Nehemiah 5 (TOMA)

1 Yeeta nuɓusɛiti saama, zunui tanigaa é ʋɛɛ ti-anzaiti ba ti tɔɔzeini ga ti ɗa ɓalakpala ga ti-ɠɛɛloin Zuifuiti daalɔɠɔ. 2 Tanigaa ti ɗa ɠɛ ma: «Gá gi-loun zunuiti ta gi-loun anzanuiti gi mɔinʋɛ, wɔin ɠɛa gi ma ga gi molo zɔlɔɔ, gi mi, nii a kɛ gi yɛ vulua.» 3 Taɠiligaa ti ɗa ɠɛ ma: «Kɛni gi gá-ɓalagiti, ta gá-leezɛn ɓeleiti, ta gá-ʋɛlɛiti sei ga kpɔunmai, nii a kɛ gi molo zɔlɔɔ pulu ziɛgi zu.» 4 Zɔiti ti ɗa ɠɛ ma: «Gi gá-ɓalagiti ta leezɛn ɓeleiti maaɠuye zogɛ ga walii, gi ʋa mului zala masagi ma. 5 Tama gá ga zii ɠilagiti nɔ ga gi-ɠɛɛlointi, zeeɠaaɠwɛɛzu lɛi é ʋa ɠɛ gi-loun zunuiti, gi-loun anzanuiti, ta tɔnɔiti zɔɠɔzu. Kɛlɛ kɛɛɠeleɠele nɔpɛ ge la ná, kɛni gi gi-lointi dɔ duɔlai zu, gi-loun anzanuiti tanigaa ta vɔlɔ niina ga duɔiti, gi la zooga faa ɠili nɔpɛ kɛɛzu, mazɔlɔɔ gá-ɓalagiti ta gá-leezɛn ɓeleiti pɛ ta gi-maaɠuye nuiti zea.» 6 Gè naama ɓɔɛiti ta kpaazaɠa wooi naati mɛnigai ma, zìiɠaawanani gola. 7 Gè deveni ga gè zelii lo nu wolaiti ta kundiɠiiti ma, gè ɠɛ ti ma: «Kasɔ wola ɠa wo daazu wo-ɠɛɛlointi unma, ga wo ɗa talama ɠuyei ʋɛɛ ti ma.» Gè gaalɛba wola maalolini ta-vaa zu. 8 Gè ɠɛni ti ma: «Gi-ɠɛɛloin Zuifui niiti ti ɠɛa ɓɔɠɔ ʋɔdini zii ɠiligiti ma ga duɔi, gi ti unmɔɔgɛ ga zobogi nii é ɠɛa gi ʋɛ. Wɔun, wa ga wo-ɠɛɛlointi pɔdi ɓɔɠɔ nɔ ma!» Ti la ɠɛni zooni ti ʋa gooɠaaʋote fe, ti maaɠɛni kpɔ. 9 Gè ɠɛni ti ma ʋolu: «Nii wo kɛɛzu ɠani, é la ʋani. Wo maa la nɛɛni ɓaa wo ʋa ɠolo ada-ƓALAGI ʋɛ, nii a kɛ zii ɠiligi zɔiti, ti ga ade zili nuiti, ti mina ɲɛɛɠula ade zu? 10 Nà ɓɔɠɔi ɓalaa gá kɛ̀ɛlointi ta nà-botiɠɛ nuiti, gi kuyei ʋɛɛʋɛ ti ma ga walii ta moloi. Ade kuyei naati suvaayɛ ti ʋɛ. 11 Za, nui niiti kpein wa-ɠuye ti ma, à ta-ɓalagiti ta ta-leezɛn ɓeleiti fe ti ya, naa ʋɛɛ ta-wolive wuluiti ta ta-ʋɛlɛiti ba, naa ʋoluma nii kpein wo pɛai ti ma ga kuye, é ɠɛni ga wali, ɓaa molo, ɓaa dɔɔi, ɓaa gulɔi, à ti pɛ maalamaiti suvaayɛ.» 