Zechariah 9 (TOMA)

1 Ɠɔoɠɔ GALAGI ná-keela wooi. Daawooi Ɠadelake yooi zoga,é ɠwɛ Damase taazuʋɛ.Mazɔlɔɔ nu vului pɛ ka ga Ɠɔoɠɔ GALAGI nɔnɔ,ʋelei nɔ Izilayɛle wolodaiti pɛ ti la. 2 É Ɠamate ɓalaa zoga,niiti ti zeiɗai la ta Damase,é zeeli Tiil, ta Sidɔn ma,niiti ti wola ɠoozuɠeleai. 3 Tiil siɠi gaaɠooza toga ɓɔɠɔ ʋɛ,é walii ɠaalɛa ba eɠɛ fufiligi,é zanugi ɠaalɛ ba eɠɛ koi yɔɠɔzu ʋalaʋalagi. 4 Kɛlɛ Maliɠii ɠa ti pɛ kula zea,toɠa ná-siɠigiti toka kpoloɗɛi wu,toɠa ɠala ga abui. 5 Asekalɔn ɠa naa ɠa, é lua,Gaza ɓalaa zu ɠa ɓali ga duai,Ekelɔn ɓalaa ka ɠɛ ɠana nɔ,tɔɔzei kitosuʋɛ ɠa ɠula zea.Masa ge la mɔ ɠɛa Gaza,nu vulu nɔpɛ ge la mɔ ɠɛa Asekalɔn. 6 Nu zupuiti ta zei Asadɔde.Nà Filisiti nuiti ta-wasogi zuɠoloɠolo. 7 Nà ɲamasu zuai ɠula ti-la,gè kɔɔɠɔ gani kɔɔ laamianigiti kula ti-ɲiiga yɔɠɔzuʋɛti.Ta-nuɓusɛi mɔtai ɠa ɠɛ ga gá-ƓALAGI nɔnɔ.Toɠa losu zɔlɔɔ Zuda wolodamaiti saama,Ekelɔn nuiti ɓalaa ti ɠɛ ga Yeɓuse nuiti kɛʋele. 8 Nà ɠɛ nà-zooi maaɠoolii zu,gè makɛ kɔɔɓɔgiti daalɔɠɔma, ti leʋesu,suɲɔu nui tanɔpɛ ge la mɔ nà-nuɓusɛiti kpɔlɔa,mazɔlɔɔ gàazu ɠa ɠɛ ti ʋa niina. 9 Ee, Siyɔn nuɓusɛi, ɠɔkɔ ga koozunɛɛi!Ee, Zeluzalɛme nuɓusɛi, wooɠula ga koozunɛɛi!Wɛlɛ ɗa-masagi ʋa, é ʋaazu è ʋɔ,telebogɛ, pilɛ sɔlɔɔdai veeʋɛ bɛ,toɠa ga ɓɔɠɔmaayei nu, é zeini soovalegi ɠɔma,soovale saai ma yiʋoi ɠɔma. 10 Nà kɔɔɠɔ wotoloiti kulazu Efelayime ʋa,gè kɔɔɠɔ zooiti kula Zeluzalɛme ʋa,mɛɛin nii kɔɔi ɠɔɔzu la, naa zu ɠa ɠaleɠale.Masagi naa ɠa ziilɛigi lɔ zii ɠiligiti saama,ná-masadai ɠa zo kpoloɗɛi zɔi ma, é zei zɔi ʋa,é zo ziɛ wolai Efelata ma, é li zou ɓela ga. 11 Ɗɔun ɗɔnɔi, minazeɠegi maaʋele ma,é de yɔɠɔzu, nii kɛai ga ɲamai maaʋele,nà ɗa-luɔiti unmɔɔsu,gè ti ɠula zeɠei zu, nii ziɛ la su. 12 Kasoɠa nuiti wɔiti kitogi wo ʋɛ,à ɠale ma wa-laazu ziɠi gaaɠoozagi zu!Nà nii wosu za ga:Nà wo ɠaazumaawɔinɠa ga seizu felegɔ. 13 Mazɔlɔɔ gè Zuda ɠɛa ga nà-mɛɛin,gè Efelayime ɠɛ ga ná-mɛɛn ɠaei.Ee, Siyɔn, nà è-loun zunuiti teʋesu,ti vala ɗɔnɔ ma loun zunuiti ba Yavan,nà è ɠɛ ga kɔɔɠɔ woɠa zɔkpɔi. 14 Ɠɔoɠɔ GALAGI ɠa ɠula kɛlɛma ti maazu,ná-mɛɛin ɠa ɓizɛ eɠɛ mainmain.Maliɠii Ɠɔoɠɔ GALAGI puʋugi vɛ,toɠa ʋaazu lɛkpɛma ʋelei nu yeezazu lonavifigi wu. 15 Ɠɔoɠɔ GALAGI, Fai-Pɛ-Maliɠii ɠa ɓaa ná-nuiti maazu.Ta daami wo, ti fɛlɛvɛlɛ kɔtuiti golowolo.Ta ɓɔɔle, ti ɗa zɔngɔ,eɠɛ dɔɔ ɠa ti zo,ti laa ɠa ve eɠɛ ɲama vaza aniɲakai,ti maa ɠa ɓɔɔle eɠɛ zalaɠa ɠulazuʋɛ ma woizuʋɛti. 16 Ta-ƓALAGI, Ɠɔoɠɔ GALAGI, ɠa ná-nuɓusɛiti kizo naama voloi,eɠɛʋelei nɔ baala makɛ nui,a ɗa ná-baala kpulugi ɠizo da,ti ɗa volo ná-zooi zu,ʋelei kɔtu zɔngɔ ɓaaɓaagiti ta ɗa volo la masa bɔɔlɔgi ma. 17 Ee, ti wola undaa ɠa nɛ!Ee, ta ʋapa ga gola!Moloi ɠa zɛbɛi ve zunu loungoiti zea,dɔɔ niinɛi zɛbɛi ve anzalopoiti zea.

Zechariah 9 (TOMA)

In Other Versions