Philippians 3 (BBT1E)

1 Jong sha, gu ijakthek, nawaithek ro Ithong shii ò pha ji shii lubo rek bo. Gu è igobi shii nyie zey pha ji zey din pha ne gu buii anow, chiih-è gu rek chak arone nathek shii ne ragia rek ruii phro. 2 Hanyie è ji pha awie pha jithek shii rekpho shii, jithek pha chiiethek shii, hanyie è siu shii laig pha bangchiie rek pho wie è riig bo. 3 Hanyie è izai migiangkheg pha ji mua pha hì ne gethek ro, ithek asi ro, chiih-è gethek è airo Ragung è Hamangkhung-aphuii shii misiasia chiih-è gethek chai Masi Isu rog shii ò um pha ji shii sang ro. Gethek ne fuang pha migiangkheg pha ji shii ne migi arek ro. 4 Gu ne jithek pha zabthek shii migi shii rek mua pha de um phro. Nathek è hanyie jia yi fuang pha migiangkheg pha ji shii migi rek mua phro ne now arone, ji shii than phane gu ne muna chiang um ro. 5 Gune habda rey shii, gu shii ne migiangkheg muii. Gu ne Israelith è giak pha, igang ifai Hebrew, Benjamin jad ro. Jewish Iphey è yao ne, nya ruii dang shii, gu ne Pharisi, 6 chiih-è gu è charch shii diigchiao phi pha ji shii bajo miegriie. Iphey pha muyungthek ji nuii ne branthek ne giang re arone, gu ne ichiig oi ro. 7 Jishii jithek pha manathek shii gu è phua rone tham pha ji ne thuh gu tham shii Masi chiang adubo rey dun ro. 8 Jithek pha mana ji asi bie pha, nyie yi mana gunchid pha gu Ithong Masi Isu pha khani chiang è, gu ne zab ne adubo tham dun ro. Ai chiang è gu ne zab thoh muii; gu ne zab shii izia-ikho duiine now muii, nyieliieshii gu ne Masi shii yang mua 9 chiih-è ai rog shii zab ò rek mua. Gu ne guilum ne giangthek oi ro, jithek pha ichua ne Iphey nuii pha ji è mua ro. Gu shii thuh giang um pha ji ne Masi shii migi ji è phi, giang ji ne Hamangkhung-aphuii è thog ruii chiih-è migi chiang è ro. 10 Zab gu è yang pha ji ne Masi shii thieg bo chiih-è airo hòi pha blu shii than mua chiih-è airo diigchiaothek shii thang bo chiih-è airo iy pha ji shii ai duiine rey bo. 11 Luthong ji è gui ne iy pha ji ne chai è hòi ruii phro. 12 Gu ne zab yang ge dinne zab khriig sha rone ayao ro. Gu ne nyie yi Isu Masi è awailum ne gu shii yangjong pha lasen ji yang pha bidiang ramuii ro. 13 Ji chak, gu ijakthek, gu ne yangjong rone izai anow ro; mana jia ne gu è rek, jimagunde, gu idoh shii um pha ji bia srane nyie yi ibi um pha ji thog pha gu ne bajo bidiang rek. 14 Nyie yi Hamangkhung-aphuii è chai lakhung shii Masi Isu chiang è ho pha, jieg ji mua pha gu ne miang ran ro. 15 Zab gethek ne hanyie yi luruak iweg pho ne ò now bo. Jishii nathek gai yi yoh now um arone, Hamangkhung-aphuii è ji nathek shii sang rab phi phro. 16 Jishii, ji ne yangne, cho gethek ne ò khohthek shii thuh thog pha gethek nuii luagieng pha ji shii ibi lua haro. 17 Gu shii nuii bo, gu ijakthek, gathek è nathek chiang khriig pha miiriig hanyie è luagieng pha ji shii wie yoi bo. 18 Gu è hì ne dohbi hà blebbleb yaojong, chiih-è thuh gu ne miegkhothek rog shii yao din: Ichiih ne bajo hanyie ro chaithek ne Masi bai hà iy dun pha ji shii bajo suang rab ne ruii ro. 19 Ithek ne thumuluii hà jong ruii phro, nyieliieshii ithek ro hamangkhung-aphuii ne ithek ro siu è chid pha ji ro. Ithek ne ithek è nyie wo chid pha ji shii wiangwe rek, chiih-è ithek ne ichiih sohjambling è re pha mana jia ji shii now bie ro. 20 Jishii, gethek, ne hamangkhung pha bran ro, chiih-è gethek ne gethek ro Ragiapho, hamangkhung è wuii ruii pha Ithong Isu Masi yang ne khan phro. 21 Ai ne, blu è zab pha manathek awairo khoh pha iliing shii yie mua pha ji è khoh ne gethek ro zia iy pha siu shii lai ruii ne ithek shii awairo biisiiethek siu duiine rab ruii phro.

Philippians 3 (BBT1E)

In Other Versions