Joshua 5 (TOMA)

1 Amool nuiti ta-masagiti kpein ti zeini Zuludɛn folo liizu ʋelei, ta Kanaan masagiti ti zeini Kpoloɗɛ Wolai laaʋɛ, ti mɛnini ga Ɠɔoɠɔ GALAGI Zuludɛn vɔɔni su Izilayɛle nuiti tuɠɔ, eyɛsu ti leʋe. Ti iɲɔ ge leʋeni, nu nɔpɛ zii la ɠɛni lɔɔni, é ʋa lo Izilayɛle nuiti tuɠɔ. 2 Naama ziɛgi zu nɔ, Ɠɔoɠɔ GALAGI ɠɛni Zozuwe ma: «Kɔtuiti kpɛtɛ ga boɠai, é tatipɛlɛʋolu vai lɔɔzei ʋolu Izilayɛle nu niinɛi niiti ta-vaa zu.» 3 Zozuwe kɔtuiti kpɛtɛni ga boɠai, é Izilayɛle nuiti tatini pɛlɛʋolu gizei ɠobaʋɛ, Alalɔte (nii poluʋɛ ga «tatipɛlɛʋolui»). 4 Pɛtɛ, lee vaa zu Zozuwe ti latini pɛlɛʋolu: Zunui nii kpein ná-konagi zeelini kɔɔɠɔ vai ma, ti ɠulani Ezipete yooi zu, naati pɛ ti zaani pelei zu, teʋebai zu, ti ɠulaai ma Ezipete yooi ʋa. 5 Ti pɛ ti latini pɛlɛʋolu. Kɛlɛ zunu loin kpein é zɔlɔɔni pelei zu, teʋebai ɓudɛ ziɛgi zu, ti ɠulaai ma Ezipete yooi ʋa, nu la ɠɛni naa tanɔpɛ tatini pɛlɛʋolu. 6 Izilayɛle nuiti ti yɛni ziɛzu teʋebai zu, é ɠɛ ga kona ʋuunaanigɔ (40), eyɛsu zunuiti, ma ɠɛɠalamaiti, niiti ti zeelini kɔɔɠɔ vai ma, ti ɠulazuʋɛ Ezipete yooi ʋa, naati ti za. Tɔɔzei ti la ɠɛni Ɠɔoɠɔ GALAGI wooi zoni. Ɠɔoɠɔ GALAGI ɠonani ga é la ti yɛga ná, ti ʋa zooi naa ɠa ga ɠaazu, nii é minazeɠeni, é ɠona ná-faa zu ti-mɛmɛwolani bɛ, ga é fe ade ʋɛ, ʋɛ nɔnɔi ta kɔin gulɔi ʋooʋaai ná. 7 Ti-loun zunuiti ka é ti zeini ti-ʋotogi zu. Zozuwe ti latini pɛlɛʋolu, tɔɔzei ti la ɠɛni dɛ latini pɛlɛʋolu, ta-ziɛ wo siɛgi zu teʋebai zu. 8 Siɛgi zu ti zunuiti pɛ tatini da pɛlɛʋolu, ti yɛni ada ɠilagi, ti-ʋuuzuʋɛ, eyɛsu ti ɠɛdɛ. 9 Naa ʋoluma, Ɠɔoɠɔ GALAGI ɠɛni Zozuwe ma: «Za, gè Ezipete unfegi zeɠea wo ɠaazu.»Naa ɠa é ba, adaʋɛ ná laaseigi ʋɛɛni ga Gilegale. Daaseigi naa ɠa é ba zaaɠaza. 10 Siɛgi zu Izilayɛle nuiti ti ɠɛni ʋuuni la Gilegale, ti Pake fɛtii ɠulani alugi ma volo puugɔ maazu naanisiɛi (14) ma ɓɔkɔi, Zeliko nɛmɛi zu. 11 Poluma voloi nɔ, ti zooi ʋaalɔnɔgi ta miini, ɓului nii lɛʋɛ la su, ta ani ɠae ɠeegai. 12 Poluma voloi nɔ ɠa manegi ɓeteʋeni la ʋuu vai ʋa, tɔɔzei ti ɠɛni zoosu ti ɠɔnɔ sɔlɔɔ ga zooi zu ziinziin ganigiti ma waaiti. Mane ge la mɔ ɠɛni ná Izilayɛle nuiti bɛ, ti ɠɛni niina Kanaan yooi zu ziinziin ganigiti miizu naama ɠonagi. 13 Foloi ta, Zozuwe ɠɛni Zeliko ɠobaʋɛ, é ɠaazuwuzeɠeni, é zunui ta ɠa, é loni kakalaʋɛ, ná-boɠa zɔkpɔi ɠulaai maalaɠagi zu, é zoni zea. Zozuwe maaɓuɠani ba, é gaazaɠa, é ɠɛ ma: «Ɗa ga gá-nui ta, ɓaa gi zili nuiti ti ta?» 14 Zunui gooɠaaʋoteni, é ɠɛ ma: «Ɓa-o. Nà ga Ɠɔoɠɔ GALAGI ná-kɔɔ ɠundiɠii, unkula ʋele ɠa gè su.»Zozuwe nɔkɔni, é unpilɛ zooi ma, é ɠɛ ma: «Màliɠii, nà ga ɗa-wotiɠɛ nui, ɗa-levei ɠa ga ɓɛgeleni?» 15 Ɠɔoɠɔ GALAGI ná-kɔɔ ɠundiɠii gooɠaaʋoteni, é ɠɛ ma: «Ɗa-zaʋalagiti kula ɠɔɠɔa, mazɔlɔɔ adaʋɛ è loni ná, naa ɲadegɛ.» Zozuwe gooi zoni, é kɛ ɠana.

Joshua 5 (TOMA)

In Other Versions