Job 14 (TOMA)

1 «Nui nii sɔlɔɔgai anzanui ʋa,ná-foloiti kwɛteʋeʋɛ, ti zulaave ga kpɔlɔi. 2 Toɠa ɠɛɛzu eɠɛ tufa ʋuai é ɠulazu, naa ʋolu é vɔ.Toɠa leʋesu eɠɛ niinigi, é la loga. 3 Tɔ ɠa è ɠaazulaalaogai, è to ba!Ɗa tòlisu tukpɔɠaaleʋezuʋɛ! 4 Ɓɛ ɠa a zoo é ani ʋagɔi ɠula ani ɠɔzɔi zu?Ma nu ɠila kpalaa ge la ná. 5 Tɛi è ná-foloiti tiegɔi leʋea ba,ɗa ɠa è ná-alugi liegɔi leʋea ba,è ná-konagi liegɔiti kwɛɛ,tɔɔzei è ná-eteai ɠwɛteʋeʋɛ, é la ɓudɛa maazu pɛ, 6 ɠaazu lati, è seɠe ba, é lago looɠo,ga é ziilɛi sɔlɔɔ ɓalaa, naa ɠɛ ná-folo luʋai ma zalai zu. 7 «Kito ka ɗa ɠɛ ná, gulu wolai ná-fai zu,ni nu a pɔna, toɠa ɗa ʋɔnɔ ba ʋolu,ma ʋɔnɔbaiti ti la ʋala ba pɛ. 8 Anɛɛ ni ma zapei ɠa wɔlɔzu zooi wu,ma zapei luula dɔɔɠuai fufiligi zu, 9 toɠa ɗa wundu su ʋolu, a ziɛi zɔlɔɔna nɔ feya,é ɓeke eɠɛ siinziin gani niinɛ. 10 Kɛlɛ nui a zaana, toɠa yɛsu laani ga ma ʋoomai.Nuɓusɛi yii a loona, mini ɠa é ná? 11 Yeeta, kpoloɗɛi ɠa vɔ su,ziɛ wolaiti ti maalɔi, ti vɔ su. 12 Zekana, nui a ɠɛna ga too nu,é la mɔ wuzeɠea ʋolu,é la mɔ wuunga ɓɔɠɔ ʋɛ, eyɛsu geeɠɔlɔgiti ti ɲɛɛlɛ,é la ɠulaa ná-ɲiimɛnii zu. 13 Ni nɔ ee, nà-GALAGI, ɗa la kɛɛna, è dɔ̀ɔɠu gɔvɛalaazu,è màkɛ ná, eyɛsu naama voloi zeeli, ɗa-yiiɠaawanai leʋesu da!Ni nɔ ɗa la ku lo bɛ̀, ta leʋena, è ʋa ɠizɛ sù. 14 Kɛlɛ nui a zaana, toɠa vulu su ʋolu, é zɛnvui wo?Nà la ɠɛ maaɓɔungi wosu nà-botiɠɛ voloiti pɛ su,eyɛsu pòtogi ʋa. 15 Ɗa la tòlina, nà la è wooɠaaʋote naazu,siɛgi zu ɗa wɔinna la ga è kà, nɛ̀i è kpɛ̀tɛai. 16 Kɛlɛ tɔun, ɗa niina kɔ̀ɠɔi ʋilɛda ɠilagilagi pɛ gaalusu,ɗa ʋaazu ɓesu ɠidaazu nà-kotoiti bu. 17 Ɗa nà-tɔ koloɠologiti dɔɔɠu ɓɔlɔ ɠila su è daaɠulu kpe,è nà-faaɠaaza golai maalɔɔɠu ga penɛ ɠaaɠiligi. 18 Anɛɛ naa ʋe, gizei ɠa ɗa ɓusɛ, é vaza,fasai zeɠe losuʋɛ. 19 Ziɛiti ta ɗa kɔtuiti sumi, ti ma veinfeingi ɗa yei ga pɔlɔ ʋagɔi.Zekana é la, ɗa nui ná-kitogi ɠoloɠolo. 20 Ɗa ɗa gaavala zooi ma, é li, é la ɠalega ma ʋolu.Ɗa gaazulo pelei valibona, è kpɛ maaɠooza. 21 Ta ná-dointi kpaɠozu, é la mɔ naa ta ɠwɛɛ.Ta ti ʋɛlɛʋɛlɛsu, é la mɔ naa ta ɠaaɠaazu. 22 Tɔ ɠila nɔ ɠa é taɓai zɔlɔɔsu ɓusɛi zu,Tɔ ɠila nɔ ɠa é ziiɓɔlɔi ɠaalu mɛnisu zɛnvui zu.»

Job 14 (TOMA)

In Other Versions