Psalms 78 (TOMA)
1 Azafe ná-kidafaawui. Nà-nuɓusɛiti, à woilo nà-kala gooiti ma,wo ɠida dàawooiti bu! 2 Nà ɓɔɛzu faalaalii zu,gè kidafaawu vaiti dɛɛ, niiti ti leʋegai wɔlɔwɔlɔi. 3 Nii ade mɛnini, ade kwɛɛ,nii ade-ɠɛwolani ti boni ade ma, 4 ade la dɔɔɠua ade-lointi ba,ada bo naati kpein ma, niiti ti ʋilɛsu ade ʋolu,Ɠɔoɠɔ GALAGI ná-kɛɛwoti maayikia wolaiti,ná-zobogi ta ná-laavɔɔ vaa mɔinmɔingiti. 5 É devei veeni Zakɔɓe mavofodaiti zea,é tɔ feeni Izilayɛle nuiti zea,é ade-mɛmɛwolani deveni, ga ti ti-lointi kala da, 6 naa ɠa a kɛ, niiti ti wuzeɠezu,doungoiti ti ʋaazu zɔlɔɔsu, ti ɠala da,tiya ɓalaa ti ti-lointi kala da, 7 naa ɠa a kɛ, ti la GALA da,ti mina yeema kɛɛ vaiti ma,ti ná-deveiti so, ti ɗa ziɛ ga tiye, 8 ti mina ɠula ga ti-mɛmɛwolani,niiti tɔnɔ ma ziɛgi zu, ti ɠɛni ga kololala nuiti ti ɓakagai,yamanii zu nuiti ti ɠikpaai gola,ti-ɠigi la ga wooɠɛɠila nu GALA bɛ. 9 Efelayime ná-bolodama nuiti, kɔɔɠɔ zɔɔlai ɠɛni ti ya ga mɛɛin,ti ʋoluaveni kɔɔɠɔ voloi. 10 Ti la ɠɛni GALA ná-minazeɠegi zoni,ti ɠɛlɛni, ti la ziɛni ga ná-tɔgi. 11 Ti yeemani ná-faa wolaiti ma, é ti ɠɛɛni,ta ná-laavɔɔ vaa wolaiti é ti ɠɛɛni ti ɠaazu. 12 É maaɓɛlɛ vai ɠɛɛni ti-mɛmɛwolani gaazu,Ezipete yooi zu, Soan ɓalaɠai zu. 13 É kpoloɗɛi ʋalini su, é ti leʋeni,é ziɛi ɠaalɛɛni ba, é siɠi to. 14 É ɠɛni losu ti luɠɔ foloi ga tonaɓiingi,é lo ti luɠɔ kpidii ga abu zezei. 15 É fasaiti daaʋalini teʋebai zu,é ziɛ wolai ɠulani, ti ɓɔɔle la. 16 É ziɛ wolai ɠulani fasai ʋa,kɔtuɗɛi zuluni eɠɛ ziɛ wola. 17 Kɛlɛ ti ɠɛni nɔ kotoi ɠɛɛzu tɔun daalɔɠɔma,nii é Anii-Pɛ-Unda, ti wuzeɠeni naa laalɔɠɔma teʋebai zu. 18 Ti GALA suɠɔɠɔni ti-yiimaʋɛ,nii nɔ é ga ti yiima laamianigi, ti naa vali ma. 19 Ti ɓɔɛni GALA daalɔɠɔma, ti ɠɛ ma:«GALA ka zoo nɛi é daamiani fe gi ya teʋebai zu ɓaa? 20 Pele ɠana é fasai loɠani la, ziɛi ɠulani,kɔtuɗɛi zuluni, é vaza,toɠa zoo nɛi ɓalaa, é daamianigi ve gi ya ɓaa?Ɓaa é suai ve ná-nuɓusɛiti zea?» 21 Ɠɔoɠɔ GALAGI naama wooiti mɛnini, é yiiɠaawana,ná-ziiɠaawana abui soni ná-nuɓusɛiti daalɔɠɔma,ná-ziiɠaawanai vukani Izilayɛle laalɔɠɔma, 22 mazɔlɔɔ ti la ɠɛni laani GALA da,tɔɔzei ti la laani ná-kizo fai la. 23 É devei veeni tonaɓiingiti zea geezuʋɛ,é geeɠɔlɔgi ma ʋɛlɛlaʋɛti daalaoni, 24 é manegi ʋuuni ti ʋɛ ga ti-laamianigi,é geeɠɔlɔgi zu moloi veeni ti ya. 25 Ɛsɛ ge nɔnɔ miini nu wolaiti ta-ɓului zu,é daamianigi leʋeni ti ma, ti yiɠo. 26 GALA ge folo ɠulazu ʋele viilɛi yeini, é zeɠe geezuʋɛ,é ɓɔini lɛkpɛmaʋɛ nu yeezazu viilɛi la, é lokoleʋe. 