1 Corinthians 9 (JSNT)
1 ଞେନ୍ ଇନି ଅନୁରନ୍ ଞାରାଙ୍ଲାଞନ୍ ଆ ମନ୍ରା ତଡ୍ ପଙ୍ ? ଞେନ୍ ଇନି ଅନାପ୍ପାୟ୍ ଞଙ୍ନେମର୍ ତଡ୍ ପଙ୍ ? ଞେନ୍ ଇନି ପ୍ରବୁ ଜିସୁଲେନ୍ ଏର୍ଗନିୟ୍ ପଙ୍ ? ଆମ୍ୱେଞ୍ଜି, ଞେନ୍ ପ୍ରବୁନ୍ ଆସନ୍ ଲରୁମ୍ଲାଞନ୍ ଆ କାବ୍ବାଡ଼ା ଆ ଜଅଜି ତଡ୍ ପଙ୍ ? 2 ଆନ୍ନାମରଞ୍ଜି ଞେନ୍ଆଡଙ୍ ଅବୟ୍ ଅନାପ୍ପାୟ୍ ଞଙ୍ନେମର୍ ଗାମ୍ଲେ ଅଃଜ୍ଜାଲିଁୟ୍ଜି ଜନଙ୍ଡେନ୍ ଆମ୍ୱେନ୍ ଏଜାଲିଁୟ୍, ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ପ୍ରବୁନ୍ ଆମଙ୍ ଏମ୍ରାୟ୍ଲନ୍ ସିଲଡ୍ଲ୍ଲନ୍, ଞେନ୍ ଅବୟ୍ ଅନାପ୍ପାୟ୍ ଞଙ୍ନେମର୍ ଗାମ୍ଲେ ଆମ୍ୱେଞ୍ଜି ଏଜନାଏନ୍ । 3 ଆନାଜି ଞେନ୍ଆଡଙ୍ ଗବ୍ରୟ୍ତିଁୟ୍ଜି ଞେନ୍ ଆନିଞ୍ଜିଆଡଙ୍ ଏନ୍ନେଲେ ଜାଲଙ୍ତାଜି; 4 ଗାଗାନେନ୍ ଜୋମ୍ଜୋମ୍ନେନ୍ ଆସନ୍ ଅମଙ୍ଞେନ୍ ଅଦିକାର ତଡ୍ ପଙ୍ ? 5 ଞେନ୍ ଆନ୍ନା ଅନାପ୍ପାୟ୍ ଞଙ୍ନେମରଞ୍ଜି, ପ୍ରବୁନ୍ ଆ ବୋଞାଙ୍ଜି ଡ କେପାନ୍ ଅନ୍ତମ୍ ଅବୟ୍ ଡର୍ନେବଜନ୍ ବୟନ୍ ବିବାଡାଲନ୍ ଆନିନ୍ ସରିନ୍ ବନୁଲ୍ଲେନ୍ ଆସନ୍ ଅମଙ୍ଞେନ୍ ଅଦିକାର ତଡ୍ ପଙ୍ ? 6 ଅନମେଙନ୍ ଆସନ୍ ଞେନ୍ ଡ ବର୍ନବାନ୍ ତୁମ୍ ପଙ୍ ଏକାବ୍ବାଡ଼ାନାୟ୍ ? 7 ଅବୟ୍ ମନ୍ରାନ୍ ଆ ତଙ୍କାନ୍ ମା କର୍ସଡାଲେ ଆନିନ୍ ସିପ୍ପାୟ୍ କାବ୍ବାଡ଼ାନ୍ ଲୁମେ ପଙ୍ ? ଅବୟ୍ ମନ୍ରାନ୍ ଦ୍ରାକ୍ୟାନୁବନ୍ ଗୁଲେ ଦ୍ରାକ୍ୟା କୋତ୍ତାନ୍ ସିଲଡ୍ ଦ୍ରାକ୍ୟାଜନ୍ ରୋଡ୍ଲେ ଅଃଜ୍ଜୋମେ ପଙ୍ ? ଅବୟ୍ ମନ୍ରାନ୍ ମେଣ୍ଡାନ୍ ବନ୍ଲେ ଆଡ଼ୁବନ୍ ଅଃଗାଏ ପଙ୍ ? 