Job 9 (TOMA)

1 Zɔɓe gooɠaaʋoteni naazu, é ɠɛ ma: 2 «Gaamazu, gè kwɛɛ ga zekana é la.Nui ɠa lelebo ɠale GALA gaazu? 3 Ni nu ɠa pɔ é maaɠaali,é la zooga é ʋa gooɠaaʋote gila pa fe woo waagilagi (1.000) zaama. 4 GALA ka nɔnɔ ga ɠimalai, ná-zobogi zuɓaaʋɛ.Ɓɛ ɠa a sakpe, é ʋa ɓe ma zalai zɔlɔɔsu? 5 Toɠa ɗa gizeiti seɠe ti-losuʋɛ, ti la loa ga ná,é ti loka ná-ziiɠaawanai zu. 6 Toɠa ɗa zooi ɓali ma wuulaagiti maazu,ma lɔkpalaiti ti ɲiikpi. 7 A ɓɔɛna foloi ʋɔ, foloi la ɠulaa.Toɠa zoo pele ɓesasu somideɠaiti tuɠɔ ga ti volo. 8 Tɔ ɠila ka a ɗa geeɠɔlɔgi zuvie,tɔ ɠa a ɗa ziɛ kpoloɗɛi ɠaaɠoozazuʋɛti maazu. 9 Tɔ ɠa é geezu ʋoo golaiti kpɛtɛai, ti laa ga:‹Wuluse Golai›, ta ‹Wɔliyɔn›, ta ‹Peleyadegiti›,ta poogi é lɛkpɛma ʋelei nu yeezazuʋɛ. 10 Nii é kɛɛzu, naa wɔɔlɔʋɛ, nu la gaaɠaa,ná-laavɔɔ vaiti gaa la luga. 11 «Ni é ɠɛni leʋesu kòbaʋɛ, gè la ɠɛni kaa,naa ʋolu, a la maaɠooza, gè la ɠɛni loa ga ná. 12 Nii a so ga zɛbɛi, ɓɛ ɠa a kula zea?Ɓɛ ɠa a zoo é ɠɛ ma:‹Leeni ɠa è kɛɛzu?› 13 GALA ge la ná-ziiɠaawanai zuzoga.Ziɛ wu zua ɲɔiti Laɠaɓe ta polu ani ɓulugi, ta yɛ laani kɔɠɔwu. 14 «Nɔ̀un nà zoo gè gooɠaaʋote ɠale?Wooi ɓɛgeleni ka nà yiimazeɠe ga tiye, gè ʋa ti wo ma? 15 Anɛɛ ni gaamai ɠa zèa, gè la zooga gè ʋa gooɠaaʋote nɔpɛ fe.Kɛni nɔ gè maawɔinɠai ɠaiziɛ nà-tukpɔɠaaleʋe nui ya. 16 Anɛɛ ni nà wooɠulana ma, é gòoɠaaʋote,anɛɛ naa ʋe, gè la zooga gè ʋa la da ga toɠa gòomɛnisu. 17 É tèʋegɛ fiilɛ wolai zu,É màawanazuʋɛ mɔin, un ge la ba. 18 É la vaazu bu, gè ʋa yɛnvu laaɠula.Toɠa dɛ nɔ zìimaʋɛ laavesu ga ani wanai. 19 Ni nà lona daawu, ná-zɛbɛi wɔɔlɔʋɛ.Nà ɠɛɛna gè ɓɔɠɔ maalobo?Ɓɛ ɠa a toli tukpɔɠaaleʋezuʋɛ? 20 Anɛɛ ni gaamai ɠa zèa, toɠa pèelala,gè kpɔɛ nɔpɛ suɠula ʋa, toɠa pèelala anɛɛ ni nà ga sɔbalala nu. 21 Tama, nà ga sɔbalala nu! Kɛlɛ gè la yiizoolɛzu ga ɓɔɠɔ,zɛnvui wɔinzeɠea mà. 22 Ti pɛ ta ga faa ɠila nɔ nɔ̀un bɛ, naa ɠa é ba, nà zoo gè ɠɛ ma:‹GALA ka ɗa sɔbalala nui ɠoloɠolo, ta nu ɲɔi ɓalaa.› 23 Siɛgi zu faaɓaagi ʋaazu la, é sɔbalala nui ʋaa nɔ kpe,GALA ka ɗa ɲɛɛɠula sɔbalala nuiti ta-ʋoluɠulaiti su. 24 Siɛgi zu zooi lɔɔzu la nu ɲɔiti ta-zobogi zu,toɠa ɗa tukpɔɠaaleʋe nuiti gaazuɠole.Mazɔlɔɔ ni tɔ laade, ɓɛ ɠili ka a naa ɠɛ? 25 «Nà-foloiti ti leʋega fala, eɠɛ kpizɛ wo nui,ti ʋela, ti la undaanɛɛi zɔlɔɔni. 26 Ti leʋe gaamanɔ eɠɛ tɛmu ɓatoi,eɠɛ koɠɛi é yeizu, é zeɠe geezuʋɛ, é loo ná-daamianigi ma. 27 Nà ɠɛna ma: ‹Kɛni gè yeema nà-ziizoolɛiti ma,gè ɠaazuʋɛ valibo, gè tɔɔzei ga ɲɛɛi woga,› 28 màa ɠa ɓalizu nà-kpɔlɔiti kpein faa zu,mazɔlɔɔ è la sòga ga nui sɔ ge la ba. 29 Nà la leve ga sɔba nu!Leeni vaa zu gè ɓɔɠɔ ɓɔlɔzu wafuun? 30 Anɛɛ ni nà màagbazu ga kɔɔlɛ vukɔi ma ɗɛi,gè zèeiti gaagba ga tɔbɔgi, 31 ɗa dɔ̀ palaʋalai zu gaamanɔ,gè ɲɔu nà-seɠeiti gaazu. 32 «Mazɔlɔɔ é la ga nuɓusɛ ga kɛ̀ʋele nii nà zoo gooɠaaʋotesu,ɓaa gi ʋa ɠomi tukpɔɠaaleʋezuʋɛ. 33 Ni nu ɠɛni gi felegɔ yɔɠɔzu ga zaamazunui,nii a zoo é dɔɔzɔɠɔzui wo, 34 GALA ge ná-tukpɔi zeɠe màazu,ná-maalua vaiti ti ɓe, ti mina mɔ kpɔ̀lɔ, 35 nà zoo gè ɓɔɛ pɔ, gè la lua ba.Kɛlɛ kɛɛɠeleɠele ge la ná, nà ɠila nɔ ɠa gè ɓɔɠɔ ʋa.»

Job 9 (TOMA)

In Other Versions