Jeremiah 5 (TOMA)
1 À ziɛziɛ Zeluzalɛme taazuʋɛ ná pɛ,wo wɛlɛ, wo gaazaɠa bo pɛ,wo wɛlɛ adaʋɛ pɛ,ni nu ɠa ná, é ɠɛ ɠila kpe, nii é ziɛzu ga sɔledai,é ɠaaɓaazu é ɠɛ ga lada nu,naazu nà Zeluzalɛme taai tɛi maavaayɛ. 2 Anɛɛ siɛgi zu ti ɠɛɛzu la:«Gè ɠonaa Ɠɔoɠɔ GALAGI ma, nii é vulua,»gaaʋɛɛ ɠonai ɠa ti bosu. 3 Ɠɔoɠɔ GALAGI, nii è wɔinɗai la, naa ɠa é ga wooɠɛɠiladai.È niima nuiti doɠani, kɛlɛ ti la gaaɠaani.È ɠɛni pɔ è ti undaaʋili, kɛlɛ ti ɠɛlɛni tɛnɛ gooi ʋa.Ti ɠaazuʋɛ ɓaani, é leʋe fasai ʋa.Ti ɠɛlɛni ga ti-ziɛ ʋelei maa mina valibo. 4 Gè ɠɛni ɠɛɛzu ɓɔɠɔ ma naazu:«Doungo vaa nɔ ɠa ga nii, ta faiti kɛɛzu ti la gaaɠaazu.Ti la Ɠɔoɠɔ GALAGI ná-pelei ɠwɛɛ,ɓaa ta-ƓALAGI ná-deveiti. 5 Nà li niina leɠa totuɠɔiti pɔ pelei,gè ɓɔɛ ti ʋɔ,mazɔlɔɔ tiya ɠa ti Ɠɔoɠɔ GALAGI ná-pelei ɠwɛɛ,ta ta-ƓALAGI ná-deveiti.»Kɛlɛ ti kpein ti unbawului zuɠaleɠaleni ʋɔɔma,ti galuiti kpein suleʋeleʋeni. 6 Naa ɠa é ba, zalai ɠa ɠulazu dɔɓɔi zu, é laalɛ ti wu,zuluɓui zeɠe nɛmɛi zu, é ti ʋaliʋali ga.Kɔii ɠa lɔɔɠuzu ta-laaloaʋɛ,zɔiti ta ɠulana ná ʋa, é náti bali ga.Tɔɔzei ta-lɔ koloɠologiti bo da mɔinɗa,ta-yaavai zu ɠa liizu nɔ ga wɔɔlɔa kenein. 7 «Naa pɛ poluma, Zeluzalɛme,nà zoo nɛi gè è maavaayɛ leeni ma?È-leaiti ti ɠɛlɛa bà, ti ʋilɛ zɛɛ ɠalagiti polu,ti ɗa naati ta-minazeɠegiti bo.Nii kpein maanɛɛni gè kɛ ti ʋɛ, gè naa ɠɛɛni,kɛlɛ ti wɛɛnziɛgi woni,ti ɠaalɛ ba koloɠolo anzanui ná-pɛlɛi wu. 8 Ta ga gaazulɛɛ zooiti, ti laamiizu ga pagɔ,ti ɠilagilagi ɗa zikɔ seiɲɔɠɔi anzai ʋolu. 9 Gè la wuzeɠea ti laalɔɠɔma naa maaʋele ma ɓaa?»Ɠɔoɠɔ GALAGI wooi ɠana.«Gè la nɔ̀nɔ ʋotokula niima zii ɠɛɠalai ma ɓaa? 10 À lɛ, wo nà-leezɛn ɓelei ɠoloɠolo,kɛlɛ à mina ti pɛ suwuɠaaleʋe.À ma ɓekegiti teʋe ba,ti la ga Ɠɔoɠɔ GALAGI nɔnɔ. 11 Mazɔlɔɔ Izilayɛle masadai ta Zuda masadai ti yàavaʋɛ,»Ɠɔoɠɔ GALAGI wooi ɠana. 12 «Ti ɠɛlɛni bà, nà, Ɠɔoɠɔ GALAGI,ti ɠɛni ma: ‹Zobo nɔpɛ ge la bɛ!Maanɔɠɔ la zeelia gi ma,gi la kɔɔ ɠa ga ɠaazu, ɓaa pului! 13 GALA goo wo nuiti tɔnɔi, ta nɔ ga fiilɛiti,GALA goo ɠila kpalaa ge la veeni ti ya.Maanɔɠɔiti ti ti ma vaa wosu, naati ti la ti unma!› » 14 Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa:«Tɔɔzei wo naama wooi woga,nà dàawooi ɠɛɛzu è-laaʋɛ eɠɛ abui,gè niima nuɓusɛiti kɛ ga guluinii ma abui a ti ɠala. 15 Ee, Izilayɛle nuɓusɛiti, nà zeɠezu ga zii ɠili ɠoozama,gè ʋaa la wo laalɔɠɔma,»Ɠɔoɠɔ GALAGI wooi ɠana.