2 Chronicles 18 (YAPE)

1 Nap’an ni yo’or bogi ban’en rok Jehoshafat ni Pilung nu Judah ma ke gilbugwan, me m’ag ba mabgol u thilin reb i chon e tabnaw rok nge reb i chon e tabnaw rok Ahab ni Pilung nu Israel. 2 Me yan in e duw me yan Jehoshafat ko fare binaw nu Samaria ni nge mada’nag Ahab. Rogon ni tay Ahab fan Jehoshafat nge pi’in nra’uned ngak, i li’ bo’or e saf nge garbaw ni fan ko mur ni farad. Ni be guy rogon ni nge cheag Jehoshafat ngak ngar chamgow ko fare binaw nu Ramoth u lan yu Gilead. 3 Me fith Ahab i Jehoshafat ni ga’ar, “Mog, ga ra un ngog ngad m’agew e mael nga Ramoth?”Me fulweg Jehoshafat ni ga’ar, “I gag e ku gu mu’ i fal’eg rogog kug par ma ku errogon e ba’ rog e salthaw, ere gur e ngam mu’ ma gog. Gamad ra un ngom.” 4 Ma aram miki ga’ar Jehoshafat, “Machane som’on e ngad fithew laniyan’ SOMOL.” 5 Ma aram me pining Ahab e pi profet, gonap’an e yad aningeg mir’ay u gubin, me fithrad ni ga’ar, “Moged, gu ra yan gu m’ag e mael nga Ramoth fa danga’?”Me lungurad ngak, “Mman mu m’ag e mael ngay, ya bayi gel nigem Got.” 6 Machane me fith Jehoshafat i Ahab ni ga’ar, “Mog dakuriy reb e profet nrayag ni ngad fithew laniyan’ SOMOL ngak?” 7 Me fulweg Ahab ni ga’ar, “Kabay ta’reb, i Mikayah nib mo’on ni fak Imlah. Machane gub fananikay, ni bochan e dariy bangiyal’ nra yi’iynag ban’en ni bfel’ ngog; gubin ngiyal’ ma ban’en nib kireb.”Me fulweg Jehoshafat ni ga’ar, “Ri dabmog ban’en ni errogon!” 8 Ma aram me pining Ahab ni Pilung ba tolang u tafen e puf oloboch nge yog ngak nge yan i fek Mikayah e ngaram ni kachingiyal’ nem. 9 Me chuw fa gali pilung nga mad rorow ni madan e pilung miyow par nga daken l’agruw i chiya ko pilung u rom ko fa gin’en ni un n’ag keru’ e grain riy u wuru’ fare garog nu Samaria, ma gubin fapi profet ni yad be yi’iy u p’eowcherow. 10 Zedekiah e bagyad fapi profet nib mo’on ni fak Kenaanah, e ngongliy bogi gagey ko wasey me ga’ar ngak Ahab, “Ba’aray e n’en ni be yog SOMOL, ‘Pin’ey e ga ra cham ngay ngak piyu Syria ma ga ra gel ngorad ni yad gubin.’” 11 Ma gubin e tin kabay fapi profet ni ku rogned ni aram rogon. I lungurad, “Mman m’ag e mael ngak yu Ramoth ya ga ra gel. Ra gel nagem SOMOL.” 12 Ngiyal’ nem ma fare tolang nike yan ni nge pining Mikayah e ga’ar ngak Mikayah, “Gubin e profet ni ka ra yi’iy niged nra gel fare pilung, ere ba manigil ni ka ga ra yi’iy ni aram rogon.” 13 Machane me fulweg Mikayah ni ga’ar, “U fithingan SOMOL ni be par nib fos e gu ra yog e n’en ni be yog e Got rog ngog!” 14 Nap’an ni yib nga p’eowchen Ahab ni Pilung, me fith fare pilung ngak ni ga’ar, “Mikayah, mog gamow ra yan Jehoshafat nggu m’agew e mael ngak yu Ramoth, fa danga’?”Me fulweg Mikayah ni ga’ar, “Mm’agew e mael! Ya gimew ra gel. I SOMOL e ra gel nagmew.” 15 Machane me fulweg Ahab ni ga’ar, “Fa’an mu non ngong u fithingan SOMOL, ma ga weliy e tin riyul’! Bu uw urngin yay ni ngog ngom?” 16 Me ga’ar Mikayah, “Gu be guy fare raba’ i salthaw nu Israel ni ka ra wagey gad u daken e pi burey ni yad bod e saf ndariy e en nma gafaliyrad. Ma SOMOL e be ga’ar, ‘Pi pumo’on ney e dariy be’ ni be gafaliyrad; mu pagrad ngar sulod nga taferad u fithik’ e gapas.’” 