Numbers 27 (TOMA)

1 Anzanu loun lɔɔlugɔ ɠɛni ná, ti-laaseigi ga: Maala, Noa, Wogela, Milika, ta Tiilesa. Ti-ɠɛɛ laaseigi ɠɛni ga Selofeɠade, Ɠefɛɛl ná-doun zunui, nii mɛmɛwolani ti ɠɛni ga Galaade, ta Makiil, ta Manasé, ta Zozɛfe. Anzanui naati ka ti ʋaani, 2 ti lo Moize ɠakala, ta Eleazaal, ta kundiɠiiti, ta bɛbɛi kpein, GALA daaɠomi seɠe ʋɛlɛi laaʋɛ, ti ɠɛ ma: 3 «Gi-ɠɛɛ zaaʋɛ teʋebai zu, kɛlɛ é la ɠɛni naati ta-ɓɔgi zu, niiti ti wuzeɠeni Ɠɔoɠɔ GALAGI laalɔɠɔma, Kolé ná-nu ɓulugiti, kɛlɛ é zaani ga kpɔɠɔ ɠotoi maaʋele, doun zunu la ɠɛni zea. 4 Leeni vaa zu gi-ɠɛɛ laaseigi a ɠula ná-bolodai zaama, tɔɔzei doun zunu ʋalagi maaʋele ma? Gi-ʋɔɔda ve, gi-ɠɛɛ kɛɛɠɛlointi saama.» 5 Moize liini ga ti-maavai Ɠɔoɠɔ GALAGI ɠakala. 6 Ɠɔoɠɔ GALAGI ɠɛni Moize ma: 7 «Gaamai ɠa Selofeɠade ná-doun anzanuiti ti bosu. Ɗa zooi ve ti ya, é ɠɛ ga tɔnɔi, ti-ɠɛɛ kɛɛɠɛlointi saama. Tiya ɠa ɗa ti-ɠɛɛ nɔnɔi leʋe ti ʋɔ. 8 Ɗa ɓɔɛ Izilayɛle nuiti pɔ, è ɠɛ ti ma: Siɛgi zu zunui ta zaazu la, é la doun zunu yɛni, wa ná-poganii ve ná-doun anzanui ya. 9 Ni doun anzanu la zea, wa ná-poganii ve kɛɛɠɛlointi zea. 10 Ni kɛɛɠɛlounɠa ti la bɛ, wa ná-poganii ve kɛɛɠɛ kɛɛɠɛlointi zea. 11 Ni kɛɛɠɛlounɠa ti la kɛɛɠɛ ʋɛ, wa ná-poganii leʋe ná-nu ɠiteɠitegi ta ʋɔ bolodai zu, naa ɠa a yɛ zea. Toɠa ɠɛ ga devei ta tɔgi Izilayɛle nuiti bɛ, eɠɛʋelei Ɠɔoɠɔ GALAGI ma levei veeni la Moize ya.» 12 Ɠɔoɠɔ GALAGI ɠɛni Moize ma: «Lɛ Aɓalime ɠizei nii ma, è wɛlɛ zooi ʋa, gè feezu Izilayɛle nuiti bɛ. 13 Ɗa wɛlɛzu ba, kɛlɛ ɗa ɓalaagi ɗa zaazu, è li è-mɛmɛwolani pɔ, ti zaai, eɠɛʋelei è-ɠɛɛloin Aalɔn zaani la, é li mɛmɛwolani pɔ ti zaai. 14 Mazɔlɔɔ wo ɠɛɛʋɛ ga kololala nuiti nà-devei laalɔɠɔma, Sin teʋebai zu, siɛgi zu bɛbɛi zu nuɓusɛiti ti maaɠaalii ɠɛɛni la, ti kpɔɛi ʋɛɛ bà. Wo la ɠɛni nà-ɲadedai maawuini nuɓusɛiti gaazu, é lo ziɛi vai ʋa, ti ɠɛni maalolisu.» (Naa ɠɛni ga Meliɓa ɗɛi ná-fai é ɠɛni Kadɛse, Sin teʋebai zu.) 15 Moize ɓɔɛni Ɠɔoɠɔ GALAGI ʋɔ, é ɠɛ ma: 16 «Ɠɔoɠɔ GALAGI é ga kpusɛi kpein ta-zɛnvuiti ta-ƓALAGI, ɗa ɓɔɠɔi yiimazeɠe ga nu, è sei bɛbɛi unda, é ɠɛ ga kundiɠii, 17 nui nii a ɠɛ losu ti untuɠɔ kɔɔɠɔzuʋɛti, é ɗa li ga tiye, é ɗa ʋa ga tiye, nii a kɛ Ɠɔoɠɔ GALAGI ná-nuɓusɛiti ti mina ɠɛ eɠɛʋelei baalagiti ti la, ti makɛ nu la ná.» 18 Ɠɔoɠɔ GALAGI ɠɛni Moize ma: «Nun ná-doun zunui Zozuwe zeɠe, zunu ʋe nii zɛnvui zeini su, ɗa yeela ma. 19 Ɗa lii la, è sei zalaɠa ɠula nui Eleazaal ɠakala, ta bɛbɛi kpein, è deveiti fe zea ti ɠaazu. 20 Ɗa ɗa-ɠundiɠilai ma zobogi ta ve zea, naa ɠa a kɛ Izilayɛle ʋɛbɛi ɠolo bɛ. 21 Toɠa zei zalaɠa ɠula nui Eleazaal ɠakala, naa ɠa ɗa gàazaɠa tɔun bɛ, ga anii nii daaseigi ga wuulimegi. Nii nɔpɛ a bona, ʋele ɠana Zozuwe ta Izilayɛle nuɓusɛiti ta ta-ɠɔɔɠɔ vaiti so da.» 22 Moize kɛɛni, eɠɛʋelei Ɠɔoɠɔ GALAGI ma levei veeni la zea. É Zozuwe zeini zalaɠa ɠula nui Eleazaal ɠakala, ta bɛbɛi kpein. 23 É yeeiti daani ma, é deveiti fe zea, eɠɛʋelei Ɠɔoɠɔ GALAGI boni la ma.

Numbers 27 (TOMA)

In Other Versions