John 9 (BBT1E)

1 Isu yi luaramuii shii nyagiak dang ne imiegthi pha bran jia doh. 2 Ai samoy è sai, “Masdo, nyagiak dang ne ai miegthi hì ne hanyie layog mutho lei? Chiih-è hì pha miiriie ne awai layog mutho bey asi pha ai aphuii-amuii layog mutho bey?” 3 Isu è aishii chang, airo imiegthi hì ne awai layog è de asi ro chiih-è ai aphuii-amuii pha layog de asi ro. Airo imiegthi hì ne Hamangkhung-aphuii ro blu aishii blia rek rone doh yi pha ji mirey ro. 4 Gu shii thoh ge pha airo blia ne inai nya um pha shii gethek ne atho pha rek chid phro, chiih-è hanyie de blia arek mua pha habiu ne thog sharuii ro. 5 Gu ichiih sohjambling shii um ba shii ne gune sohjambling pha muchuang ro. 6 Ai ji è yao pha idoh shii, Isu è nyiak shii chan ne cho srane nyiakphlab ji shii nog ne ji pha bran mieg shii sun 7 ne yao, “Wuii srane nawai mizia Siloam khabang shii mi mage bo.” (Hì pha ibeng yi “Tho” ge phro). Ji pha bran è wuii srane mieg mi ne idoh dun shii mieg jine doh ne dun thog ruii. 8 Chiihphado è ai hadung-haluii pho è bai doh shii ai chayem thang ne lua pha ishak shii riig pha bran è sai, “hì pha bran hì ne chayem than ne dug ne rai pha ji asi bey?” 9 Giak bran è è yao, “ai ne ji chak ro,” jimagungde giak è yao, “ai ne ji asi ro, ai ne ji duiine mia bie ro.” Ji-è ji pha bran awai è yao, “gune ji pha bran chak ro.” 10 Ji pha bran ji è aishii sai, “Khi-èrek ne doh mua ge phlei?” 11 Ai è chang, “Isu beng pha bran jia è nyiak nog ne, gu miegthi shii sun phi ne gu shii Siloam pha khabang shii wuii ne mizia mi mage bo è yao. Ji-è gune wuii srane ne mi mage shii gune doh mua dun.” 12 Ai è aishii sai, “ithek ne khi hà lai?”“Ai è chang,” gune athieg ro. 13 Chiihphado shii ai è mieg doh mua pha bran jishii Pharisithek hà noh dun. 14 Isu è ai miegthi shii nyiak sun ne wie rek phi pha ji yi Jew Thung pha inai shii ro. 15 Chiihphado, Pharisithek è ji pha bran jishii sai din naro miegthi jine khi-èrek ne doh ge phlei? Ai è aishii chang, “Ai è gu miegthi lakhung shii nyiak rek ne sun phi; chiih-è gu mieg mi shii gune doh khlei dun.” 16 Giak Pharisithek è yao, “Hì pha blia rek pha bran hì ne Hamangkhung-aphuii è asi phro, nyieliieshii ai è Jew Thung pha inai pha Iphey ji anuii.”Jishii giak è yao, “Layogpho jia ne khi-èrek ne hì è rek pha buangthek pha rek mua mage phlei?” Chiih-è ai munow jine che dun. 17 Ji-è Pharisithek è ji pha bran jishii sai din, “Na è yao naro miegthi ne ai mirek ne gang phi, chiih-è na ne aishii nyie now lai?” chiihphado è bran ji è chang,“Ai ne chaig ro.” 18 Pharisithek è ai ne miegthi è giak phro ne airo aphuii muii shii anow sapho shii ne migi arek. 19 Chiih-è ithek sai, “hì pha bran ne naro dufuii bey? Nathek ne ai ne miegthi è giak phro ne yao, chiihphado thuh ai ne khi-èrek ne doh mua phlei?” 