Psalms 89 (TOMA)

1 Ezela nui Etan ná-kidafaawui. 2 Nà Ɠɔoɠɔ GALAGI ná-nuɓɔɠɔlai maawuyezu,dàaʋɛ ɠa ɗa-wooɠɛɠiladai ɠula kɛlɛma yeeɠɛɠalaiti pɛ su nuiti bɛ. 3 Nà zoo gè bo, gè ɠɛ ma:«Ɗa-nuɓɔɠɔlai ɠa loni eyɛsu ɠɔ.È ɗa-wooɠɛɠiladai zeiʋɛ kpaan geeɠɔlɔgi zu.» 4 È boni, è ɠɛ ma: «Gè minazeɠegi woni nà-nui ʋɛ, gè yiimazeɠeai la,Davide ʋɛ, nii é ga nà-botiɠɛ nui, gè niima minazeɠegi woni ga: 5 ‹Nà yɛ è-mavofodai zeizu masadai zu eyɛsu ɠɔ, ɗa zeɠena ná,gè ɓaa ɗa-masa kpɔkpɔgi maazu, yeeɠɛɠalai pɛ su nuiti saama.› »Lo! 6 Geeɠɔlɔgiti su aniiti kpein ta ɗa-ɠɛɛwoti maayikiaiti dɛbizu, Ɠɔoɠɔ GALAGI!Ɗa-nu ɲadegaiti ta-maaɓɔgi ɠa ɗa-wooɠɛɠiladai maamusɛzu. 7 Ɓɛ ɠa é ga è ɠɛʋele, geeɠɔlɔgi zu, ee, Ɠɔoɠɔ GALAGI?Ɓɛ ɠa é ga è ɠɛʋele, geezu aniiti saama? 8 GALA maayikiʋɛ gola, nu ɲadegaiti ta-maaɓɔgi zu,maayikiʋɛ naati kpein gaazu, niiti ti maaɠoolii zu. 9 Ɠɔoɠɔ GALAGI, Fai-Pɛ-Maliɠii!Ɓɛ ɠa zobogi bɛ ga ɗɔun è ɠɛʋele, Ɠɔoɠɔ GALAGI?Ɗa-wooɠɛɠiladai è maaɠooliʋɛ. 10 Ungo, ɗa ɠila kpe ka ɗa ɗa kpoloɗɛi ná-wasogi ɠaayei.Siɛgi zu é wuzeɠezu la ɲiikpigi ma, ɗa ɠa ɗa ɗa gaayei. 11 Ɗa ɠa è ziɛ wu zua ɲɔi Laɠaɓe lɛɛvɛni, é za,è è zili nuiti suvazani ga ɗa-zɛbɛsu yeei. 12 Geeɠɔlɔgi ɠa ga ɗɔnɔ, zooi ɓalaagi ɠa ga ɗɔnɔ,ta eteai, é ɓɔ su aniiti kpein ba, ɗa ɠa è ti ɓɛtɛni. 13 Ɗa ɠa è lɛkpɛmaʋɛti kpɛtɛa, nu ɠɔʋɛzu ʋelei, ta nu yeezazu ʋelei,Taɓɔɔl gizei ta Ɠɛɛlɛmɔn gizei, ta wooɠula ga koozunɛɛi è-laaseigi ʋɛ. 14 È-yeei maaɠiliʋɛ ga zɛbɛi,è yeezuɓaaʋɛ,è-yeezai wuzeɠeʋɛ. 15 Ɗa-masa kpɔkpɔgi ma wuulaagi ɠa ga telebodai ta sɔledai.Wooɠɛɠiladai ta gaamai, ta ziɛzu è ɠakalaʋɛ. 16 Ee, undaanɛ nuɓusɛ ɠa ga naati, niiti ti zoogai è maamusɛzu!Ɠɔoɠɔ GALAGI, ta ziɛ ɗa-wozakalagi ɠa è ɠaazu. 17 Ta ɠoozunɛ yeenɔpɛ, tɔɔzei ɗa ga ta-ƓALAGI.Ɗa-lelebodai zaɓui zu ɠa ta wuzeɠe la. 18 Mazɔlɔɔ ɗa ɠa è ti-zɛbɛi ɠulazu kɛlɛma, é volo,è-zaalai zu ɠa gi pilɛ sɔlɔɔsu da. 19 Gi makɛ nui ɠa Ɠɔoɠɔ GALAGI yeezu,gá-masagi ɠa Izilayɛle ná-GALA Ɲadegai yeezu. 20 Mɔungi, è ɓɔɛni kulakɛlɛmai zu, è ɠɛ ɗa-wooɠɛɠila nuiti ma:«Gè kpɔba veeni kɔɔɠuluɓai taɠila bɛ,gè zunu loungoi ta wuzeɠeni nuɓusɛiti saama, 21 gè Davide ɠaani, gè ɠɛ é ɠɛ ga nà-botiɠɛ nui,gè nà-gulɔ ɲadegai ziɛni ma. 22 Nà yeeyɛ ba,nà iɲɔdɔ. 23 Sili nuiti ti la ɠula filiba eyɛsu pɛ,faa ɲɔu ɠɛ nui la zeiɗa unda. 24 Nà sili nuiti kpein dɛɛvɛ tuɠɔ,gè maayoseɠe nuiti koloɠolo. 