Titus 1 (TOMA)

1 Nɛ̀i gè ga Pɔle, gè ga GALA ná-botiɠɛ nui ta Yesu Kilista ná-keelai, nà ɠa gè nii wosu. Zɔiti GALA ge yiimazeɠeni ga tiye, é tèʋegɛ ga gè ʋa ga tiye, ti ɠidaaleʋe, ti gaamai ɠwɛɛ, nii a kɛ ti eteai ziɛ wooɠɛɠiladai zu GALA bɛ, 2 ga ti ɠɔoɠɔ zɛnvui ma ɠitogi zɔlɔɔ. Naama yɛnvui ma minazeɠegi woni ade ʋɛ kaite aisa wɔlɔwɔlɔi, GALA zea, nii é la zɛɛ woga. 3 Ziima yeeɠɛɠalai zeeliai ma, é daawooi ʋilɛni su, ga keela wooi nii é kalivaani mà, gè daazeelizu ga GALA ná-devei, de Ɠizo Nui. 4 Nà è luʋɔsu, dòun ɠitei Tite, de ɠidaaleʋe ʋelei vai zu faa zii ɠilagi nɔ ma. Ɠɛɛɠɛ GALA ta de Ɠizo Nui Yesu Kilista, ti zaalai la è ma, ti ziilɛigi ve è ʋɛ. 5 Gè è yɛni Kelɛte, nii a kɛ faiti ti ɠaa la ɠulani ba, è naati gaaɠula ba, è Egilisi lotuɠɔiti sei taai ɠilagilagi pɛ su, é zoloo devei naa ma, nii gè feeni è ya. 6 Egilisi lotuɠɔiti ti ɠilagilagi ti maanɛɛʋɛ ti ɠɛ ga zunui nii peelalazu la ba, é ɠɛ ga anza ɠila kɛɛ nui, ná-dointi ti ɠɛ ga kidaaleʋe nuiti, ti mina ɠɛ ga tuʋa ʋele ɲɔu nuiti, ti-ziɛ ʋelei zu, ti mina ɠɛ ga kololala nuiti. 7 Mazɔlɔɔ kɛni Egilisi ɠundiɠii ɠɛ ga nui nii peelalazu la ba. Tɔ ɠa é makɛsu GALA ná-faiti ma. É mina ɠɛ ga gaazulɛɛ nu, ɓaa ziiʋilɛ nu, é mina ɓɔɠɔ ve dɔɔi ya, é mina ɠɛ ga kpɔɛleʋe nu, é mina naavolo ɠaiziɛ kazemazu. 8 Kɛni é ɠɛ ga wɛɛn zɛsɛbo nu. Nii pagai, naa nɛɛ bɛ. Kɛni é ɠɛ ga kidafaawu nu, é lelebo, é ɲade, é zoo ɓɔɠɔ zosu. 9 Kɛni é ɠili lada ɓɔɛi ʋa, nii soloogai kalagi ma é sɔlɔɔgai. Naazu toɠa zoo zɔiti iɲɔdɔɔzu gaamai ma ɠalagi zu, toɠa pilɛ sɔlɔɔ maaɠaali nuiti ma. 10 Kololala nu mɔinmɔin ka kidaaleʋe nuiti saama, ma un ge daa ma mɛɛ ga niiti ti wola ɠilizu tati pɛlɛʋolu vai ʋa, nii a kɛ ti ʋa ɠizo, ti ga wafuun kpɔɛzuɠula nuiti, ti ga nuɓusɛiti kaka nuiti. 11 Kɛni è ti laaɠulu, mazɔlɔɔ ta ɗa pɛlɛyeɠeiti kɛ unga wuulee, ti ɗa kalagi wo, nii maa la nɛɛni, ga ti kazemazu anii zɔlɔɔ. 12 Ti zaama, ti ɓɔɠɔ nui ta, ti pɛtɛsu ga gala goo wo nui ta, naa ɠɛni ma: «Kelɛte nuiti ta ga zɛɛ wo nuiti yeenɔpɛ, sua ɲɔiti be, ɠulukpu nuiti, dɔɔʋɛ nuiti.» 13 Niima zeele wooi ɠa ga gaamai. Naa ɠa é ba, zelilo ti ma ɠɛzɛɠɛzɛ, naa ɠa a kɛ ti ɠili kidaaleʋe ɠiteɠitegi ʋa, 14 ti mina ɠili Zuifuiti ta-vaalaali wafuungiti ba, ti mina ɠili ɓalaa nuiti ta-leveiti ba, niiti ti ʋoluavegai gaamai ʋa. 15 Anii pɛ ɲadegɛ naati bɛ, niiti ti ɲadegai. Kɛlɛ ani nɔpɛ ge la ɲadeni naati bɛ, niiti ti ɠɔzɔai, ti ga kidaaleʋelala nuiti. Ta-ɠeleɠelegi ta ta-ɠisiɛi pɛ ka kɔzɔai. 16 Ta ɠɛɛzu ti GALA kwɛɛ, kɛlɛ ti-ziɛ ʋelei zu, ta ɠɛlɛzu ba. Ti wɔinzeɠeʋɛ, kololala nuiti, ti la zooga ti ʋa kɛɛwoti ʋagɔ nɔpɛ kɛ.

Titus 1 (TOMA)

In Other Versions