Numbers 13 (TOMA)
1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Zunuiti teʋe, ti Kanaan yooi zuʋɛtɛ, gè feezu Izilayɛle nuiti bɛ. Yeelo nu ɠila ba, bolodai ɠilagilagi zu, seɠeai kundiɠiiti saama.» 3 Moize Ɠɔoɠɔ GALAGI wooi zoni, é zunuiti teʋeni, ti zeɠe Palan teʋebai zu. Izilayɛle nuiti ta-ɠundiɠiiti ti ɠɛni ga tiye. 4 Ti-laaseigiti ti ɠɛni ga:Luɓɛn ná-bolodai nɔnɔi ɠɛni ga: Samua, Zakuul ná-doun zunui. 5 Simiyɔn ná-bolodai nɔnɔi ɠɛni ga: Safate, Woli ná-doun zunui. 6 Zuda ná-bolodai nɔnɔi ɠɛni ga: Kalɛɓe, Yefuné ná-doun zunui. 7 Isakaal ná-bolodai nɔnɔi ɠɛni ga: Yigale, Zozɛfe ná-doun zunui. 8 Efelayime ná-bolodai nɔnɔi ɠɛni ga: Wozé, Nun ná-doun zunui. 9 Ɓɛnzamɛn ná-bolodai nɔnɔi ɠɛni ga: Palati, Lafu ná-doun zunui. 10 Zaɓulɔn ná-bolodai nɔnɔi ɠɛni ga: Gadiyɛle, Sodi ná-doun zunui. 11 Zozɛfe ná-bolodai nii é ga Manasé nɔnɔi, naa ɠɛni ga: Gadi, Susi ná-doun zunui. 12 Dan ná-bolodai nɔnɔi ɠɛni ga: Amiyɛle, Gemali ná-doun zunui. 13 Asɛɛl ná-bolodai nɔnɔi ɠɛni ga: Setuul, Mikayɛle ná-doun zunui. 14 Nɛfɛtali ná-bolodai nɔnɔi ɠɛni ga: Naaɓi, Vɔfesi ná-doun zunui. 15 Gade ná-bolodai nɔnɔi ɠɛni ga: Geyuwɛle, Maki ná-doun zunui. 16 Zunuiti daaseigiti kana, niiti Moize ti leʋeni ga ti Kanaan yooi zuʋɛtɛ. Moize Nun ná-doun zunui Wozé laasei pɛɛni ga Zozuwe. 17 Moize ti leʋegai ma ga ti Kanaan yooi zuʋɛtɛ, é ɠɛni ti ma: «À leʋe ga lɛkpɛmaʋɛ nu yeezazuʋɛ yooi zu ʋele, wo zeeli gize yooi ʋɔ pelei, 18 wo ɠida zooi ná-fai wu. Wo ka ʋelei é la, ta nuiti ti zeini ná, wo ti ʋɛtɛ ni ti zulogɛ, ɓaa ni zɛbɛ la ti ya, ni ti mɔinʋɛ, ɓaa ni ti la mɔinni. 19 Wo zooi ʋɛtɛ, ʋɛ ti zeini ná, ni pagɛ, ɓaa ni ɲɔuʋɛ, ta-laa wolaiti ta ɠale, ni siɠigi ɠa ti ma, ɓaa ni é la ti ma, 20 ani ɓɛtɛ you ʋe, ɓaa ani la ɓɛtɛa ga, gulua ta ga, ɓaa ti la ná? À yiilɔɔ! À zooi zu wulu waai tanigaa zeɠe.»É ɠɛni ga leezɛn waa mɔungi ma yeeɠɛɠalai. 21 Zunui naati ti liini, ti zooi zuʋɛtɛ, é tɔɔzei Sin teʋebai zu eyɛsu Leɠɔɓe, Leɓo-Ɠamate ɠobaʋɛ. 