1 Peter 2 (BBT1E)

1 Chiihphado, zab pha awie shii nawaithek ruang rek bo; biidiie chiih-è lawasdai chiih-è miegriie chiih-è magak-riing pha nyuak ne oi chid rabo. 2 Wo giak pha aniphiingthek duiine idang igang pha ragung nyiu shii gahang-hang bo, ji-è nathek ji niing arone giawo shii sieng mua ruii phro. 3 Jigi shii yao, “Ithong ne khinyama bushun nawaithek ne dohjong ro.” 4 Ithong shii wuii bo, isieng lubao shii branthek è adunmey rone snai pha ji ne Hamangkhung-aphuii è igong rone yao ne gua jong ro. 5 Isieng lubaothek duiine wuii ruii bo, chiih-è nawaithek shii ne luruak pha Jewthek misiahò rung pha kho yi bo, khihà so phabithek è duiine nathek ne blia rek srane Isu Masi chiang è Hamangkhung-aphuii yie sbo khlem rek bo. 6 Jigigam shii yao,“Gu è igong lubao shii gua,nyie yi gune Zion shii iriing lubao ruii muii pha duiine ro;chiih-è hanyie è aishii migi rek khuchungde awo phro.” 7 Nathek è migi rekpho shii ne hì pha lubao ne bajobo igong rey ro; jimagunde hanyie è migi arek pho shii ne:“Khi pha lubao shii rungpho è adunmey rone snai muii pha ji nezab è bajo miigak rey din ro.” 8 Chiih-è gai jigigam shii yao,“Hì pha lubao ne bran shii kham yi,chiih-è lubaoboh shii ne ithek shii chiih yi pha ro.”Ithek ne kham dun nyieliieshii ithek ne miyaogam shii migi arek ro; hì ne zai Hamangkhung-aphuii è ithek ro yang pha ji ro. 9 Jimagunde nathek shii ne gua pha log ro, Saja pha phabithek, so branthek, Hamangkhung-aphuii awairo bran, hanyie è nathek shii igiia è awairo anomuluii pha muchuang hà noh phi, chiih-è Hamangkhung-aphuii ro anomuluii blia ji yao yi pha guajong ro. 10 Luang jia pha ishak shii nathek ne Hamangkhung-aphuii ro bran asi, jimagunde thuh shii nathek ne airo bran ro; luang jia shii ne nathek ne Hamangkhung-aphuii ro bushun athieg, jimagunde thuh nathek ne airo bushun shii muage ro. 11 Gu ijakthek wo, ichiih sohkhung pha athieg pha bran nane fuang pha bran duiine! Gu nathek shii khung. Nyie yi idang luruak shii suang rek pha siu è yang pha ji shii aphi rabo. 12 Ithek è nathek shii awie rone nin ruii shii nathek ro ziig ne migi arekpho duchoi shii bajo wie rek bo, ithek ne nathek ro wie blia ji shii thieg ruii chiih-è ai wuii ruii pha inai shii Hamangkhung-aphuii shii chiong ruii phro. 13 Ithong chiang shii nawaithek shii zab pha tharothamang riichai shii phi muii bo: Hanyie yi bajobo riichai um pha Bisiu, 14 chiih-è hanyie shii awie pha rekpho shii lago phi chiih-è hanyie è wie rek ji shii chiong ruii pha aishii ne bow ne ruiijong pha badri de phi muii bo. 15 Chiih-è Hamangkhung-aphuii è nathek shii ne nathek è wie rek pha ji è bi-ìephiing ro thaluii pha miyao shii aro yi pha rek yang ro. 16 Ichad bran duiine rai bo, nathek ro ichad shii nyie awie pha ji shii chiiag yi pha akho rabo, jimagunde Hamangkhung-aphuii ro khiaothek duiine rai bo. 17 Zab shii ilab rek bo, gai migiphothek shii miie bo, Hamangkhung-aphuii shii rum bo, chiih-è Bisiu shii ilab rek bo. 18 Khiaothek nawaithek ne nawaithek musphothek shii phi chid srane zab ilab rek rone doh yi bo, hanyie yi jum nane wie shii asi bie pha, jimagunde hanyie yi sua ji shii ilab rek bo. 19 Hamangkhung-aphuii è nathek shii hì ne khirzey phi ruii phro, ichiig oi pha diigchiao ne riie pha ji shii zud arone, nyieliieshii nathek ne ai è yang pha ji shii nuii phi ro. 20 Na è asi pha blia rek shii zuangthek shii zud arone wie ibeng nyie mua mage phlei? Jimagunde na è rangsua rek mage shii rangde zud arone, ji shii ne Hamangkhung-aphuii è khirzey phi ruii phro. 21 Hì ne ji ro Hamangkhung-aphuii è nathek shii hojong ro, Masi awai de nathek chiang shii diig rek ne chiih-è nathek shii miiriig pha thoh marui, ji-è nathek ne ai è lua pha ji luagieng mua ro. 22 Ai ne layog arek, chiih-è hanyie è ai semthek è biidiie yao pha ayoi ro 23 Aishii magak-riing mage shii, ai è magak-riing rog shii achang; ai diig mage shii, ai è akhui ro, jimagunde airo luthongthek ne giang Chua pha Hamangkhung-aphuii shii ruii. 24 Masi awai è gethek ro layog ne awai siu shii bai hà han, ji-è gethek layog shii iy ne giang shii sieng mua. Hì ne airo saduii è gethek ne gang ge ro. 25 Nathek ne awaithek lumuii è san dun pha shiishai duiine ro, jimagunde thuh shii nathek ro Brogpho nane luruakthek shii Gayiig pha ji shii lua yi pha idoh noh ro.

1 Peter 2 (BBT1E)

In Other Versions