Isaiah 37 (YAPE)
1 Ma fa’an yigi rung’ag Hezekiah ni Pilung e tin krogned. Me guchthiy e mad rok ni kari taganan’, me yin’ e mad ni tutuw nge yan nga Tempel rok SOMOL. 2 Me l’oeg Eliakim ni ir e ma tay murung’agen e maruwel u tafen e en pilung, nge Shebna ni tayol u tafen e puf oloboch, nge pi’in pi’lal ko prist ngranod ngak Isaiah ni profet nib mo’on ni fak Amoz. Ku mad ni tutuw e karon’ed. 3 Irera’ e thin ni pi’ ngorad ni ngar weliyed ngak Isaiah: “Daba’ e rran ko gafgow; kan gechig nagdad ke m’ay fadad. Gadad bod be’ ni bpin nike taw nga nap’an ni nge gargel ma dabyag u gelngin. 4 Fare emperor nu Assyria e ke l’oeg pilungen e salthaw rok ni nge dariyfannag Got ni be par nib fos. I SOMOL ni Got rom e mang e yigi rung’ag e pi thin nem me gechignag e pi’in i yog. Ere mu meybil ngak Got ni fan ngak e girdi’ rodad nra magach nib fos.” 5 Nap’an ni thap ngak Isaiah e thin rok Hezekiah ni Pilung, 6 me pi’ e fulweg riy: “I SOMOL e be yog ni dab mu pag nge k’ar marus yu Assyria ngom ko thin ni yad be yog ni dabiyag ni nge aywegem SOMOL. 7 I SOMOL e bayi gagiyegnag e emperor nu Assyria nge rung’ag bbug i thin nra k’aring nge sul ko nam rok, me SOMOL e ra pag ngan thang e fan rok u rom.” 8 Fare pilungen e salthaw nu Assyria e rung’ag ni fare emperor nu Assyria e ke chuw u Lakish ma ke mael nga Libnah; ma aram me yan ngaram ni ngar puruy’gow. 9 Me taw e thin ngak yu Assyria ni salthaw nu Egypt, e ke yib ni nge mael ngorad, ni Tirhakah ni Pilung nu Ethiopia e be gafaliyrad. Nap’an e rung’ag fare emperor e re thin nem, me pi’ e babyor nge yan ngak Hezekiah ni Pilung 10 nu Judah ni be ga’ar ngak, “Fare got nma mich u wun’um e yog ngom ni dab mmul ngalan pa’ag, machane dab mu pag nge ban nigem. 11 Ka mu rung’ag e n’en nma rin’ e emperor nu Assyria ko pi binaw nra finey ni nge kirebnag. Ga be leamnag mrayag rom ni ngam mil? 12 Pi ga’ rog ni kakrom e ra buthiged e pi binaw nu Gozan, ngu Haran, ngu Rezef, miyad thang e pogofan rok e girdi’ nu Betheden ni ur pired u Telassar, ma dariy reb fapi got ko pi girdi’ nem ni aywegrad. 13 Bu uw fapi pilung ko fapi binaw nu Hamath, Arpad, Sefarvaim, Hena, ngu Ivvah?” 14 Me fek Hezekiah ni Pilung fa gi babyor u pa’ e tama’log nge be’eg. Me yan nga Tempel, me yan i tay fagi babyor nga p’eowchen SOMOL, 15 me meybil ni ga’ar, 16 “SOMOL, ni Gubin ma Rayag Rok, ni Got nu Israel, ni ga be par ngalang ko fare kerubim, kemus ni go’ gur Got, ni ga be gagiyegnag urngin e lung nu fayleng. I gur e mu sunmiy e fayleng nge lanelang. 17 SOMOL chiney, e ngam motoyil ngomad ma ga yaliy e n’en ni yibe rin’ ngomad. Ma ga motoyil nga urngin e pin’en ni be yog Sennakerib ni be m’ay nagfam, gur fare Got ni ga be par ni gab fos. 18 SOMOL, gamad urngin ni gamad manang ni pi emperor nu Assyria e kar gathayed bpire’ e nam, ke par e binaw riy ndakuriy gathon, 19 ma kan orfeg e pi got rorad ni ku gathi bogi got, ya kemus ni bogi liyos ni gek’iy nge malang ni ngongliy e girdi’ nga pa’. 20 SOMOL, ni Got romad, mu aywegmad e chiney u pa’ yu Assyria, ya nge nang urngin e nam u fayleng ni kammus ni gur e Got.” 21 Ma aram me pi Isaiah bbugithin ni nganog ngak Hezekiah ni Pilung ni iraram e fulweg ko meybil rok. 22 SOMOL e ga’ar, “Sennakerib, fare binaw nu Jerusalem e be minmin ngom, ma be moning nagem. 