Isaiah 37 (TOMA)
1 Masagi Ezekiase naama wooi mɛnigai ma, é ná-seɠeiti baliʋalini ga ga kidaaʋiligi maaʋele, é saa wɔlɔ wo seɠei loo ɠɔba, é li Ɠɔoɠɔ GALAGI zei ʋɛlɛi ma ɠoizuʋɛ. 2 É Eliakime leʋeni, nii é ɠɛni ga masagi ná-pɛlɛi wu ɠundiɠii, ta sɛʋɛ ɠɛ nui Seɓena, naa ʋɛɛ zalaɠa ɠula nu wɔlɔiti ba, saa wɔlɔ wo seɠei ti ɠɔba, ti li GALA goo wo nui Ezayi ʋɔ bɛ, Amɔse ná-doun zunui. 3 Ti ɠɛ ma: «Ezekiase wooi ɠaa: ‹Za voloi ɠa ga ziiɓɔlɔ volo, ta maaɠolo volo, ta unfe ku. Mazɔlɔɔ gi ɠɛa eɠɛ koma anzanui, doin zɔlɔɔ fai maaɓuɠaai na ba, kɛlɛ zɛbɛ nɔpɛ ge la mɔ ná, é ʋa sɔlɔɔ. 4 Asiili masagi ná-kɔɔlaaɠai ma ɓɔba nui leʋegɛ ga é zɛnvu su ƓALAGI ʋoomu. Ee, é ga ɗa-ƓALAGI, Ɠɔoɠɔ GALAGI ɠɛni poomugi naati mɛnisu, é doɠa, tɔɔzei kpɔɛ ʋelei nuuti ba. Ɗɔun, ɠaaɓa, è Ɠɔoɠɔ GALAGI maanɛɛnɛ ná-nuɓusɛi mɔtai niiti bɛ.› » 5 Masagi Ezekiase ná-keelaiti ti zeelini Ezayi ʋɔ bɛ. 6 Naa ɠɛni ti ma: «À li, wo ɠɛ wo-maliɠii ma: ‹Ɠɔoɠɔ GALAGI wooi ɠaa: Wooi nuuti Asiili masagi ná-botiɠɛ nuiti ti pòomugai ga tiye, naa mina è maalua. 7 Masagi ɠa wooi ta mɛni, gè pu ziimaʋɛ ga é ɠale ma ná-zooi zu. Miná ɠa nà va bu ga ti paa ná ga boɠa zɔkpɔi.› » 8 Asiili ɠɔɔlaaɠai ná-kpɔba nui ɠaleni ma, mazɔlɔɔ é mɛnini ga ná-masagi zeɠeʋɛ Lakise, é li, é Liɓina zei kɛlɛ su. Miná ɠa é kaani ná. 9 Su la ɠoozani Asiili masagi keela woo zɔlɔɔ ga Etiyopi masagi Tilaka ʋilɛgɛ pele ma tɔun daalɔɠɔma. É keelaiti teʋeni ʋolu Ezekiase ma, é ɠɛ ma: 10 «À ɠɛ Zuda masagi Ezekiase ma: ‹Mina va bu ɗa-ƓALAGI ʋa è yaava, nii è ɠalivaai ma, ni a ɠɛɛna è ma, Zeluzalɛme la lɔa Asiili masagi yeezu. 11 Ɗa ɓɔɠɔgoi è mɛnini ʋelei Asiili masagiti ti zooiti kpein sogai la, ti ti kpein koloɠoloni nɔ. Ɗa kaazu ga ɗa ɠila ka naa ɠa ʋoola è ʋa? 12 Mɛ̀mɛwolani ti taa wolai niiti koloɠoloni: Gozan, Ɠalan, ta Lesɛfe, ti Edɛn mavofodaiti suwuɠaaleʋe niiti ti ɠɛni Telasaal. Naama yooiti ta-ɠalagiti ti ti unmɔɔni ɓaa? 13 Mini ɠa Ɠamate masagi ná, ta Aalapade masagi, ta Layile masagi, ta Sefaalavayime masagi, naa ʋɛɛ Ɠena ta Iva geleiti ba?