25 Nà-wooɠɛɠiladai ta nà-nuɓɔɠɔlaiti ta ɠɛ tɔun ba,ná-zobogi zu ɠa wɔɔlɔ, dàaseigi ʋɔ. 26 Nà kpoloɗɛi lɔ zeezu, é zei unda,toɠa masadai ɠɛ ziɛ wolaiti unda. 27 Toɠa wooɠula mà, é ɠɛ mà:‹Ɗa ɠa è ga Kɛ̀ɛ, nà-GALAGI, nà-kizo fasai!› 28 Nɔ̀un nà, nà tɔun kɛ ga dòun zunu mɔungi,nii bɔɔlɔai é leʋe masagiti kpein ba eteai zu ná pɛ. 29 Nà nà-wooɠɛɠiladai makɛ bɛ eyɛsu ɠɔ,nà-minazeɠegi gè boni tɔun bɛ, naa la valiboga eyɛsu ɠɔ. 30 Nà mavofodai makɛ eyɛsu ɠɔ,ná-masa kpɔkpɔgi ɠa lɛbi, eɠɛ geeɠɔlɔgi. 31 «Ni tanisu mavofodaiti ta ɠɛlɛna nà-tɔgi ʋa,ti la ziɛni ga nà-deveiti, 32 ti nà-deveiti koloɠolo,ti la ɠoloni nà-tɔgiti bɛ, 33 nà tukpɔi zeɠe, gè ta-lɔ koloɠologi maaɠolo,nà ta-vaaɠaaza golai zale ga doɠai. 34 Kɛlɛ gè la ɓega nà-nuɓɔɠɔlai ʋa tɔun bɛ.Gè la zeɠea nà-wooɠɛɠiladai ʋolu, eyɛsu ɠɔ. 35 Gè la nà-minazeɠegi ɠoloɠologa,gè la ɓalaa naa maavaliboga ɲɛgɛlɛin, nii kulaai dàaʋɛ. 36 Gè ɠonani, naa ɠɛ ɠila nà-ɲadedai ma,ɓa-o, gè la zɛɛ woga Davide ma. 37 Mavofodai ɠa yɛ ná ɠɔ,ná-masa kpɔkpɔgi ɠa yɛ gàazu eɠɛ foloi, 38 toɠa zei eyɛsu ɠɔ eɠɛ alugi,nii é ga wooɠɛɠila zeelei tonaɓiingi ʋolu.»Lo! 39 Anɛɛ naa ʋe, è masagi yɛni na, è ɠɛlɛ ba,nii è gulɔ ɲadegai ziɛni ma, è yiiɠaawanani ma! 40 È ɗa-minazeɠegi ɠoloɠologa, nii è seɠeni ɗa-wotiɠɛ nui ʋɛ,è ná-masa bɔɔlɔgi ɠɔzɔa, è pili zooi ma. 41 È zeɠei wɔa ná-siɠigiti kpein ba,è ná-siɠigiti koloɠologa. 42 Teʋe nuiti kpein ti loa su,seiɲɔɠɔiti ti ɗa ɲɛɛɠula su. 43 È sili nuiti iɲɔdɔɔni,è wɔinzeɠe nuiti daave ga koozunɛɛi. 44 È ná-boɠa zɔkpɔi zeɠeni pelei ʋa, pilisuʋɛ,è la loni polu kɔɔɠɔ ziɛgi zu. 45 Ʋelei é ɠɛa volozu la, è naa ɠaaʋa,è ná-masa kpɔkpɔgi ʋiliga ya zooi ma. 46 È ná-nu niinɛlai ma voloiti suɓuɠaa,è maaɓɔlega ga unfegi.Lo! 47 Ɠɔoɠɔ GALAGI, ɗa yɛsu dɔɔɠui zu, eyɛsu yeelɛ,ɗa-yiiɠaawanai ɗa so, eɠɛ abui? 48 Ɠizɛ su ga nà-eteai zu la ɠoozani,è nuɓusɛiti kpɛtɛʋɛ wafuun ɓaa? 49 Nui ɓɛgele ɠa a zoo é zɛnvui wo, é la saai ɠaa?Ɓɛ ɠa a zɛnvui ɠula gɔvɛalaazu ná-zobogi ya?Lo! 50 Maliɠii, mini ɠa ɗa-nuɓɔɠɔlai ná, è ti ɠɛɛni mɔungi zu?Ɗa-wooɠɛɠiladai zu, è ma minazeɠegi woni è ɠona Davide ʋɛ. 51 Maliɠii, ɠizɛ ɗa-wotiɠɛ nuiti ta-unfegi zu,ɠizɛ nuɓusɛ mɔinmɔingiti su, ti-ma ɠasɔi laani ùnma. 52 Ɠɔoɠɔ GALAGI, ɠizɛ su ga è zili nuiti ta ɓaaɠulamai ɠɛɛzu,ta ɓaaɠulazu zunui naa ma, nii è gulɔ ɲadegai ziaai ma! 53 Mamagi ɠa Ɠɔoɠɔ GALAGI ʋɛ eyɛsu ɠɔ!Amina! Amina!

Psalms 89 (TOMA)

In Other Versions