Jeremiah 40 (YAPE)

1 I SOMOL e non ngog u tomuren nike pageg Nebuzaradan u kalbus ni ir e ga’ ko salthaw u Ramah. Ya ni fekeg ngaram ni kan chain nigeg, ni gub mu’un ngak gubin fapi girdi nu Jerusalem ngu Judah nni fekrad ni kalbus nga Babylon. 2 Fare tolang ko salthaw e piningeg nga wuru’ e girdi’ nge ga’ar ngog, “Fare SOMOL ni Got rom e keyog ni re but’ ney e nge yib e riya’ ngay, 3 are chiney e ke rin’ e n’en nni yog nra rin’. Ke buch gubin e pin’ey ni bochan e girdi’ rom ni yad be denen nib togopluw ngak SOMOL ma darir folgad rok. 4 Chiney, e nggu luf e chain u tungun pa’am nggu pagem. Fa’anra ga ba’adag ni ngam un ngog nga Babylon, ma rayag, ya gu ra aywegem. Machane fa’anra dabum, ma dab mu’un. Go’ ku bay gubin yang ni ga ra mel’eg, ma ga yan ko gin ga be finey.” 5 Ma da gu fulweg, me ga’ar Nebuzaradan, “Mu sul ngak Gedaliah nib mo’on ni fak Ahikam ni ir e tutuw rok Shafan, ni aram facha’ ni yog fare pilung nu Babylon ni nge governor ko pi binaw nu Judah ney. Rayag ni mu par rok ngam par u fithik’ e girdi’, fa gur e muguy e gin ni ga be finey ni bfel’ ni ngam man ngay.” Ma aram me pi’ ba tow’ath ngog nge boch e ggan ni nggu fek, me pageg nggu wan. 6 Gu wan gu par ngak Gedaliah u Mizpah nggu par u rom u fithik’ e girdi’ ni magach u lan fare nam. 7 Boch e pi tolang u Judah nge salthaw nde yag nni kolrad. Rrung’aged ni fare pilung nu Babylon e ke tay Gedaliah ni ir e governor ko fare nam ke par ni ir e be tay murung’agen gubin e pi’in nni fekrad nga Babylon ni fapi girdi’ th’abi gafgow ko fare nam. 8 Ere Ishmael nib mo’on ni fak Nethaniah, nge Johanan nib mo’on ni fak Kareah, nge Serayah nib mo’on ni fak Tanhumeth, nge pi pumo’on ni fak Efai nu Nethofah, nge Jezaniah nu Maakah e ru’ned ko fapi pumo’on ngranod ngak Gedaliah nga Mizpah. 9 Me ga’ar Gedaliah ngorad, “Nggu micheg ngomed ni dab mu rus gad ni ngam pired nga tan pa’ yu Babylon. Mi gimed par u lan e re nam ney ngu’um pigpig gad rok fare pilung nu Babylon, bay mu pired ni gubin ban’en ni bfel’ u puluwomed. 10 I gag e bay gu par u Mizpah nggu mang mit e thin romed u nap’an nra yib yu Babylon ngaray. Ma gimed e ngam ta’reb gad nga mu kunyed e wayin nge wom’ngin e gek’iy nge gepgep ni olive, nga mu cha’riyed nga langgin fare binaw ni ka mu pired ngay.” 11 Ngiyal’ i n’em e gubin yu Israel ni yad bay u Moab, Ammon, Edom, nge ku boch e binaw, e rung’aged ni fare pilung nu Babylon e ke pag boch piyu Israel ni ngar pired u lan yu Judah, ma ke tay Gedaliah ni governor rorad. 12 Ma aram miyad chuw ko yung i n’en nni weregrad riy, ngar sulod nga Judah. Rabad ngak Gedaliah nga Mizpah, nu rom e ra kunyed e tin yo’or e wayin nge wom’ngin e gek’iy riy. 13 I Johanan nib mo’on ni fak Kareah nge boch e tolang ko salthaw e rabad ngak Gedaliah nga Mizpah 14 nga rabad ra ga’argad ngak, “Da munang ni fare pilung i Baalis nu Ammon e ke l’oeg Ishmael ni nge li’em ngamum’?” Ma de riyul’ u wan’ Gedaliah e ran’em. 15 Ma aram me non Johanan ngak ni go’ yow ni ga’ar, “Mu pageg nggu wan gu thang e fan rok Ishmael, ni dariy be’ nra nang ko mini’ e ke li’. Mangfan ni ngan l’oeg ni nge li’em ngamum’? Ya ra k’aring e pi Jew ni ka ra mu’ulung gad nga to’bem ngar werwergad, ma ra girengiy e riya’ nga daken gubin e girdi’ ni magach u lan yu Judah.” 16 Ma aram me ga’ar Gedaliah, “Dab mu rin’! N’en ni ga be yog u murung’agen Ishmael e de riyul’!”

Jeremiah 40 (YAPE)

In Other Versions