8 ଞେନ୍ ଇନି ମନ୍ରାନ୍ ଅନ୍ତମ୍ କେନ୍ ଅଡ଼୍କୋନ୍ ଆ ବର୍ନେ ବର୍ତନାୟ୍ ପଙ୍ ? ମୋସାନ୍ ଆ ବନାଁୟ୍ବର୍ଲୋଙ୍ କେନ୍ ଅଡ଼୍କୋନ୍ ଅଃବ୍ବର୍ନେ ପଙ୍ ? 9 ଇନିଆସନ୍ଗାମେଣ୍ଡେନ୍ ମୋସାନ୍ ଆ ବନାଁୟ୍ବର୍ଲୋଙ୍ କେନ୍ଆତେ ଆଇଡିଡ୍ ଡକୋ, “ଅବ୍ଞାତାଙନ୍ ଆ ତଅଡ୍ଲୋଙ୍ ଏଡାମୁଡଙ୍ ।” ଇସ୍ୱରନ୍ ଇନି ଅର୍ରତାଙନ୍ ତୁମ୍ ଆସନ୍ ଇୟମ୍ତେ ପଙ୍ ? 10 ଆନିନ୍ ଇନ୍ଲେଞ୍ଜି ଆସନ୍ କେନ୍ ଆ ବର୍ନେ ଅଃବ୍ବର୍ରନ୍ ପଙ୍ ? ଓଓ, ଇନ୍ଲେନ୍ ଆସନ୍ ଆଇଡିଡ୍ ଡେଲୋ; ଆନା ଅର୍ରତନ୍ ଜନ୍ରୋମନ୍ ଞାଙ୍ତାୟ୍ ଗାମ୍ଲେ ଆସାଡାଲନ୍ ଆନିନ୍ ଅର୍ରତନ୍, ଆରି ଆନା ଅବ୍ଞାତନ୍ ଜନ୍ରୋମନ୍ ବନ୍ତାନ୍ ଞାଙ୍ତାୟ୍ ଗାମ୍ଲେ ଆସାଲନ୍ ଆନିନ୍ ଅବ୍ଞାତନ୍ । 11 ଇନ୍ଲେନ୍ ଅମଙ୍ବେନ୍ ପୁରାଡ଼ାନ୍ ଆ ଜମ୍ମଲ୍ ଏବୁଡ୍ଲାୟ୍, ଆରି ଇନ୍ଲେନ୍ ଅମଙ୍ବେନ୍ ସିଲଡ୍ ପୁର୍ତିନ୍ ଆ ଜନ୍ରୋମ୍ ଏଗଡ୍ଲାୟ୍ ଡେନ୍, ତିଆତେ ଅଃଡ୍ଡେଏ ପଙ୍ ? 12 ଆନ୍ନାମରଞ୍ଜି ଅମଙ୍ବେନ୍ ସିଲଡ୍ ବନ୍ତାନ୍ ଏଞାଙ୍ତାୟ୍ ଗାମ୍ଲେ ଆସାଲନ୍ ଡକୋଲଞ୍ଜି ଡେନ୍, ଏତ୍ତେଲ୍ଡେନ୍ ଆନିଞ୍ଜି ସିଲଡ୍ ଇନ୍ଲେନ୍ ଆରି ଗୋଗୋୟ୍ ଏଃନ୍ନାସାନାୟ୍ ପଙ୍ ?ବନ୍ଡ କ୍ରିସ୍ଟନ୍ ଆ ମନଙ୍ବର୍ ଅନପ୍ପୁଙ୍ବରନ୍ ଆସନ୍ ଏଙ୍ଗାଲ୍ଡେନ୍ ଡନଙ୍ଡଙନ୍ ଅଡ଼ୋଡଙାୟ୍ ତଡ୍, ତିଆସନ୍ ଅଡ଼୍କୋନ୍ ସଏଲେ ଇନ୍ଲେନ୍ ଏଡକୋତନାୟ୍ । 