2 Samuel 21 (YAPE)
1 Ngiyal’ nib pilung David me yib ba uyngol nib gel ni dalip e duw nap’an. Me fith David laniyan’ SOMOL riy, me ga’ar SOMOL, “I Saul nge chon e tabnaw rok e bbuch e rorad ko mthang pogofan; ke thang e fan rok e girdi’ nu Gibeon.” ( 2 Fapi girdi’ nu Gibeon e gathi yad piyu Israel; yad bochi ulung i girdi’ nu Amor nike micheg piyu Israel ni yad ra ayuwegrad, machane Saul e i guy rogon ni nge thirifrad u but’ ni bochan e ba’ ufan e girdi’ nu Israel ngu Judah u daken.) 3 Ma aram me kunuy David e girdi’ nu Gibeon nge ga’ar ngorad, “Mang e rayag ni gu rin’ ni fan ngomed? Gub adag ni nggu fulweg labgen e kireb ni kan rin’ ngomed, ya ngam yibliyed e fel’ wa’athan nga daken e girdi’ rok SOMOL.” 4 Mar fulweged, ni lungurad, “Kireb u thilmad Saul nge tabnaw rok e dabiyag i gapaseg ko silber nge gol, ma dabmad ni nggu li’ed be’ nu Israel nge yim’.”Me fithrad David, ni ga’ar, “Ere, mang e gimed be leamnag ni nggu rin’ ni fan ngomed?” 5 Mar fulweged, ni lungurad, “Saul e ba’adag ni nge thang owchamad ni dabki pag bagmad nge par u bang u lan yu Israel. 6 Ere mu pi’ medlip e pumo’on ni owchen Saul ngomad, nggu uchuliyed yad u mit SOMOL u Gibeah, ni fare binaw rok Saul, ni SOMOL e mel’eg ni nge pilung.”Me fulweg fare pilung, ni ga’ar, “Bay gu pi’rad ngomed.” 7 Machane bochan e michmich u fithingan Got ni tay David nge Jonathan, ma de pi’ David Mefibosheth ni be’ ni pumo’on ni fak Jonathan, ni Saul e tutuw rok. 8 Machane me fek David i Armoni nge Mefibosheth, ni l’agruw i pumo’on ni diyennag Rizpah rok Saul. Rizpah e be’ ni bpin ni fak Aiah. Miki fek lal i pumo’on ni fak Merab ni be’ ni bpin ni fak Saul. Lal i pumo’on ney e diyennag Merab rok Adriel ni be’ nib pumo’on ni fak Barzillai, ni be’ nu Meholah. 9 Me pi’ David e picha’ney ngak e girdi’ nu Gibeon. Mar uchulyedrad u daken fare burey u mit SOMOL ngarm’ad ni yad medlip u ta’bang. Ngiyal’n’em e aram e nge m’ay e spring, ma ke taw nga nap’an ni ngan t’ar wom’ngin e barley. 10 Me Rizpah ni ku reb e bpin rok Saul, ni fare pin ni fak Aiah e fek e mad ni tutuw nge ngongliy bochi tent riy u daken fare war ni bay fapi ldow riy ngi i par u tanggin, me par u rom u nap’an ni kan tabab i t’ar wom’ngin e woldug nge mada’ nga nap’an e autumn nike yib e n’uw. Ra rran me lang e arche’ ni yad be yib ko fapi ldow, mra nep’ miki ayuweg fapi ldow ndabi yib e gamanman ni malboch ngorad. 11 Nap’an ni rung’ag David e n’en nike rin’ Rizpah, 12 me yan i fek e yilen Saul nge Jonathan ni fak, rok e girdi’ nu Jabesh u lan yu Gilead. (Ra iringed e pi yil nem u lan fare gin’en ni lulukngun yu Beth Shan, ko gin ni tining e pi Filistine fapi ldow riy ngalang ko fare rran nra li’ed Saul nge yim’ u daken fare Burey ni Gilboa.) 13 Me fek David yilen Saul nge Jonathan miki kunuy yilen fa medlip i pumo’on nni uchuliyrad. 14 Ma aram mar k’eyeged yilen Saul nge Jonathan ngalan e malangen e yam’ rok Kish ni chitamngin Saul, u lan yu Zela u lan e gin nib milsuwon ngak Benjamin, pin’ey e go’ fare pilung e keyog ni ngan rin’. Ma tomuren e binem, me fulweg Got taban e pi meybil rorad ni fan ko fare nam. 15 Miki immoy reb e mael u thilin yu Filistia nge yu Israel, me yan David nge salthaw rok ngar chamgad ngak piyu Filistia. Nap’an reb e pi mael nem mri kath parwan David. 16 Ma reb fapi girdi’ nib pag ga’ngin ni Ishbibenob fithingan, ni i fek ba sarey nib bronze ni gonap’an e medlip nge baley e pawn malngin, ma ke m’ag bangi saydon nib be’ech nga lukngun, e leamnag nrayag rok ni nge thang e fan rok David. 17 Machane me yib Abishai ni be’ nib pumo’on ni fak Zeruyah nge yib i ayuweg David, nge cham ngak fare pumo’on nib pag ga’ngin, nge thang e fan rok. Ma aram me yog e salthaw rok David ngak ni nge micheg ngorad ndabki un ngorad ko mael bi’id. I lungurad ngak David, “I gur e l’agan’ rok yu Israel, ma dubmad ni ngamum’ romad.” 18 Ma nga tomuren e ren’ey ma immoy ba mael nra ted piyu Filistia u Gob, ma nap’an e re mael nem me Sibbekai nu Hushah e thang e fan rok reb fapi girdi’ nib n’uw mab tagyet ni Saf fithingan. 19 Miki immoy reb e mael nra ted piyu Filistia u Gob, me Elhanan ni be’ nib mo’on ni fak Jair nu Bethlehem e thang e fan rok Goliath nu Gath, cha’ney i Goliath e immoy ba sarey rok ni kolngin e bod dub’agin fare wasey ni fen fare n’en ni yima lifith e mad ngay. 20 Ma ku bay reb e mael u Gath, ni immoy be’ riy nib pag ga’ngin nrib adag e cham. Ra barba’ i rifrifen pa’ ma nel e buguli pa’ef ni bay riy, ma ku arita’ rifrifen ay ni ku nel’ buguli ay u barba’ ngu barba’. 21 I dariyfannag piyu Israel, me thang Jonathan e fan rok facha’, Jonathan e be’ nib mo’on ni fak Shammah nib mo’on ni walagen David. 22 Aningeg i girdi’ ney e owchen e fapi girdi’ ni n’un’uw ma tagyet nu Gath, me thang David nge salthaw rok e pogofan rorad.