20 Ai aphuii amuii è yao hì ne gas ro dufuii chak ro, chiih-è ai ne nyagiak dang ne miegthi chak ro. 21 Jishii gathek ne athieg ai ne thuh shii khi-èrek ne doh mua lai, chiih-è ai miegthi shii de gang hanyie mirek phi pha ji shii de gathek ne athieg ro, ji-è awaishii sai mage bo, ai ne boh rey sha ro, chiih-è ai awai è nyachang mua sha phro. 22 Ai aphuii amuii è iyao pha miyao ji yi nyieliieshii ai è Jew ro blu shii rum ne yao, nyieliieshii ithek ò jia rek iang srane hanyie è Isu ne Masi migi rek pho shii ne Jewthek misiahò è khia muii pha rek. 23 Ji-è awaishii sai bo ne ai aphuii ai amuii è yao ai ne bo rey sha ro. 24 Chiih-è dinne de aishii ho srane sai, Hamangkhung-aphuii shii biidiie akhlam pha izai yao bo, nyieliieshii gathek ne thieg ithek shii gang rek phi pha bran ji ne layogpho ro. 25 “Ji pha bran è chang, gune athieg ro ai ne layogpho rai bey asi rai bey,” “Chiih-è gune thieg: Gune miegthi chak chiih-è thuh ne doh sha ge ro.” 26 “Ithek è aishii sai, ai è na shii nyie khi-èrek gang phi phlei?” “Chiih-è na ro miegthi ji ne ai è khi-èrek ne gang rek phi phlei?” 27 Ai è chang “Gu è nathek shii yaojong phro,” “Jishii ne gu miyao ne anuii. Nyie rek ne dinne nuii yang phlei? Na de airo samoythek pho rey yang bey?” 28 Ithek è aishii makhak-riing srane yao, na de ji pha ijak iwa; jishii gathek ne Moses ro samoythek ro. 29 Gu ne thieg Hamangkhung-aphuii è Moses shii ne miyao yao, chiih-è ji pha bran ne khi è wuii rai lei ne gathek ne Ìujia de athieg ro. 30 Ji pha bran è chang, jine anomuluii pha ro! Chiih-è nathek ne ai khi è wuii ji de athieg. Jishii ai è gu shii miegthi doh mua pha gang phi ro! 31 Gu ne thieg Hamangkhung-aphuii ne layogphothek shii anuii jimagungde hanyie è Hamangkhung-aphuii pha miyao ji nuii ne lua pho ne Hamangkhung-aphuii de aishii ilab phi ro chiih-è ai è aishii nyie rek yang pha ji rek phi ro. 32 Sohjambling nyajao dang ne miegthi giak pha ji shii gang rek phi pha ayoi ba ro. 33 Ji pha bran yi Hamangkhung-aphuii è awuii sapho shii hì pha blia arek mua phro. 34 Ai è chang, nathek ne layog è giak ne sieng pha bran, “Chiih-è na ne gathek shii yua pha bidiang ne bey?” Chiih-è ithek è aishii Jewthek misiahò fuang khia muii. 35 Nyie rey pha ji yi Isu è yoi mage shii, ai è bran shii doh srane aishii sai, “Na de Bran Dufuii shii migi now bey?” 36 Bran ji è chang, “Masdo, ji ai ne hanyie lei, ji-è gu shii yao riig bo, chiihphado gu de aishii migi rek mua!” 37 Isu è aishii yao, “Nathek ne aishii doh jong ro, ai ne na rog shii yao ramuii pha jia ji ro.” 38 Bran ji è yao, “Ithong! Gune migi now phro iyao” Srane Isu moe shii bam ne khung dun. 39 Isu è yao, gune ichiih sohjambling shii chua pha wuii phro, ji-è miegthi pho ne doh ruii phro, chiih-è mieg wie pho ne ithi rey ruii phro. 40 Thiichiih ai rog shii um pha giak Pharisithek è ji yao pha ji yoi srane aishii sai, “Na miyao jine gathek shii miegthi rone yao pha ji asi bey?” 41 Isu è chang, nathek ne miegthi arone nathek ne ichiig arey phro, na è mieg doh rone gathek shii yao mage pha ji è nathek ne thuh de ichiig um ba ro.

John 9 (BBT1E)

In Other Versions