Matthew 15 (YAPE)
1 Me ere yib boch e Farise nge boch e tamchib ko Motochiyel u Jerusalem ngak Jesus ngar fithed ni lungurad, 2 “Mangfan nder fol pi gachalpem ko yalen nike yib rok pi chitamangidad ni kakrom ke af ngodad? Darir lukuyed pa’rad nrogon yalen ni yima lukuy pa’ay nge mu’ min abich!” 3 Me fulweg Jesus ni ga’ar, “Mang ni kam paged e tin ni yog Got kam folgad ko tin ni gimed e mu sunumiyed gimed be machibnag? 4 Ya ga’ar Got, ‘Mu liyor ko chitamam nge chitinam’, miki ga’ar, ‘En nra yog e chitamngin fa chitiningin nga dalib e thingar nli’ ngem’. 5 Machane gimed be fil ko girdi’ ni fa’anra bay ban’en rok be’ nrayag ni nge pi’ nge ayuweg e chitamngin fa chitiningin ngay, machane me yog ni ga’ar, ‘Ren’ey e kug pi’ ngak Got,’ 6 ma aram e dakuriy fan ni nge tayfan e chitamngin. Ireray rogon ni kam n’iged fan e thin rok Got kam folgad ko tin gimed e msunumiyed gimed be machibnag. 7 Gimed e pi’in gimed ma dake moding niged gimed! Rib sorok Isaiah ni profet ni fa’ani weliy murung’agmed ni ga’ar: 8 I Got e ga’ar, ‘Pi girdi’ ney e yad be tayfag ko thin ni yad be yog,machane rib mal’af lanin’rad rog. 9 Mm’ayfan e siro’ nge pigpig ni yad be tay ngog,ya pi motochiyel ni girdi’ e sunumiy e yad be machibnag ngak e girdi’ ni gowa pi motochiyel rok Got!’ ” 10 Me pining Jesus fapi girdi’ ni aram urngirad ngarbad ngak me ga’ar ngorad, “Mu telmed, mi gimed guy rogon ngam nanged fan! 11 Gathi n’en nra yan ngalan l’ugun be’ e ir e ra alitnag fa’anem; ya n’en nra yib riy nga but’ e ir e ra alitnag fa’anem.” 12 Me yib pi gachalpen me lungurad ngak, “Mog, ka mu nang ni fapi thin ni kamog e ke kireban’ fapi Farise ngay ni bochan e ke kun ngorad?” 13 Me fulweg Jesus ni ga’ar, “Urngin ban’en nde yung e Chitamag nu tharmiy e yira pug ngalang. 14 “Mpaged yad! Ya yad be pow’iy e girdi’ ma yad bmalmit; ma fa’anra kol reb e malmit pa’ reb e malmit ngi i pow’iy i yan, ma yow l’agruw ni yow ra mul nga wuru’ e kanawo’ ngalan wol’ e ran.” 15 Me non Peter ni ga’ar, “Mu weliy fan e re fanathin nir ngomad.” 16 Me ga’ar Jesus ngorad, “Ku errogon ndawori tamilangan’med riy ni bod yad. 17 Mogned, dawor mu nanged fan? Demturug e n’en nra yan ngalan l’ugun be’ me yan ngalan gil’iggan me yan u rom nga wuru’ i downgin. 18 Ma pin’en nra yib u lan l’uguney nga but’ e yib u lanin’uy; ireram e pin’en ni ir e ma alitnag be’. 19 Ya laniyan’ be’ e ma yib e leam nib kireb riy ni ir e ma pingeg fa’anem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal; me moro’ro’ u fithik’ e yargel, me lifith l’ugun, me t’ar e thin nga daken e girdi’. 20 Ireray e pin’en nma alitnag be’. Machane ra mu abichgad nda mlukuyed pa’med nrogon ni karogned nthingar mu rin’ed — ma biney e der ma alitnag be’.” 21 Me chuw Jesus ko gin’em nge yan ngabangi nug nib chugur ko pi binaw nu Tyre ngu Sidon. 