«Zii ʋe nu la vɔniga ma eyɛsu pɛ,zii ʋe é ná kaite,zii ʋe wo la daawoo ɠwɛɛ,ta wo la kpɔɛ wooiti gaaɠaazu. 16 Ta-mɛɛn ʋuu ɓɔlɔi ɠɛɛʋɛ eɠɛ kabayeɠei daalaogai,ti pɛ ta ga kɔɔɠuluɓaiti. 17 Zii naa ɠa wa-molo mɔɔiti koloɠolo ta wa-laamianigiti,toɠa wo-loun zunuiti undaaʋili ta wo-loun anzanuiti,toɠa wa-logani goiti ta ma wolaiti undaaʋili,toɠa wa-leezɛn ɓeleiti koloɠolo ta wa-ɠooleɠoole guluiti,kɔɔi ɠa wa-laa wolaiti koloɠolo niiti siɠigi ti ma, ti ga wa-ɠitogi. 18 «Kɛlɛ anɛɛ naama voloiti su, gè la wo-ma zuwu ɠaaleʋea ɲɛgɛlɛin,» Ɠɔoɠɔ GALAGI wooi ɠana. 19 «Ni gaazaɠa ga wona ga: ‹Leeni vaa zu Ɠɔoɠɔ GALAGI ada-ƓALAGI nii kpein kɛɛzu ga adeye,› ɗa ʋe, Zelemi, ɗa gooɠaaʋotegi wo ga: ‹Wo ɠɛlɛni tɔun ba, wo ɗa boti ɠɛ gala kiligiti bɛ wo ɓɔɠɔ yooi zu. Zenɔ ɠana, wa botii ɠɛ la wɛɛinti bɛ zou ɠili su, é la ga wa-you!› » 20 «Niima wooiti ti wo Zakɔɓe mavofodaiti ma,é wo Zuda yooi zu ná pɛ: 21 ‹À woilo nii ma, ɠimalala nuɓusɛiti, ti la ɠeleɠeleni,ti-ɠaazuʋɛ ɠa ti ʋa, ti la wozaɠaa,ti-woiyeɠei ɠa ti ʋa, ti la faa mɛniga. 22 Wo la unfesu mà ɓaa?Ɠɔoɠɔ GALAGI wooi ɠana.Wo zasu la ɓalizu, wa lona gàazu,nɛ̀i gè ɲaɠaegi ɠɛai ga kpoloɗɛi ɠwɛgi?Kpelagi ɠana eyɛsu ɠɔ é la ɓudɛa maazu.Toɠa ɗa ɲiikpi, kɛlɛ zobo ge la bɛ, é ʋa li ada ɠili,ma lakpatakpagiti tugi ɠa ɗa ɠula,kɛlɛ ti la lia ada ɠili nɔpɛ. 23 Niima nuɓusɛiti, kololala yii ɠa é ti ɠoozu, ti ɓakagɛ,ti ʋoluazoga, ti li. 24 Ti la bosu yiimaʋɛ ga:Ade lua Ɠɔoɠɔ GALAGI ʋa, ada-ƓALAGI,toɠa ɗa tonai ve ade ya ma yeeɠɛɠalai ma,samai ta foɠo undaaɠulazuʋɛ,é dɔɔɠɔiti makɛ ade ʋɛ molo leʋe vai ma. 25 Wa-vaaɠaaza golaiti ka ti gaaʋalaga naa pɛ ba,wa-ɠotoiti ka ti wo ʋalaga niima ani ʋagɔiti ma. 26 Mazɔlɔɔ nu ɲɔiti ta nà-nuɓusɛiti saama,ti ɗa gaaʋɛɛnɛgi wo, eɠɛ nui é balii zeizu,ta tumɔi zeizu, ti nuiti so su. 27 Ta-ʋɛlɛiti daavegɛ ga yaava aniiti,eɠɛʋelei wɔni laɠagi laavegai la ga wɔnii.Naa ɠa é kɛa ti ɠɛa ga zobobɛ nuiti ta kpɛtɛ nuiti. 28 Ti wɔɔlɔa, ti wulɔ,kwɛ ge la ta-vaa ɲɔu ɠɛɛ vai ʋa.Ti la tukpɔi ɠaaleʋezu ga telebodai,ti la podoun maalobosu,ni naa laade, naati ta la ɓɔɠɔ zɔlɔɔ,ti la bala nuiti maalobosu. 29 Gè la wuzeɠea ti laalɔɠɔma naa maaʋele ma ɓaa?Ɠɔoɠɔ GALAGI wooi ɠana.Gè la nɔ̀nɔ ʋotokula niima zii ɠɛɠalai ma ɓaa? 30 « ‹Maalua vaiti ta tɔɠɔ ɠoloɠolo faiti ta ɠɛɛzu zooi zu. 31 GALA goo wo nuiti ta zɛɛ ɓɔɛiti nɔ wosu.Zalaɠa ɠula nuiti ti zei ti unda ga ta-zobogi.Nà-nuɓusɛiti ti naa nɛɛ ʋɛ gola!Leeni ɠa wo ʋaazu kɛɛzu zooi ná-ʋelela ʋele vai zu?› »