23 Mini’ e ga be leamnag ni ga be togopluwnag e welthin ngak ma ga be moningnag? Ga be dariy fan nigeg, i Gag fare Got nib thothup nu Israel. 24 Kam l’oeg e pi tapigpig rom ngar thin ni ufanthin gad ngog ni gubin e chariot rom e ka mu kol ko pi burey ntotolang u Lebanon. Ma kag be yog nu rom e bay mu th’ab e tin th’abi nun’uw e gek’iy ni cedar riy nge tin th’abi fel’ e gek’iy ni cypress, ma kam taw ko yungin thabi to’ar u lan e loway. 25 Kam th’um ngay ga be yog ni kam ker e pi luwed ma ga be unum e ran u lan e yug boch e nam, ma rifrifen ay e salthaw rom e ke yotyot e lul’ ni Nile ke mlik. 26 “Amog, dawor mu rung’ag ni gag e gu tanomnag gubin e pin’ey ni kab kakrom? Ma gag e gu gagiyegnag ni nge yodro’ e chiney. I gag e gu pi’ gelngim ni ngam gathay e pi binaw ni kan yororiy ni fan ko mael. 27 Girdi’ ni i par u rom e dariy gelingrad; ni u ra pired nike balyangan’rad ko marus. Yad bod e pan nike tugul u daken bang i flang ara garger nike tugul u daken e chigiy ko ngiyal’ nike yib nifengin e ngek nib gawel. 28 “Machane gu manang urngin salpem, ni n’en ni ga be rin’ nge gin ngam sor ngay. Gumnang rogon e damumuw rom nib togopluw ngog. 29 Ke thap babyoren e damumuw nge tolngan’ rom ngog, ma chiney e bay gu the’ ba lam nga p’ethngum nge bochyang i wasey ni bay gufan ngalan langam nge fulwegem ko re pa’ i kanawo’ ni mub riy.” 30 Ma aram me ga’ar Isaiah ngak Hezekiah ni Pilung, “Irera’ pow ko tin bayi buch. Biney e duw nge bin bayib e bay um koy e grain ni yigi tugul rok, ma bin dalip e duw ngay e bayi yag rom ni ngam yung e grain ngam t’ar wom’ngin, ma ga be yung e grape ngam koy wom’ngin. 31 Pi’in nu Judah nra fosgad e bay ra dammalgad ni bod e gek’iy ni kan yung nra pi’ likngin nga’ar me yib wom’ngin. 32 Ma bay e girdi’ u Jerusalem ngu daken e Burey ni Zion ni dab ra m’ad, ya ke turguy SOMOL ni Gubin ma Rayag Rok ni aray rogon.” 33 Ba’aray e thin nike yog SOMOL ni murung’agen e emperor nu Assyria, “Ri dabi yib ngalan e re binaw ney fa pag ta’reb e gan e get’ing nge yib nga langgin, ma salthaw ni kar feked fa yungi shield e dab ra chugurgad ko re binaw ney, ma salthaw rok e dab ra ubunged e malang nge but’ ni nge longobiy e re binaw ney ni ngar mithgad nga fon ko mael. 34 Re pa’ i kanawo’ ni yib riy e ku ir e bayi sul riy, ma dabi yib ngalan e re binaw ney. I Gag SOMOL e kugog e pi thin ney. 35 Bay gu yororiy e re binaw ney mu gu ayuweg, ni nggu rin’ ni bochan e nge gilbugwag minta’ fag nge bochan e thin ni gu micheg ngak e tapigpig rog i David.” 36 Re nep’ i n’em e yan ba engel rok SOMOL ko gin be par e salthaw nu Assyria riy me thang e pogofan rok 185,000 e salthaw. Ma fa’ani puf e woch ma yad gubin ni yad bay u but’ ni karm’ad. 37 Me chuw Sennakerib ni emperor nu Assyria nge salthaw rok u rom miyad sul nga Nineveh. 38 Me reb e rran ni be meybil Sennakerib u lan e tempel ko birok e got ni aram Nisrok, me yib l’agruw i pumo’on ni fak ni aram e Adrammelek nge Sharezer ngar li’ew ko saydon ngem’, miyow mil ko nam nu Ararat. Me yan Esarhaddon nib mo’on ni fak nga luwan nge mang emperor.