› » 14 Ezekiase sɛʋɛi ɠulani keelaiti zea, é kala. Naa ʋoluma é lɛɛni la Ɠɔoɠɔ GALAGI zei ʋɛlɛi ma ɠoizuʋɛ, é suvie Ɠɔoɠɔ GALAGI ɠaazu, 15 é maanɛɛnɛ, é ɠɛ ma: 16 «Ee, Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI, ɗɛi è zeini seeluɓɛinti unda, ɗa ɠa è ga GALA gila kpegi eteai zu masadaiti pɛ bɛ, ɗa ɠa è geeɠɔlɔgi ɓɛtɛa ta zooi. 17 Ee, Ɠɔoɠɔ GALAGI, woilo ga pagɔ, ɠaazuzeɠe ma, è wɛlɛ! Sɛnakeliɓe wooi mɛni, nii é ná-kɔɔlaaɠai ma ɓɔba nui leʋegai ga zɛnvu su ƓALAGI ʋoomu ga tiye. 18 Ee, Ɠɔoɠɔ GALAGI, gaamai ʋe, Asiili masagiti ti ziiti pɛ ta ta-yooiti koloɠologɛ. 19 Ti naati ta-ɠalagiti pili abui zu, ti ɠala, tɔɔzei naati ti la ɠɛni ga gala kitea, ti ɠɛni nɔ ga nuɓusɛiti ta-ɲɛɛliɠi wotiiti, gului ta kɔtui, tama ti ti ɠoloɠologɛ. 20 Naa ɠa é ba, ee, Ɠɔoɠɔ GALAGI, gá-ƓALAGI, gi ɠizo, è gi ɠula Sɛnakeliɓe ya, nii a kɛ eteai zu masadaiti pɛ ti kwɛɛ ga ɗa ɠila kpe ka è ga Ɠɔoɠɔ GALAGI.» 21 Názu ɠa Amɔse ná-doun zunui Ezayi niima ɠeela wooi leʋeni la Ezekiase ma, é ɠɛ ma: «Ɠɔoɠɔ GALAGI, Izilayɛle ná-GALAGI wooi ɠaa, nii è maanɛɛnɛai é ʋilɛ Asiili masagi Sɛnakeliɓe ʋa, 22 Ɠɔoɠɔ GALAGI wooi ɠaa daalɔɠɔma:‹Siyɔn anzalopoi è ʋɛlɛʋiliga,é ɗa ɲɛɛɠula è zu.Zeluzalɛme anzalopoi ɠa è ɲɛɛzu,é ɗa ungi ɲiikpi ga ɗe. 23 « ‹Ɓɛ ɠa è poomugai, è suvɛ?Ɓɛ ɠa è daaɠugi ɠulazu la ga woo wola,è wɛlɛ ba ga bɛlɛlalai?Nà ʋe de, Izilayɛle ná-GALA Ɲadegai! 24 È pòomugɛ, nɛ̀i gè ga Maliɠii, ga ɗa-wotiɠɛ nuiti maaʋele,è ɠɛ ma: Nà-kɔɔɠɔ wotolo mɔinmɔingiti saala zu,gè lɛɛni gizeiti unmaʋɛ,gè lɔ Liɓan ɠizei zaamaʋɛ,gè sɛdele gulu ɠoozagiti teʋe,naa ʋɛɛ sipɛlɛ gulu ʋapagiti ba,gè zeeli ma unsu ɠaaɓelagi ma,ná-goya wolai unga munu. 25 Gè ziɛyeɠei wɔɔʋɛ, gè su ɗɛi ɓɔle.Gè ziɛ wolai Nile ma ɓekegiti pɛ fɔɔni ga kɔ̀ɠɔitiEzipete yooi zu ná pɛ. 26 « ‹Kɛlɛ ɗɔun è la suɠwɛɛni ga kaite gè niima vaiti deveʋɛ,ta kaite wɔlɔwɔlɔ gè seiʋɛ kpasu?Niizu niina, nà ga naa laazeeli, nii gè deveai.Naa ɠa é kɛa gè ʋaa ga ɗe,nii a kɛ è taa wolaiti golo niiti siɠigi ti ma,ti ɠɛ nɔ ga kɔtu ziɠigiti. 