27 É suai ʋuuni ti ma, é mɔin eɠɛ fufiligi,é wɔni ɓulugi ʋuuni, ti mɔin eɠɛʋelei kpoloɗɛiti koba ɲaɠaegi la. 28 É ti ʋuuni ti-zeizuʋɛ zaamaʋɛ,ti-zeizuʋɛ maaɠoolii zu. 29 Ti daamii woni, ti yiɠo ga pagɔ,nii wɔin ɠɛni ti ma, GALA ge ʋaani ga naa ti ʋɔ. 30 Kɛlɛ ti yiima vai laa la ɠɛni dɛ ɓeni ga zeeli,suai ɠɛni dɛ ti-laaʋɛ, 31 siɛgi zu GALA ná-ziiɠaawanai wuzeɠeni la ti laalɔɠɔma,é zeeɠaaɓa geleiti paani,é zunu loungoiti too bu Izilayɛle nuiti saama. 32 Anɛɛ naa ʋe, ti kotoi ɠɛɛni ʋolu mɔnɔ,ti la ɠɛni laani ná-laavɔɔ vaiti da. 33 Ta-eteai ɓeni eɠɛ fiilɛi,ta-eteai pɛ ge ɓeni maanɔɠɔi zu. 34 Siɛgi zu GALA ga la tanigaani paana la, ti ɓena gaiziɛ, ti ʋa pɔ,ti ɓena ɠale ma, ti GALA gaiziɛ gola. 35 Ti-ɠigi ɓena loo su ga GALA ka é ga ta-vasai,ga GALA nii é Anii-Pɛ-Unda, naa ɠa é ga ti unmɔɔ nui. 36 Kɛlɛ ti la ɠɛni ga sɔɓelama nu,nii ti ɠɛni bosu GALA ma, naa la ɠɛni ga gaamai. 37 Mazɔlɔɔ ti-yii la ɠɛni zɔleni tɔun bɛ,ti la ɠɛni ga wooɠɛɠila nua ná-minazeɠegi ʋɛ. 38 Anɛɛ naa ʋe, tɔun ná-maawɔinɠaa wolai zu,é ɠɛni ti zuvaayɛsu, a ʋa li ti-ma zuwu ɠaaleʋezu,siɛ mɔinmɔin su, é ɠɛni ná-ziiɠaawanai yɛsu ná,é la ɠɛni ná-ziiɠaawanai pɛ kulani kɛlɛma. 39 GALA ge ɠizɛni su ga ta ga nu vuluiti nɔ,fiilɛi nii é leʋesu, é la mɔ ʋa ʋolu. 40 Siɛ mɔinmɔin su, ti ɠɛni wuzeɠezu daalɔɠɔma teʋebai zu!Siɛ mɔinmɔin su, ti ɠɛni gaazuɠili vai ɠɛɛzu zou vɔɔi zu! 41 Ti tɔɔzeini mɔnɔ ga GALA suɠɔɠɔga,ti ɗa Izilayɛle ná-GALA Ɲadegai laazuɠɔli. 42 Ti yeemani naa ma, nii é kɛɛni ti ʋɛ:É ti unmɔɔni, é ti ɠula ti zili nui ya, 43 é laavɔɔ vaiti kɛɛni Ezipete yooi zu,é maaɓɛlɛ vaiti kɛ Soan yooi zu. 44 É ziɛungiti ta ziɛ wolaiti faliboni ga ɲamai,Ezipete nuiti ti la mɔ ɠɛni zoosu, ti ʋa ta ɓɔle. 45 É dɛgiti teʋeni ti ma, ti ɗa ti wo,ta zɔlɔgiti, naati ti ɗa faa zuɠoloɠologi ɠɛ zooi zu. 46 É ta-molo mɔɔiti feeni kpazinɛgiti zea,é ti-ɓɔlɔzuʋɛ ma lɔnɔgi ve kotogiti zea. 47 Sakɔtui ta-ɓeleiti koloɠoloni,ta-zikɔmɔɔl guluiti ti ɠoloɠoloni ga kɔɔlɛi. 48 É ta-loganiiti feeni sakɔtui ya,é ta-logani ɓulugiti fe geeɓadɛi ya. 49 É ná-ziiɠaawana wolai yeini ti ma,ta ná-ziimaleʋei, ta ná-ziiɠulagi, ta kidaaʋili fai,eɠɛ geezuɠeela ɓulugiti, ti ʋa ti ʋɔ ga maanɔɠɔi. 