17 Me ga’ar Ahab ngak Jehoshafat, “Fa’an gog ngom ndariy bangiyal’ nike yi’iynag ban’en nib manigil ni fan ngog; gubin ngiyal’ ma ban’en nib kireb!” 18 Miki ul ul Mikayah ngay nge ga’ar: “Mmotoyil e chiney ko n’en ni be yog SOMOL! Kug guy SOMOL ni be par u daken e chiya rok ntagil’ e pilung u tharmiy, ni bay gubin e pi engel rok ni yad ba sak’iy u to’oben. 19 SOMOL e be fithrad ni be ga’ar, ‘Mini’ e ra bannag Ahab nge yag ni yan ngan li’ u Ramoth nge yim’?’ Me yog boch fapi engel reb e ban’en, me yog boch i yad yug reb e ban’en, 20 nge taw ko ngiyal’ nike yib ba kan i sak’iy nga m’on me chugur i yan ngak SOMOL, me ga’ar, ‘Bay gu wan gu bannag.’ Me fith SOMOL ngak ni ga’ar, ‘Ni bu uw rogon?’ 21 Me fulweg fare kan ni ga’ar, ‘Bay gu wan nggu gagiyegnag gubin fapi profet rok Ahab ngar bangad.’ Me ga’ar SOMOL, ‘Mman ngam bannag. Ya rayag rom.’” 22 Me weliy Mikayah e tin tomur ni ga’ar: “Irera’ e n’en nike buch. I SOMOL e ke gagiyegnag e pi profet rom ney ka ra ban niged gur. Machane ir e kemu’ i yog rok ni ga ra mada’nag e magawon!” 23 Ma aram me yan Zedekiah ni profet ngak Mikayah nge batnag owchen, me fith ni ga’ar, “Wi’in ney e ke pageg fare Kan Nthothup rok SOMOL nge yib i non ngom?” 24 Me fulweg Mikayah ni ga’ar, “Bay mu pir’eg ko ngiyal’ ni ga ra yan ngalan ba senggil u tabgul ni ngam mith.” 25 Ma aram me ga’ar Ahab ni Pilung ngak reb e tolang rok, “Mu kol Mikayah ngam fek i yan ngak Amon ni governor u roy, nge ngak Joash nib mo’on ni fak e pilung. 26 Mog ngorow nga ron’ew nga kalbus min tay ni kemus ni go’ flowa nge ran e ngu’un pi’ ngak nge taw ko ngiyal’ ni ku gu sul u fithik’ e gapas.” 27 Me non Mikayah nib ga’ laman ni ga’ar, “Fa’an ga ra sul ni dariy ban’en nike buch rom, ma aram e de non SOMOL u l’ugun’ag!” Miki ul ul Mikayah ngay nge ga’ar, “Mmotoyil gad ni gimed gubin ko n’en ni kugog!” 28 Ma aram me yan Ahab ni Pilung nu Israel nge Jehoshafat ni Pilung nu Judah ni ngar mael ko fare binaw nu Ramoth u Gilead. 29 Me ga’ar Ahab ngak Jehoshafat, “Nap’an ni gadow ra yan ko mael ma dab guchuw nga madan e pilung ya nge dab nnang ko gag mini’, machane gur e ga ra chuw nga madan e pilung.” Ma aram me yan fare pilung nu Israel ko mael ni be guy rogon ni dab ni poy. 30 Pilung nu Syria e keyog ngak e pi tagafaliy e chariot rok ndab ra chamgad ngak yug be’ ya kemus ni fare pilung nu Israel. 31 Ere nap’an nra guyed Jehoshafat ni Pilung, ma yad gubin nra leam niged ni ir fare pilung nu Israel, miyad cheal ni ngar chamgad ngak. Machane me tolul Jehoshafat, me ayuweg SOMOL ni Got nge gilafeg e cham rok nga orel. 32 Pi tagafaliy e chariot e ra guyed ni gathi ir e pilung nu Israel, ma aram miyad tal i tuluf. 33 Machane me buch ni pag ba salthaw nu Syria ba gan e gat’ing nge kan Ahab ni aw ko tapeth ko madan e salthaw u daken. Me tolul ko en nma yannag e chariot ni ga’ar, “Kug maad’ad! Mu sul ngad chuwgow u fithik’ e mael!” 34 Nap’an ni kari achngiy fare mael, ma bay Ahab ni Pilung nib suwon u lan e chariot rok nib sap ngak piyu Syria. Ma nap’an ni aw e yal’ me yim’.

2 Chronicles 18 (YAPE)

In Other Versions