Titus 1 (BBT1E)

1 Hamangkhung-aphuii ro khiao nane Isu Masi ro Guaphasamoy Phaul ro.Gu shii ne gua ne Hamangkhung-aphuii è gua pha bran ro migi shii nong phi ne ithek shii ne gathek ro migi pha Izai shii yua pha ji shii noh yi pha thoh ge, 2 Nyie yi idang pha chai luthong ji shii rai ro. Hamangkhung-aphuii hanyie ne biidiie asi pha ji ne, gethek shii hì pha chai ne ishak jao pha ibi è sbang rek, 3 khriig ishak shii ai è ji shii awai mua shii dong phi. Jine gu shii phijong ro, chiih-è gune gethek ro ragia Hamangkhung-aphuii muyung ji è yao. 4 Gethek ro ò um pha migi shii gu zai dufuii, Thaidas shii gu hì zey.Aphuii Hamangkhung-aphuii nane Masi Isu gethek ro ragia è na shii ne bushun nane liijiing phi bo. 5 Jine nyieliieshii nane zab pha thawun shii Charch pha dukho bow srane ithek thuh de nyie chid pha ji mana shii khriig rek yi pha gu na shii Khrethe hà thoh marui ro. Gu è yao pha ji nowkhlei bo: 6 Dukhowthek ne ichiig oi pho rek chid; ai ne yiy jia um bie chid, chiih-è airo aniphiing ne migiphothek um chid chiih-è aphrai mua rone chiih-è miyao anuii pho rone hanyie de athey mua rabo. 7 Charch pha dukho nya rek dang ne Hamangkhung-aphuii ro blia pha ilkhi ro, ai ne athey phoh um chid. Ai ne wiangwe pho nane khthiie lijieg pho nane phuiithiig pho nane ichiigsow pho chiih-è bang giichak pho arey mua phro. 8 Ai ne bran shii wieho chid chiih-è nyie wie shii miie rek chid. Ai ne awai shii zud ne, giang, gang, nane isiiewie um chid. 9 Ai ne nyie mua shii migi rek mua chiih-è nyie muyua shii nuii mua pha ji shii ne chuh è khoh chid. Ji duiine ai ne gai shii izai muyua ji è lububo rek mua chiih-è gidieg pho shii ne ithek ichiig doh mua yichid. 10 Chiih-è de bajo um ba, Jewish ro giang è rey pha migipho shii, hanyie ne ithek ro awie pha khani ji è gai shii gidieg nane khinrin rek. 11 Ithek mulo rai hì ne gak chid phro, nyieliieshii ithek ne nyie ayua pha ithek muyua ji è chiih-è biwo lumuii pha bang rab ne zab pha haliingphothek shii duhug rek ro. 12 12-13 Hì ne Khrethan awai ro, awaithek ro chaig jia è, hanyie izai yao shii ai è yao, “Khrethanthek ne idang khlamphothek ro, awie pha ibeymuthung, nane siikhad-ajo pha sugowthek ro.” Ji pha chiang è nane ithek shii chieg giung bo, chiihphado ithek shii de chiih-è migi um ruii phro 14 chiih-è Jew phaluiithek ne akhoh sha phro chiih-è hanyie è izai shii snai pha bran è thog pha tharothamang pha muyungthek de akhoh sha phro. 15 Hanyie ne awai è awaishii igang lei ne zab awai shii igang ro; jishii hanyie yi zia nane migi arekpho, ithek ro khani nane siuthek ne zab zia ro. 16 Ithek ne yao ithek ne Hamangkhung-aphuii shii thieg ro, jishii ithek ro blia è ne aishii snai muii. Ithek ne khjaipho nane miyao shii anuiipho ro, ithek ne nyie de wie rek pha a-ò ro.

Titus 1 (BBT1E)

In Other Versions