50 É pelei vieni ná-ziiɠaawanai luɠɔ,é la ɠɛni saai ɓudɛni ti maazu,kɛlɛ tɔun é ti lɔɔni ɗɔfɔ zeeɓɛi zu. 51 É doun zunu mɔungiti kpein paani Ezipete yooi zu,Same mavofodaiti ta-zeɠe ɠotaiti bu, ti-zuvikɛi ma mɔungiti. 52 É liini ga ná-nuɓusɛiti, eɠɛ togani go nɔ,é loni ti luɠɔ teʋebai zu, eɠɛʋelei baala makɛ nui a ɗa lo da ná-baala kpulugiti tuɠɔ. 53 É loni ti luɠɔ, é ɓaa ti maazu, ti la ɠɛni ɲiikpini,kpoloɗɛi ti zili nuiti maaɓɔleni. 54 É liini ga tiye ná-zou ɲadegai zu,gizei naa ma, nii é soni ga ná-zobogi. 55 É zii ɠiligiti kpɛɛni ti luɠɔ,é zooi ɠaaɠwɛ ti ɠilagilagi ʋa ga tɔnɔ,é Izilayɛle wolodamaiti seini Kanaan nuiti seizuʋɛ. 56 Kɛlɛ ti GALA suɠɔɠɔni, nii é Anii-Pɛ-Unda,ti wuzeɠeni daalɔɠɔma,ti la ɠɛni ná-deveiti soni. 57 Ti ɠakani ga ti-mɛmɛwolani kɛʋele, ti ɠɛ ga wooʋalada nuiti,ti ɠakani eɠɛ kilɛgi nii suɓiligai. 58 Ti Ɠɔoɠɔ GALAGI yiiɠaawanani,tɔɔzei ti ɠɛni zalaɠai ɠulazu zii ɠiligiti ta-zalaɠa ɠula adaʋɛti,ti ziiɠaawanani ga ta-vololibaiti, ta ta-ɠala kiligiti ti ɠɛni ti ya. 59 GALA ge miná ɠaai ma, ziiɠaawanani,Izilayɛle wɔinzeɠeni ma ga gola. 60 É ɠɛlɛni seizuʋɛ ʋa naa ga Silo,seɠe ʋɛlɛi nii é ɠɛni zeizu bu nuɓusɛiti saama. 61 Ná-minazeɠe kesui, nii é ga ná-zobogi ta ná-lɛbiyai, ma ʋoogi,é naa yɛni na, é lɔ zii ɠiligiti zeezu. 62 É yiiɠaawanani ná-nuɓusɛiti ma,é ná-nuiti zɛni saai laawu. 63 Abui zunu loungoiti galani,vulu ɠɛɛ wuye la mɔ ɠɛni loozu anzalopoiti bɛ. 64 Ti ná-zalaɠa ɠula nuiti undaaʋilini ga boɠa zɔkpɔi,poanzaiti ti la ɠɛni saa wɔlɔi wosu fɔɔn. 65 Kɛlɛ Maliɠii wuunni, eɠɛ zunui é ɠɛa ɲiizu,eɠɛ kɔɔɠɔ nu ɠɛzɛɠɛzɛgi nii dɔɔi gaazulɛai. 66 É ʋilɛni sili nuiti polu, é ti zuloɠa,nii a kɛ é zɔngɔi zɛlɛ ti ʋa eyɛsu ɠɔ. 67 É Zozɛfe ná-pɛlɛyeɠei likpini,é la ɠɛni yiimazeɠeni ga Efelayime mavofodai. 68 Kɛlɛ é yiimazeɠeni ga Zuda mavofodai,Siyɔn gizei, nii é nɛɛni bɛ. 69 Miná ɠa é seizu ɲadegai logai ná, é lo kpaan eɠɛ geeɠɔlɔgi ta zooi,niiti é ti ɓɛtɛai, ti ná eyɛsu ɠɔ. 70 É yiimazeɠeni ga ná-botiɠɛ nui Davide,é seɠeni, é kula ná-baalagiti makɛsuʋɛ. 71 É seɠeni baalagiti saama, é kɛ ga Izilayɛle makɛ nui,ná-nuɓusɛiti ti ga nɔnɔi. 72 Davide ɠɛni ga ti makɛ nui, nii sɔlegai,keleɠelegi ɠɛni zea, naa ɠa é loni la ti luɠɔ.