Hosea 4 (TOMA)

1 À woilo Ɠɔoɠɔ GALAGI laawooi ma, Izilayɛle nuiti,mazɔlɔɔ Ɠɔoɠɔ GALAGI ɠa lukpɔzu ga zooi zu nuɓusɛiti pɛ daalɔɠɔ:«Gaamai ta wooɠɛɠiladai ti ɲɛɛlɛa zooi zu,GALA kwɛɛtalai ɠa é zooi zu. 2 Nii é zooi zu, naa ɠa ga:foovooi, ta yaavai, ta nu ʋaai, naa ʋɛɛ unmai ta wɛɛnziɛgi ʋa,ta tooma vaiti, ta ɲama ʋuu vai ta ɗa ʋɛɛ ta ʋa. 3 Naa ɠa é ba, zooi zu ɠa vɔ kpaankpaan,nuɓusɛiti kpein ta vɔ ɠae ma,naa ʋɛɛ dɔɓɔ zuaiti, ta wɔniiti ba.Kpoloɗɛi wu ɠaleiti ɓalaa ta ɲɛɛlɛ.» 4 «Kɛlɛ, nu nɔpɛ ge mina maaɠaali ɠɛ,nu mina zeliloma ɠɛ,mazɔlɔɔ wɔi wo ga zalaɠa ɠula nuiti,ada wa ɠa ade lukpɔzu. 5 Wo-ɠɔɠɔi ɠa ziɠa folo gaalɔgai kpekpe,wa GALA goo wo nui niiti wo ʋolu,naati kɔɠɔi ɠa ziɠa kpidii zu,nà wo-lee Izilayɛle undaaʋili. 6 Nà-nuɓusɛiti ti undaa ɠa ʋilisu tɔɔzei faaɠwɛtalai ʋa.Tɛi wɔi wo ga zalaɠa ɠula nuiti, wo ɠɛlɛa faaɠwɛgi ʋa,nà ɓalaa gè ɠɛlɛa wo ʋa,wo la mɔ ɠɛa ga nà-zalaɠa ɠula nua pɛ.Wo yeemaa wa-ƓALAGI ná-tɔgi ma,nà ɓalaagi nà yeemazu wo-lointi ma. 7 Wo kpein kulaba la ba,wo kotoi ɠɛɛʋɛ dàalɔɠɔma.Nà wa-lɛbiyai valibosu ga ɓaaɠulamai. 8 Ta ɓɔɠɔ ɠɔnɔkulazu ga nà-nuɓusɛiti ta-vaaɠaaza golaiti,ti yiima vai ɠa ga nà-nuɓusɛiti ti ɠɛ ga sɔba nuiti. 9 Kɛlɛ nii nɔ a zeeli nuɓusɛiti ma,naa nɔ ɠa a zeeli zalaɠa ɠula nuiti ma.Nà ti loɠazu tɔɔzei ti-ziɛ ʋelei ʋa,ta ti-ziɛ ʋele ɲɔi zuɓoloɠɔmɔ. 10 Ta daami wo, ti la yiɠoa,ti koloɠologi ma zii pɛ kɛɛ ʋa, ti la ɓuɠua,mazɔlɔɔ ti la mɔ unfesu Ɠɔoɠɔ GALAGI ma. 11 Ti ɓɔɠɔ vea koloɠologi ta dɔɔi ya.Tama dɔɔ niinɛi ti ʋalaga ɠigi ma. 12 Nà-nuɓusɛiti ta ta-ɠɔɔɠɔ ganigi ɠaazaɠasu, é ga gului,tama gulu ɓeke kpuɠai ɠa é ti wooɠaaʋotesu,mazɔlɔɔ koloɠolo fiilɛi ɠa é ti ɠakasu.Ti koloɠologi ɠɛa ga ti ɠɛlɛ vai ta-ƓALAGI ʋa. 13 Ta zalaɠaiti kulazu gize unmaʋɛti,ti ɗa ansansegiti gala gize goiti unmaʋɛti,ta losu sɛne gului bu, ta pɛpele gului, naa ʋɛɛ telebɛnete gului ʋa,niiti ti ma niinigiti bu ɠaanɛai.Naa ɠa é ba, wo-loun anzanuiti ta ʋaazu koloɠologi ɠɛɛzu,wo-loun anzaiti ti wɛɛnziɛgi wo. 14 Gè la ʋaazu wo-loun anzanuiti doɠazu ta-ɠoloɠologi ma vaa zu,gè la wo-loun anzaiti ɓalaa doɠaa ta-wɛɛnzo faiti su.Mazɔlɔɔ zalaɠa ɠula nuiti ɓɔɠɔgoi ta lɔɔɠuzu ta wɛɛnziɛ anzanuiti,ti ɗa zalaɠa laamiiti bo ta koloɠolo anzanuiti ti wa-ɠala pɛlɛiti bu.Nuɓusɛi niiti nɔpɛ kidafaawu la ti ya, naati ti looʋɛ ya. 15 «Ee, Izilayɛle, ni ɗɔun ɗa koloɠologi ɠɛɛzu,Zuda mu ge mina ta ɠɛ pa!À mina li Gilegale,à mina lɛ Ɓɛte-Avɛn ɠizei ma,À mina ɠona, wo ʋa ɗa ɠɛ ma: ‹Gè ɠonaa Ɠɔoɠɔ GALAGI ma, nii é vulua.› 16 Izilayɛle ɠaazulɛɛʋɛ, eɠɛ nikɛ zaai nii gaazulɛai.Wa kaazu ga Ɠɔoɠɔ GALAGI ɠa yɛ losu ti luɠɔga baala ziʋo ɓulugiti kɛʋele,é ɗa li ga tiye tufa lɛnugiti su nɛmɛ wolai zu ɓaa? 17 Kɔɔɠɔ ganigiti ta Efelayime nuiti ka ti yeezogai.À zɛna nɔ! 18 Kpega nɔ ɠa ga ná-dɔɔi ɓɔle,tɔ ɠanu gaama é ɓɔɠɔ ʋalaʋalasu koloɠologi zu,ná-kundiɠiiti ziima vai ɠa ga ɓaaɠulama vai. 19 Fiilɛ wolai ta ɠa ʋaazu nɔ, é ti zeɠe ɠɔɠɔzu,ti ɗa unfe ga ta-zalaɠaiti.»

Hosea 4 (TOMA)

In Other Versions