Numbers 33 (YALU)
1 Isirayila kaane sigadene ni i ra e to mini Misiran yi e gali yɛɛn ma, Musa nun Haruna yamarin bun. 2 Musa yi tidene sɛbɛma Alatalaa yamarin nan ma. E sigadene ni i ra, e tide yɛɛn ma. 3 E keli Ramisesi yi kike singen xii fu nun suulundeni Halagi Tiin Dangu Lɔxɔn Sanla kuye baani. Isirayila kaane xɔrɔyaxin yi mini Misiran kaane birin yɛtagi, 4 Misiran kaane yi e dii singene binbine maluxunma waxatin naxan yi Alatala naxanye faxa e yɛ. Amasɔtɔ Alatala e alane yalagi nɛn. 5 Isirayila kaane yi keli Ramisesi yi, e sa daaxa Sukɔti yi. 6 E yi keli Sukɔti yi, e sa daaxa Etama yi tonbonna danna ra. 7 E yi keli Etama yi, e yi xɛtɛ han Pihahiroti yi, Baali-Sefɔn yɛtagi, e yi sa daaxa Migidoli dɛxɔn. 8 E yi keli Pihahiroti yi, e yi baan gidi tonbonna binni, e yi xii saxan siga ti Etama tonbonni, e yi sa daaxa Mara yi. 9 E yi keli Mara yi, e siga Elimi yi, tigi fu nun firin e nun tugu bili tonge solofere yi dɛnaxan yi. E yi daaxa mɛnni. 10 E yi keli Elimi yi, e sa daaxa Gbala Baan dɛxɔn. 11 E yi keli Gbala Baani, e sa daaxa Sin tonbonni. 12 E yi keli Sin tonbonni, e sa daaxa Dofika yi. 13 E yi keli Dofika yi, e sa daaxa Alusi yi. 14 E yi keli Alusi yi, e sa daaxa Refidimi yi, yamaan mi min igen sɔtɔ dɛnaxan yi. 15 E yi keli Refidimi yi, e sa daaxa Sinayi tonbonni. 16 E yi keli Sinayi tonbonni, e sa daaxa Kibiroti-Hatawa yi. 17 E yi keli Kibiroti-Hatawa yi, e sa daaxa Xaserɔti yi. 18 E yi keli Xaserɔti yi, e sa daaxa Ritima yi. 19 E yi keli Ritima yi, e sa daaxa Rimɔn-Peresi yi. 20 E yi keli Rimɔn-Peresi yi, e sa daaxa Libina yi. 21 E yi keli Libina yi, e sa daaxa Risa yi. 22 E yi keli Risa yi, e sa daaxa Kehelata yi. 23 E yi keli Kehelata yi, e sa daaxa Saferi geyaan ma. 24 E yi keli Saferi geyaan ma, e sa daaxa Harada yi. 25 E yi keli Harada yi, e sa daaxa Makeloti yi. 26 E yi keli Makeloti yi, e sa daaxa Taxati yi. 27 E yi keli Taxati yi, e sa daaxa Tera yi. 28 E yi keli Tera yi, e sa daaxa Mitika yi. 29 E yi keli Mitika yi, e sa daaxa Hasimona yi. 30 E yi keli Hasimona yi, e sa daaxa Moseroti yi. 31 E yi keli Moseroti yi, e sa daaxa Bene-Yakani yi. 32 E yi keli Bene-Yakani yi, e sa daaxa Horo-Gidigadi yi. 33 E yi keli Horo-Gidigadi yi, e sa daaxa Yotobata yi. 34 E yi keli Yotobata yi, e sa daaxa Abirona yi. 35 E yi keli Abirona yi, e sa daaxa Esiyon-Gebere yi. 36 E yi keli Esiyon-Gebere yi, e sa daaxa Kadesi yi Sini tonbonni. 37 E yi keli Kadesi yi, e sa daaxa Horo geyaan ma, Edɔn yamanan danna. 38 Saraxarali Haruna yi te Horo geyaan ma, Alatalaa yamarin ma. A sa faxa mɛnni, Isirayila kaane minin ɲɛɛ tonge naanindeni Misiran yi a kike suulunden xii singeni. 39 Haruna bata yi ɲɛɛ kɛmɛ mɔxɔɲɛn nun saxan sɔtɔ siimayaan na a faxa waxatin naxan yi Horo geyaan fari. 40 Kanan Manga Aradi naxan yi dɔxi Negewi yi Kanan yamanani, na yi Isirayila kaane fa feen mɛ. 41 E yi keli Horo geyaan ma, e sa daaxa Salimona yi. 42 E yi keli Salimona yi, e sa daaxa Punon yi. 43 E yi keli Punon yi, e sa daaxa Oboti yi. 44 E yi keli Oboti yi, e sa daaxa Ye-Abarimi yi Moyaba danna ra. 45 E yi keli Iyimi yi, e sa daaxa Dibon-Gadi yi. 46 E yi keli Dibon-Gadi yi, e sa daaxa Alamɔn-Dibilatayimi yi. 47 E yi keli Alamɔn-Dibilatayimi yi, e sa daaxa Abarimi geyane yi Nebo yɛtagi. 48 E yi keli Abarimi geyane yi, e sa daaxa Moyaba mɛrɛmɛrɛne yi, Yurudɛn baan dɛxɔn, Yeriko yɛtagi. 49 E yi daaxa Yurudɛn baan dɛxɔn Moyaba mɛrɛmɛrɛne yi, keli Beti-Yɛsimoti yi han Abeli-Sitimi. 50 Alatala yi a fala Musa xa Moyaba mɛrɛmɛrɛne yi Yurudɛn baan dɛxɔn Yeriko yɛtagi, 51 a Musa xa a fala Isirayila kaane xa, a naxa, “Ɛ na Yurudɛn baan gidi, ɛ so Kanan yamanani, 52 ɛ xa yamanan muxune birin kedi. Ɛ e suxure gɛmɛne nun suxure wurene kala, e nun e taane kidene. 53 Ɛ e yamanan tongo ɛ yi dɔxɔ na, amasɔtɔ n bata a so ɛ yii ɛ gbeen na. 54 Ɛ masɛnsɛnna ti, ɛ yamanani taxun bɔnsɔnne ra. Naxanye wuya, ɛ kɛɛ bɔxɔ gbeen so ne yii. Naxanye mi wuya ɛ xa a xurin so ne yii. E na naxan sɔtɔ masɛnsɛnna xɔn, e gbeen nan na ra. Kɛɛ bɔxɔne yitaxunma ɛ fafane bɔnsɔn yɛɛn nan ma. 55 Koni xa ɛ mi yamanan muxune birin kedi, ɛ na naxanye lu na, ne ɛ tɔrɔma nɛn alo tansinna ɛ yɛɛne xɔn hanma ɲanla naxanye ɛ fatin masɔxɔnma. E ɛ tɔrɔma nɛn yamanani ɛ dɔxɔma dɛnaxan yi. 56 Nayi, n naxan nagidixi e ma, na ligama ɛ tan nan na.”