Jeremiah 35 (TOMA)

1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya Zuda masagi Zoziase, nii é ɠɛni ga Yeɠoyakime ná-doun zunui, naa ná-siɛgi zu: 2 «Li Lekaɓe mavofodaiti pɔ bɛ, è ɓɔɛ ti ʋɔ, è lo ti luɠɔ, è li ga tiye Ɠɔoɠɔ GALAGI zei ʋɛlɛi ma ɠoizuʋɛ, wo lɛ ma leʋesui ta wu. È dɔɔi ve ti ya ná ga ti kpɔle.» 3 Gè liini, gè Yaazania ɠaiziɛ, Zelemi ná-doun zunui, Ɠaɓasinia ná-dounloin, ta kɛɛleaiti, ta ná-doun zunuiti, de bosu Lekaɓe nuiti ta-ʋɛlɛyeɠei kpein. 4 Gè liini ga tiye Ɠɔoɠɔ GALAGI zei ʋɛlɛi ma ɠoizuʋɛ, GALA nui Yigidaliya ná-doun zunui Ɠanan ná-doun zunuiti daa ʋɛlɛi wu, kundiɠi wolaiti ta-ʋɛlɛi ɠobaʋɛ, Salume ná-doun zunui Maaseya ná-pɛlɛi maazuʋɛ, zalaɠa ɠula nui é ɠɛni wɛlɛzu nu lɛɛzuʋɛ ma GALA sei ʋɛlɛi ma ɠoizuʋɛ. 5 Gè dɔɔ aniɲaka laavegaiti seini Lekaɓe ʋɛlɛyeɠei ma nuiti kakala, ta gɔwɔiti, gè ɠɛ ti ma: «À dɔɔi ɓɔle.» 6 Kɛlɛ ti sùlooni, ti ɠɛ mà: «Gi la ɗa ga dɔɔ ɓɔlea, mazɔlɔɔ gi-mɛmɛwola Yonadaɓe, Lekaɓe ná-doun zunui, niima levei veeni gi ya, é ɠɛ ma: ‹À mina dɔɔ ɓɔle eyɛsu pɛ, wa-o, wo-lointi-yo. 7 À mina pɛlɛa lo, à mina tii ɠɛ zooi ma, à mina leezɛn ɓele la, à mina yeezei ta wu pa. Kɛlɛ wo-zeizuʋɛ ɠa ga seɠe ɠotaiti nɔ wu wa-eteai pɛ su. Ʋele ɠana wo-zii zu a ɠooza la naama yooi zu, ʋɛ wo ná ga wɛɛinti.› 8 Gá ɠolozu devei naa ʋɛ, nii kpein gi-mɛmɛwola Yonadaɓe boni, Lekaɓe ná-doun zunui. Gi la dɔɔ ɓɔlea, gi-zii ma voloi pɛ su, giya-o, gi-anzaiti-yo, ta gi-loun zunuiti, ta gi-loun anzanuiti. 9 Gi la pɛlɛa losu, gi ʋa ɗa ɲi bu, leezɛn ɓele la gi ya, ɓaa tii ɠɛ lɔɓɔ. 10 Gá zeini seɠe ɠotaiti bu, gá ɠolozu, gi ziɛ ga naa pɛ, nii gi-mɛmɛwola Yonadaɓe feeni gi ya ga devei. 11 Kɛlɛ siɛgi zu Ɓaɓilɔne masagi Neɓukadenɛzaal lɛɛni la niima yooi laalɔɠɔma, gi deveni ga gi lɛ Zeluzalɛme, gi ʋela Ɓaɓilɔne ta Siili nuiti ta-ɠɔɔɓɔgi ʋa. Naa ɠa é ba, gi zeiɗa Zeluzalɛme, niizu.» 12 Naazu Ɠɔoɠɔ GALAGI ɓɔɛni Zelemi ʋɔ, é ɠɛ ma: 13 «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Li, è ɓɔɛ Zuda nuiti pɔ, ta Zeluzalɛme nuiti, è ɠɛ ti ma: Wo la dɛ ɠi sɔlɔɔni kalagi naa ma? Wo la ɠoloa dàawooiti bɛ ɓaa? Ɠɔoɠɔ GALAGI wooi ɠana. 14 Lekaɓe ná-doun zunui Yonadaɓe devei veeni ná-dointi zea, ga ti mina dɔɔi ɓɔle. Lekaɓe nuiti kpein ti naama wooiti soni kpaan, zaaɠaza ti ɓeteʋea dɔɔi ʋa, mazɔlɔɔ ti ɠoloni ti-mɛmɛwola wooi ʋɛ. Tama, nɔ̀un nà, Ɠɔoɠɔ GALAGI, nà wo lɛnɛsu nɔ ɠɔ, kɛlɛ wo la woilosu gòoi ma. 15 Gè la ɓeni nà-botiɠɛ nuiti teʋe fai ʋa wo ma, GALA goo wo nuiti, ga ti ɠɛ wo ma: Wo ɠilagilagi ɠɛlɛ sɔ ɲɔi ʋa, é ziɛ ʋele ɓɛtɛ, à ɓe ɠilizu gala kiligiti ba, wo ʋa ɗa ti lɛbi. Naazu wa zei zooi zu nii gè feeni wo ʋɛ, wa wo-mɛmɛwolani. Kɛlɛ wo la ɠidaani ma, wo la woiloni gòo ma. 16 Lekaɓe ná-doun zunui Yonadaɓe ná-doun zunuiti ti devei naa zoni, nii ti-mɛmɛwola feeni ti ya. Kɛlɛ nuɓusɛi niiti ti la woiloni gòo ma.› 17 Naa ɠa é ba, Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Nà ʋaazu ga maanɔɠɔi Zuda nuiti ta Zeluzalɛme nuiti daalɔɠɔma, gè ti maaluani, tɔɔzei gè ɓɔɛni ti ʋɔ, ti la ɠoloni. Gè ti lolini, kɛlɛ ti la gaaʋoteni.› » 18 Zelemi ɠɛni Lekaɓe nuiti ta-ʋɛlɛyeɠei ma: «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Wo ɠoloni devei ʋɛ wo sɔlɔɔni wo-mɛmɛwola Yonadaɓe ya, wo ziɛni ga naa pɛ ga pagɔ nii é wo leveni ma.› 19 Naa maaʋele ma, Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Lekaɓe ná-doun zunui Yonadaɓe mavofodai ɠa zɔlɔɔ yeenɔpɛ, é ɗa lo kàkalaʋɛ.› »

Jeremiah 35 (TOMA)

In Other Versions