Leviticus 20 (TOMA)

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɠɛ Izilayɛle nuiti ma: Nu-o-nu é ɠɛni Izilayɛle nuiti saama, ɓaa seikɔɠɔma nu, nii a ná-doin ta ɠulana ga zalaɠa salei ʋɛ, daa ga Mɔlɔke, ta naama nui ʋaa. Zooi zu nuɓusɛiti ta sɔ ga kɔtui, é za. 3 Nɔ̀un nà ʋoluave naama nui ʋa, gè kpeteʋe ná-nuɓusɛiti ba, tɔɔzei ba é ná-doin ta leʋegɛ salei Mɔlɔke ʋɔ, é sèizu ɲadegai ɠɔzɔʋɛ, é dàasei ɲadegai ɠoloɠolo. 4 Ni Izilayɛle nuiti ta gilina ba, ti ɠaazuʋɛɛ ma naama nui letegi, nii é ná-doin ta leʋegai salei Mɔlɔke ʋɔ, ni ti la paani, 5 nɔ̀un, nà ʋoluave ma nui ʋa, ta ná-pɛlɛyeɠei, nà kpeteʋe ná-nuɓusɛiti ba, é ʋɛɛ naati kpein ba, niiti ti kɔɔɠɔ gani kɔɔ vai ɠɛɛzu, eɠɛʋelei é kɛɛzu la salei Mɔlɔke ʋɛ. 6 «Ni nui ta a liina, é gɔvɛ laawooleʋe nuiti gaazaɠa, ɓaa niiti gɔvɛiti ti ʋelela ʋele vaiti bosu ti ma, nii é ga kɔɔɠɔ gani kɔɔ vai ma zii, nà ʋoluave naama nui ʋa, gè kpeteʋe ná-nuɓusɛiti ba. 7 À ɓɔɠɔ ɲade, wa ɲade, mazɔlɔɔ nà ga Ɠɔoɠɔ GALAGI, wa-ƓALAGI. 8 À nà-deveiti makɛ, wo ziɛ ga tiye. Nà ga Ɠɔoɠɔ GALAGI, nii é wo ɲadesu. 9 «Zɔi nɔpɛ é kɛɛɠɛ ɓaa dee ɠotozu, ta naama nui ʋaa, tɔɔzei é kɛɛɠɛ ɓaa dee ɠotoa, ma ɲamai ɠa la tɔ ɓɔɠɔ unma. 10 «Siɛgi zu zunui ta a wɛɛnziɛ bona la ga seiɲɔɠɔi ta anza, wa wɛɛnziɛ nuiti felegɔ pɛ paa. 11 «Ni zunui ta a laana ga kɛɛɠɛ anzai, é kɛɛɠɛ ɠaazu unfe seɠea, wa naama zunui ta naama anzanuiti paa. Ti-ma ɲamai ɠa la ti unma. 12 Ni zunui ta a laana ga ná-doun anzai, wa ti felegɔi pɛ paa. Ti unfetala vai ɠɛa, ti-ma ɲamai ɠa la ti unma. 13 «Ni zunui ta a laana ga zunui ta, ti kɔzɔba vai ɠɛa, wa ti ʋaa. Ti-ma ɲamai ɠa la ti unma. 14 «Ni zunui ta a anzanui ta dee zeɠena, é ti felegɔ zei ga anza, naa ɠa ga faa ɲɔu wola. Ta ti saʋagɔ ɠala, naa ɠa a kɛ faa ɲɔu wolai naa mina yɛ wo zaama. 15 «Ni zunui ta a laana ga suai, wa zunui naa ʋaa, wo suai ɓalaa paa. 16 Ni anzanui ta a maaɓuɠana suai ta ʋa, é la koba, wa anzanui ʋaa, wo suai ʋaa. Ta ti pɛ paa, ti-ma ɲamai ɠa la ti unma. 17 «Ni zunui ta a ná-seelai zeina ga anza, kɛɛɠɛ ná-doun anzanui, ɓaa dee ná-doun anzanui, é naa unfega, ta é ɓɔɠɔ unfega. Unfetala vaa wola ɠana, ti ɓe ka leʋe ta-nuɓusɛiti ba, naa ɠa ɠɛ ta-nuiti pɛ gaazu. Zunui naa é ná-seelai unfegai, ná-faaɠaaza golai ma ɠasɔi ɠa la unma. 18 «Ni zunui ta a laana ga anzanui ta, é ná-alugi ɠaai, ti felegɔ pɛ ti ɓe ka leʋe ta-nuɓusɛiti ba, mazɔlɔɔ ti ná-alugi ma ɲamai ɠaa. 19 «À mina la ga wo-lee diɛ ɓaa deɠe anzanui ta, ɓaa wo-ɠɛɛ ná-seelai ta. Ni zunui ta a laana ga ná-nu ɠiteɠitegi ta, ta-vaaɠaaza golai ma ɠasɔi ɠa la ti unma. 20 «Zunui ta a laana ga kɛɛɠɛ diɛ ɓaa deɠe zunui ta anza, é zunui naa ɠaazu unfe seɠea. Ti felegɔ ta ta-ɠotoi ma ɠasɔi zeɠe, ta za ɠana nɔ, ti la doun zɔlɔɔga. 21 «Ni zunui ta a kɛɛloin anzai zeina, kɔzɔba vaa ɠana, é kɛɛɠɛloin unfega, ti la doun zɔlɔɔga. 22 «Wa makɛ nà-deveiti ma, ta nà-tɔgiti, wo ti zo kpaan, naa ɠa a kɛ zooi ʋɛ gè ʋaazu liizu ga woye ná, ga wo zei ná, é la unpiliga ga woye. 23 À mina ziɛ ga zii naati ta-luʋai, niiti gè ʋaazu ti ɓɛɛzu wo luɠɔ, mazɔlɔɔ ti naama ɠɛɛwotiiti kpein kɛɛʋɛ, naa ʋɛlɛzeɠe bɛ̀. 24 Gè boga wo ma: Wa ɠa wo ta-yooi zɔlɔɔsu, nà feezu wo ʋɛ ga wɔnɔ, zooi ʋe, ʋɛ nɔnɔi ta kɔin gulɔi ʋooʋaai ná. Nà ga Ɠɔoɠɔ GALAGI, wa-ƓALAGI, nii é wo yeeɠaaɠwɛa, wa zɔɔma ziiti. 25 Wa zɔɠɔzu ɠɛ kɔzɔba zuaiti ta sua ɲadegaiti ba, ta kɔzɔba wɔniiti ta wɔni ɲadegaiti ba, naa ɠa a kɛ wo mina ɓɔɠɔ ɠɛ ga kɔzɔba ʋea, ga suaiti, ɓaa wɔniiti, ɓaa ga naati kpein, niiti ti ɓokposu zooi ma. Gè ti yeeɠaaɠwɛa, ta suai zɔiti, nii a kɛ wo kwɛɛ ga ti ɠɔzɔʋɛ. 26 «À ɲade nɔ̀un bɛ, mazɔlɔɔ ɲàdegɛ, nɔ̀un nà, Ɠɔoɠɔ GALAGI, gè wo yeeɠaaɠwɛɛʋɛ wa zɔɔma ziiti, naa ɠa a kɛ, wo ɠɛ ga nɔ̀nɔiti. 27 «Zunui ɓaa anzanui nii é ga gɔvɛ laawooleʋe nui, ɓaa nii gɔvɛiti ti ʋelela ʋele vaiti bosu ma, wa sɔ ga kɔtui, é za. Ma ɲamai ɠa la unma.»

Leviticus 20 (TOMA)

In Other Versions