Mark 11 (BBT1E)

1 Isu chiih-è ai samoythek ne Jerusalem hà wuiiramuii shii, Bethphach chiih-è Bethany beng pha thawun ne ithek è nui bie ro, ithek ne Sumaro um pha phiing hà wuii srane Isu è samoy nyi shii yung ne ibi thoh ge, 2 Isu è isa shii yung ne ibi thoh ge, “Thrang ibi pha thiig hà wuii srane ji pha thiig hà nasa ne khuchung de bran è a-in dang ba pha bambao jia doh ruii phro. Ji shii sey srane ichiih shii now ruii bo. 3 Ji è rek shii branthek è sai ruii arone, ithek shii yao mage bo, hìne Masdo è chiid muii ro, hìne jog idoh thoh din ruii phro.” 4 Isu è ji yao ched ne ji pha samoy nyi ne wuii dun. Thiisa hà wuii thog mage shii Isu è nyie ro è yao pha duiine bambaoduii jia ne hò habin shii bang srane ruii iang pha doh. Samoy nyi è ji pha bambaoduii shii sey ramuii shii 5 thiichiih riu pha branthek è isa shii giung, nasa ne hì pha bambao phiing ne ruii pha ji nyie rek pha shii ramuii lei? 6 Ai è ithek shii Isu è khi-èrek ne yua pha ji yao ne chang. Ji nuii ne ji pha branthek è isa shii ji pha bambao now ne dun ge. 7 Samoy nyi è ji pha bambao shii ne Isu moe shii noh ne dun thog ruii. Thiichiih noh thog shii ithek è yung thek yiy ne bambao lakhung shii go phi shii Isu ne ji pha lakhung hà in dun phro. 8 Branthek è awaithek yung thek hun srane Isu wuii pha lumuii shii wio phi, chiih-è, bran giakthek è de iphang che srane Isu wuii pha lumuii shii wiao phi. 9 Ibi idoh luagieng pha branthek è ziak ne yao, “Hamangkhung-aphuii! Na ne bajo wie ro, hanyie Hamangkhung-aphuii pha ibeng è wuii pha bran jishii ne khirzey phi ara. 10 Hamangkhung-aphuii è Aphuii saja Dawid aphuii pha Sajathua pha ji shii ne khirzey phi phro, Hamangkhung-aphuii na ne bajo wie ro!” 11 Isu Jerusalem hà wuii thog ne Hamangkhung-aphuii ro Misiahò hà wuii srane zab shan ne riig marui ne Isu chiih-è ai samoythek ne habjuang re dun pha ji è Bethany beng pha ji shii wuii dun ro. 12 Jipha thimiang shii, Isu nane ai samoythek ne Bethany è wuiiramuii shii Isu ne bajo chi-iy-iy dun. 13 Ithek ne ìujia ruang ba shii Isu è irab bajo um pha Iphem hingmuii jia doh mage, ji-è, Isu ne ji pha Iphem hingmuii shii iwoi sow pha wuii dun. Ji-è rek magunde, ji pha Iphem ne iwoi awoi ro, nyieliieshii, ji pha hingmuii ne iwoi woi pha ishak are ba ro. 14 Ji-è, Isu ne ji pha Iphem hingmuii shii thamai, “Sudoh è thiwing ne na iwoi ne hanyie è de achie mua phro!”Ji è yao phane samoythek de yoi. 15 Isu nane ai samoythek ne Jerusalem hà wuii thog mage shii, Isu ne Hamangkhung-aphuii ro Misiahò hà wuii srane chongjai rek pha branthek shii giung ne gieng muii srane bang zia rai pha thiibliiethek shii de phun ne fen ne chiih-è branthek hanyie è pharo ruii ne chong rek pha muro thek shii srobro rek ne fen maphi. 