22 Ti lɛɛni lɛkpɛmaʋɛ nu yeezazuʋɛ yooi zu, ti zeeli Eɓelɔn. Ayiman ta Sesayi ta Talamayi nuiti ti zeini ná, Anake mavofodaiti. Eɓelɔn laai loni, é kɛ ga kona dɔfela aisa Soan ʋa lo, nii é Ezipete yooi zu. 23 Ti zeeliai ma Esekɔle nɛmɛi zu, ti leezɛn ansaɠɔgi ma ɓeke gila teʋeni ba, nii leezɛn ɠɔpɔgi ɠɛni zɛlɛni ba. Bui ʋelei ma, ti dɔɔni gului ɠa, nu felegɔ da ɠɔma, ti seɠe. Ti gelenade wului ma waaiti seɠeni ɓalaa, ta kooleɠoolegiti. 24 Ti naama adaʋɛ laasei pɛɛni ga Esekɔle nɛmɛi (nii poluʋɛ ga «anii ɠɔpɔgi ma nɛmɛi»), tɔɔzei leezɛn ɠɔpɔgi ʋa, Izilayɛle nuiti ti teʋeni ná. 25 Ti ɠaleni ma, ti zeɠe zooi ʋɛtɛsuʋɛ, folo ʋuunaanigɔ (40) ɠa ti kɛɛni. 26 Ti ʋaani, ti Moize ɠa, ta Aalɔn, ta Izilayɛle ʋɛbɛi kpein, Palan teʋebai zu Kadɛse. Ti ʋoluvaawo ti ma ga nii kpein ti kaani, ti zooi zu wulu waaiti dɛɛ ga tiye. 27 Wɛlɛ poluvaawo gooi ʋa, ti boni Moize ma: «Gi zeelini zooi naa zu, ʋɛ è gi leʋeni ná. Gaamazu, zou ʋe, ʋɛ nɔnɔi ta kɔin gulɔi ʋooʋaai ná, naa wulu waaiti pɛtɛ. 28 Kɛlɛ-o, nuiti ti zeini ná, ti wola zuɓaaʋɛ. Taaiti bɔɔlɔʋɛ, siɠigi ti ma. Gi Anake mavofodaiti ɓalaa pɛtɛgɛ ná. 29 Amalɛke nuiti ta zeini nu yeezazu ʋelei. Ɠɛte nuiti, ta Yeɓuse nuiti, ta Amool nuiti ta zeini gize yooi zu. Kanaan nuiti ta zeini Kpoloɗɛ Wolai laaʋɛ, ta Zuludɛn nɛmɛi zu.» 30 Názu ɠa Kalɛɓe ɠaaɓaani la ga é nuɓusɛiti gaaɓɛ, niiti ti tɔɔzeini niina ga wuzeɠea Moize laalɔɠɔma. É ɠɛni ti ma: «Ade li ná! Ada vɔni zooi ma, de seɠe. Mazɔlɔɔ ma ɠaaɓaai ɠa ade ya.» 31 Kɛlɛ zunuiti ti ɠɛni ga ná-siɛpoluiti, naati ti ɠɛni ɠɛɛzu ma: «Ma zobo ge la ade ʋɛ, de ʋa laalɛ nuuma nuɓusɛiti bu, mazɔlɔɔ ti zuɓaaʋɛ de ʋa.» 32 Ti tɔɔzeini Izilayɛle nuiti gaazu ga zooi naa ná-fai zuvalaga, nii ti liini ti ka, ti ɠɛni ma: «Zooi nii gi suɓizaai, gi suʋɛtɛ, toɠa ga zooi nii é naati paazu, niiti ti ʋaazu, ti zei ga. Nuiti kpein gi ti ɠaai ná, ta ga nu ɠoozagiti. 33 Gi kooza nuiti kaaʋɛ ná ɓalaa, Anake mavofodaiti, nu ɠoozagiti ma zuwuzui. Gi ɠɛa ti ɠoba, é ɠɛ gi ɠaazu, eɠɛ gá ɠɛ ga kotogiti nɔ, tiya ɓalaa, ti ɠaazu, gi ɠɛni eɠɛ kotogaa nɔ!»