27 Zɛbɛ nɔpɛ ge la ti zu nuɓusɛiti ba,ta luazu, unfegi yeiɗai ga tiye,ti ɠɛɛʋɛ eɠɛ dɔɓɔzu lufai, eɠɛ tufa lɛnugi,eɠɛ pɛlɛ ɠɔma lufa ʋɔnɔgi,é vɔɔzu aisa ma ɓakui ʋa lo ba. 28 Kɛlɛ gè ɗa-vaiti pɛ kwɛɛ, siɛgi zu è zeini la,gè kwɛɛ siɛgi è ɠulazu la, ɓaa è lɛɛzu la ɗa-ʋɛlɛi wu,ta siɛgi zu è wuzeɠezu la dàalɔɠɔma. 29 Tɛi è wuzeɠea dàalɔɠɔma,ɗa-ɓɔɛ yaɠasagiti ti lɔa gòizu,nà nà-balaɠaegi ʋilisu è-zokpai ʋa,gè è-lakɔlɔgiti pilisu ga nà-kalafei,gè è ɠaaɠale ma ga pelei nii è ʋaai la. 30 « ‹Ɗɔun, ɗa ma, Ezekiase,nii ɠa é ɠɛɛzu è ʋɛ ga poogi:Ɲɔmɔ ɠonagi molo ɠaei nii pɔnɔgai ɓɔɠɔ ʋɛ,naa ɠa é ɠɛɛzu ga wo-ɠɔnɔgi,yɔɠɔnázu ɓalaa ʋele nɔ ɠana é ɠɛɛzu la.Kɛlɛ konagi zaʋasiɛi, à tii ɠɛ, wo teʋe,wo leezɛn ɓeleiti sin, wo ti-ɠaawaai mi. 31 Zuda nui niiti ta yɛ vulua,naati ta ɠɛ eɠɛ gulu ʋɔnɔgi,nii é zapei niinɛiti dɔɔzu,ta é waazu ga pagɔ. 32 Ungo, nui mɔta go ɠa yɛ vulua Zeluzalɛme,kɔɔ ʋoolabaiti ta ɠɛ Siyɔn gizeiti ma.Naa ɠa Ɠɔoɠɔ GALAGI, Fai-Pɛ-Maliɠii ʋaazu kɛɛzutɔɔzei ná-nɛɛbɛ wolai ʋa.› 33 «Naa ɠa é ba, Ɠɔoɠɔ GALAGI wooi ɠaa é ʋilɛ Asiili masagi ʋa:‹É la lɛa taa wolai nii zu pɛ,é la mɛɛn nɔpɛ piliga daalɔɠɔma,é la maaɓuɠaa ba ga ná-kɔɔɠɔ zɛpɛgiti maaʋele,é la pɔlɔ ziɠi toga daalɔɠɔma. 34 Pelei é ʋaani la, toɠa ɠale ma ga naa nɔ,é la lɛa taai tɛi su,› »Ɠɔoɠɔ GALAGI wooi ɠana. 35 « ‹Nà ɓaazu taai nii maazu, gè kizo,nà ɓɔɠɔi maaʋele ma, ta nà-botiɠɛ nui Davide maaʋele ma.› » 36 Ɠɔoɠɔ GALAGI ná-geezuɠeelai ɠulani, é nu waaungila waaʋuulɔsaʋa maazu lɔɔlugɔ (185.000) ʋaa Asiili ɠɔɔlaaɠai zu. Poluma zobui, ti wuungai ma, ti kɔɔlaaɠai zulaavegai ɠaani ga poomaiti. 37 Názu ɠa, Asiili masagi Sɛnakeliɓe kɔɔlaaɠai zeɠeni ná la, é li, é ɠale ma Ninive, é yɛ ná. 38 Yeeta, é yɛni nɔkɔsu ná-galagi Nisilɔke ná-pɛlɛi wu, ná-doun zunuiti Adalamelɛke ta Salɛsɛɛl ti paa ga boɠa zɔkpɔi, naa ʋoluma ti ʋela, ti li Alalate yooi zu. Ná-doun zunui zɔi, daa ɠɛni ga Ezaal-Ɠadon, naa ɠa é zeini potogi zu masa kpɔkpɔgi ɠa.