22 Me yib be’ ni bpin u Kanaan ngak nma par ko gi nug nem. Me pining ni ga’ar, “Fak David, mu runguyeg! Bochi pin ni fakag e ke ying ba mo’onyan’ ngak, ni kari ubchiya’.” 23 Machane de yog Jesus ta’ab bugithin ngak. Me yib pi gachalpen ngak ni yad be wenig ngak ni be lungurad, “Mog ngak e re pin nir nge yan; ya yugu be lekdad nike mada’ laman ngalang!” 24 Me fulweg Jesus ni ga’ar, “Kemus ni girdi’ nu Israel nike malog ni bod e saf nike malog e ka nol’igeg ni nggub ngorad.” 25 Ma fa’ani yog e re bugithin nem me yib fare pin ngeb i paraw u to’oben i ay Jesus nga but’. Me ga’ar, “Mu ayuwegneg!” 26 Me fulweg Jesus ni ga’ar, “De mat’aw ni ngan fek gan e bitir nga nin’ ko pilis.” 27 Me fulweg fare pin ni ga’ar, “Riyul’ e re bugithin nir, machane mus ko pilis mma kay e ggan nike aw nike mul nga but’ u tebel ko masta rorad.” 28 Me fulweg Jesus ngak ni ga’ar, “I gur reb e bpin nrib gel e michan’ rom ngak Got! Tin ni gab adag e bay nrin’ ngom.” Ma ka chingiyal’ nem me gol fachi pin ni fak. 29 Me chuw Jesus u rom nge yan u to’oben e lipath nu Galile. Me yan nga daken bburey nge yan i par riy nga but’. 30 Me yib e girdi’ ni pire’ ni pire’ ngak, ni yad be fek e pi’in yad bmugutgut, nge pi’in yad bmalmit, nge pi’in yad bmarwoth, nge pi’in ndabiyag ni ngar nonod, nge yugu boch e girdi’ ni yad bm’ar nra feked yad ngar ted yad nga but’ u to’oben ay Jesus; me chuweg Jesus e liliy rorad. 31 Ma fa’ani guy fapi girdi’ nike welthin e pi’in nda i yag ni ngar uned ko numon, nge pi’in yad bmarwoth ni kar sulod nga rogorad, nge pi’in yad bmugutgut ni kar uned ko yan, nge pi’in yad bmalmit nike yag ni kar guyed ban’en miyad ngat ngay; ma aram miyad yog e sorok ngak fare Got nu Israel. 32 Me pining Jesus pi gachalpen ngarbad ngak me ga’ar ngorad, “Ke taganan’ug ko pi girdi’ ney, ya nga dalip e rran ni kar pired rog ma dakuriy ban’en ni yad ra kay. Dabug ni nggu pagrad ngranod ndab gu pi’ ban’en ngar ked, ya richey ngar awgad nga but’ ko bilig u kanawo’ ndawor ra tawgad nga taferad.” 33 Me fith pi gachalpen ngak ni lungurad, “U taman yang u daken e re ted ney e gamad ra pir’eg e ggan riy nra gaman e pi girdi’ ney riy ni aray urngin?” 34 Me fithrad Jesus ni ga’ar, “In yal’ e flowa ni bay romed?”Miyad fulweg ni lungurad, “Medlip yal’ nge in e nig ni ba’achig.” 35 Me non Jesus ngak fapi girdi’ ni aram urngirad ni ngar pired nga but’. 36 Me fek fa medlip yal’ i flowa nge fapi nig, me pining e magaer riy ngak Got, me t’et’ar nge pi’ ngak pi gachalpen, me pi’ pi gachalpen ngak fapi girdi’. 37 Miyad kay ni yad gubin ngar fosgad ngay. Me kunukunuy pi gachalpen e ggan ndaki m’ay i kay me gaman medlip e dug riy. 38 Ma urngin e pumo’on nra ked e re ggan nem e yad aningeg i biyu’, nda ni uneg e ppin nge bitir ko matha’eg. 39 Ma aram me pag Jesus fapi girdi’ ngranod, me af nga bowoch nge yan ko fa gi nug nu Magadan.