16 Chiihphado shii, Isu è branthek shii Hamangkhung-aphuii Misiahò shii chongjai rek pha manathek shii hanyie shii de ayie yi ro. 17 Chiih-è, branthek shii yao: “Hamangkhung-aphuii ro jigigam ne hì è zey ne um ro, gu Misiahò ne zab pha branthek è sia pha hò ro, jishii, ithek è ji pha Hamangkhung-aphuii ro Misiahò ne mugo pho si pha hò rab ne ruii mua ro.” 18 Boh phabithek chiih-è Iphey yua pha masdothek è ji pha miyao yoi mage ne, ithek ne Isu shii ua pha noh, chiihphado è aishii ua pha lumuii sow ne rai. Phabi nane Iphey yua pha masdothek ne Isu shii rum, nyieliieshii bajo branthek ne ai muyua jishii bajo sangdun ro. 19 Ji è re ched ne habjuang re sha mage ne Isu chiih-è ai samoythek ne ji pha rajan thoh srane dun din phro. 20 Din pha thimiang riang, Isu nane ai samoythek ne ji pha lumuii è lua din mage shii, ji pha iphem hingmuii ne iriing è yi dang ne zab goh ne um iang pha doh phro. 21 Diyu nyie re pha ji Phithar ne nowluii srane Isu shii yao, “Masdo, riig mage bo, hì pha iphem hingmuii ne na è thamai marui pha ji è iy dun ro.” 22 Isu è ithek shii yao, Hamangkhung-aphuii shii migi rek mage bo. 23 Gu nathek shii izai yao dang phro, hanyie è lubu è migi now srane hì pha phiing shii hùg srane khamuii hà fen bo ne yao na de, jine re dun phro. Jishii, ithek è nyie yao pha ji shii migi now chid phro, chiihphado, re ruii phro, chiih-è ji re pha rek phi phro. 24 Jiphachiang è gu ithek shii izai yao dang phro, “khuchung magunde, ithek migi è Hamangkhung-aphuii shii sia srane nyie lia magunde, ithek jine mua jong rone migi rek bo, chiihphado, ithek è nyie lia pha ji ne phi ruii phro.” 25 25-26 Nathek jai srane Hamangkhung-aphuii shii sia pha saro arone, misia sia pha ishak shii nathek shii hanyie magunde gidieg rek ne de aishii khung phi bi bo, chiihphado nathek ro asi pha blia rek pha ji de Hamangkhung-aphuii è khung phi phro. 27 Isu chiih-è ai samoythek dinne Jerusalem shii wuii thog shii, Isu ne Hamangkhung-aphuii ro Misiahò hà wuii ne lua ramuii shii Phabi dukhothek chiih-è Iphey yua pha masdothek chiih-è wegthek è Isu moe shii wuii thog ruii. 28 Chiih-è, aishii sai, “Hì pha blia rek mua pha riichai ne na shii hanyie miphi lei chiih-è hanyie miyao ne rek yi lei?” 29 Isu è ithek shii chang ne yao, “Gu de nathek shii musai jia sai phro, gu musai ji ithek de chang mua arone gu de ithek shii hì pha riichai ne hanyie miphi pha ji yao phro.” 30 Gu shii de yao mage bo, “Jon è branthek shii khowo phi pha riichai hanyie miphi lei? Jine Hamangkhung-aphuii miphi bey? Asi pha jine bran phi bey?” 31 Ji sai mage ne ji pha branthek ne awaithek chung khnaing rai srane Isu musai ji chang pha nung rai dun. Ithek ne awaithek chung yao rai, khi-èrek ne chang sha rai phlei? Gethek è hì ne Hamangkhung-aphuii miphi rone chang arone, ai ne gethek shii yao din ruii phro, ji-arone nathek ne Jon shii nyie rek ne izai anow ga? 32 Chiih-è, hì ne bran miphi rone yao arone, branthek è gethek shii gui noh phro. Ji-è ithek ne rum ne ayao mua pha re dun, nyieliieshii branthek ne Jon ne chaig rone thieg jong dun. 33 Ji-è, ji pha branthek ne Isu shii athieg rone chang thog ruii.Ji-è Isu de ithek shii yao, “Chiihphado gu de nathek shii hì pha riichai è gu shii blia rek pha hanyie miphi ji gu de ayao phro.”

Mark 11 (BBT1E)

In Other Versions