togai fɔɔn,nii é nɛɛni bɛ ga é ɗa moloi ɠaalia.Kɛlɛ nà kɔ papagi lɔɔzu unbawului wu.Nà unbawului laazu Efelayime unma,Zuda ɗa wozai ʋili,Izilayɛle ɗa gaaloɠa. 12 À telebodai ma ani zuwui vaza,wa wooɠɛɠiladai leʋe.À kpala niinɛi ma wozai wo,yeeɠɛɠalai zeelia wo ɠaaʋote mà,nɛ̀i gè ga Ɠɔoɠɔ GALAGI,eyɛsu gè ʋa, gè telebogi ʋu wo ma eɠɛ tonai. 13 Wo silii vazani, wo faa ɲɔi leʋe,wo zɛɛi ɠaawaai mi.Mazɔlɔɔ è ɠɛa laani ɗa-zobogi la,ta ɗa-ɠɔɔɠɔ nu mɔinmɔingiti. 14 Naa ɠa é ba, kpeei ɠa loo ɗa-nuɓusɛiti saama,ɗa-laa wolai niiti siɠigi ti ma, naati pɛ ta ɠoloɠolo,eɠɛʋelei masagi Salaman kɛɛni la ga Ɓɛte-Aalabɛle, kɔɔɠɔ voloi,yeei ti ɠɛni doun deeiti paazu la ti-lointi maazu. 15 Wɛlɛ kidaaʋili fai nii seiɗai wo luɠɔ, Ɓetɛle,tɔɔzei wa zili lateʋegai ʋa.Wozai a seɠena ma nɔ fuaa,Izilayɛle masagi nɔnɔi ɓega ɠana.»

Hosea 10 (TOMA)

In Other Versions