12 Ti gòoɠaaʋoteni, ti ɠɛ mà: «Nii è boga, gá naa ɠɛɛzu, gi naa kpein fe ti ya, niiti gi ɠɛa ti zeɠeni, ta gi la mɔ ani nɔpɛ maaloliga ti ma.» Gè zalaɠa ɠula nuiti tolini naazu, ti ɠona naati gàazu ga nii ti boga, ti la zeɠea polu. 13 Naa ʋoluma gè nà-seɠei ma yiivɛi zoni, gè suɓukpunɛ, gè ɠɛ ti ma: «Nu-o-nu é la kɛɛni, é ʋa ná-minazeɠegi laazeeli, GALA ge naama nui ɓukpunɛ ɠani, maaɠooza ná-pɛlɛi ta kɔligiti ba, zeaɲakai yɛ faan!» Nuɓusɛiti pɛ ti ɠɛni ma: «Amina-o!» Ti pɛ ti Ɠɔoɠɔ GALAGI maamusɛni, naa ʋoluma ti ta-minazeɠegi laazeelini. 14 Kaipa masagi nɔ̀un seini ga Zuda you zɛʋɛ ɠundiɠii, ná-konagi ʋuufelesiɛi (20) ma é zeeli puusaʋa maazu velesiɛi (32) ma masa fai zu, nɛi gè ga kundiɠii, kɛ̀ɛlointi-yo, gi la ɠɛni mului maalolini, nii maanɛai ga é ve gi ya. 15 Zɔiti ti ɠɛni ná tùɠɔ, naati ti ɠɛni nuɓusɛiti gola ɓɔlɔzu, ti ɗa ɠɔnɔgi ta dɔɔi ɠula ti ya, naa la ʋɛɛni wali ɠae ʋuunaanigɔ (40) ʋa ti ɠɛni kulazu nu ɠilagilagi ya. Ta-wotiɠɛ nuiti ɓalaa ti zeini nuɓusɛiti ga. Kɛlɛ nɔ̀un kaipa gè la naa ta ɠɛɛni, mazɔlɔɔ gè ɠɛni luazu GALA gaazu ʋa. 16 Kɛlɛ nà ɓɔɠɔgoi gè ɠɛni botii ɠɛɛzu siɠigi losuʋɛ, gè la ɠɛni soni tòsuʋɛ ma, gè ʋa nu nɔpɛ ná-kpala geya. Nà-botiɠɛ nuiti ɓalaa niiti ti ɠɛni bà boti ɠɛɛzuʋɛ, ti la ɠɛni naa ɠɛɠala vai ta ɠɛɛni. 17 Zɔiti gè ɠɛni ti ɠɔnɔkulazu, ti ɠɛni ga nu ungila nu ʋuulɔɔlugɔ (150) Zuifuiti ta kundiɠiiti saama, naa la ʋɛɛni naati ba, ti ɠɛni ʋaazu gi ʋɔ, ti zeɠe gi ɠoba yooiti su. 18 Folo-o-folo nii ti ɠɛni paazu nà-pɛlɛi wu ga gi ɠɔnɔgi, naa ɠɛni ɠɛɛzu ga: nikɛ ɠila, baala pagɔ lɔzita, wɔniiti, naa ʋoluma folo puugɔi leʋeda ɠilagila, ti ɓena dɔɔi ɓɛtɛ bɛ̀ ga mɔinɗa. Kɛlɛ anɛɛ naa ʋe, gè la ɠɛni naa maalolini, nii a ɗa ve zou zɛʋɛ ɠundiɠiiti zea, mazɔlɔɔ siɠigi lo fai mu ge ɠɛni ga kasɔ wola nuɓusɛiti unma. 19 Ee, nà-GALAGI, ɠizɛ naama vai kpein su, nii gè kɛa niima nuɓusɛiti bɛ, è undaanɛ ɠɛ bɛ̀.

Nehemiah 5 (TOMA)

In Other Versions