13 ଆନାଜି ସରେବାସିଂଲୋଙନ୍ କାବ୍ବାଡ଼ାତଞ୍ଜି ଆନିଞ୍ଜି ସରେବାସିଙନ୍ ସିଲଡ୍ ଜନୋମନ୍ ଞାଙ୍ତଜି, ଆରି ଆନାଜି ତରୋମ୍ମୋଡ୍ ତନମ୍ପିଲ୍ଲୋଙନ୍ ଡକୋଲନ୍ କାବ୍ବାଡ଼ାତଞ୍ଜି, ଆନିଞ୍ଜି ତରୋମ୍ମୋଡ୍ ତନମ୍ପିଲ୍ଲୋଙନ୍ ସିଲଡ୍ ଜନୋମନ୍ ଞାଙ୍ତଜି ଗାମ୍ଲେ ଆମ୍ୱେଞ୍ଜି ଜନାଜି ତଡ୍ ପଙ୍ । 14 ତିଅନ୍ତମ୍, ଆନାଜି ମନଙ୍ବରନ୍ ଅପ୍ପୁଙ୍ବର୍ତଜି, ଆନିଞ୍ଜି ତି ଆ କାବ୍ବାଡ଼ା ବାତ୍ତେ ଅମେଙ୍ତଜି, କେନ୍ଆତେ ପ୍ରବୁନ୍ ବର୍ରନେ । 15 ବନ୍ଡ ଞେନ୍ କେନ୍ ଅନ୍ତମ୍ ଅଃନ୍ନେମ୍ମେଲନାୟ୍, ଆରି ଞେନ୍ ଆସନ୍ କେନ୍ ଅନ୍ତମ୍ ଲୁମ୍ବା ଗାମ୍ଲେ ଞେନ୍ କେନ୍ ଅଡ଼୍କୋନ୍ ଅଃନ୍ନିଡାୟ୍; ଇନିଆସନ୍ଗାମେଣ୍ଡେନ୍ କେନ୍ ଦନର୍ପଞେନ୍ ଇନ୍ନିଙ୍ ତଡ୍ ଗାମ୍ଲେ ଆନ୍ନାମର୍ ଆବର୍ତନେନ୍ ସିଲଡ୍, ଆର୍ପାୟ୍ ଞେନ୍ ରବୁଲିଁୟ୍ ଡେନ୍ ମନଙ୍ ଡେତେ । 16 ଞେନ୍ ମନଙ୍ବରନ୍ ଅରପ୍ପୁଙ୍ବର୍ତାଞନ୍ ଞେନ୍ ଅଃଦ୍ଦର୍ପନାୟ୍, ଇନିଆସନ୍ଗାମେଣ୍ଡେନ୍ ଞେନ୍ ତିଆତେ ଅଃଲ୍ଲୁମ୍ଲାୟ୍ ଡେନ୍ ଅଃଡ୍ଡେଏ, ଆରି ଞେନ୍ ମନଙ୍ବରନ୍ ଅଃନ୍ନପ୍ପୁଙ୍ବର୍ରାୟ୍ ଡେନ୍, ଞେନ୍ ପନବ୍ରଡନ୍ ଞାଙ୍ତାୟ୍ । 17 ଇସ୍ସୁମ୍ଡମ୍ଞେନ୍ ବାତ୍ତେ କେନ୍ଆତେ ଲୁମ୍ଲାୟ୍ ଡେନ୍, ଞେନ୍ ଆସନ୍ ପୁରସ୍କାରନ୍ ଡକୋ; ଆରି ଇସ୍ସୁମ୍ଞେନ୍ ବାତ୍ତେ କେନ୍ଆତେ ଅଃଲ୍ଲୁମ୍ଲାୟ୍ ଜନଙ୍ଡେନ୍, ସେବା କାବ୍ବାଡ଼ାନ୍ ଆ ବିଡ଼ାର୍ ଇସ୍ୱରନ୍ ଞେନ୍ଆଡଙ୍ ତିୟ୍ଲିଁୟ୍, ତିଆସନ୍ ଞେନ୍ କେନ୍ଆତେ ଲୁମ୍ତାୟ୍ । 18 ଏତ୍ତେଲ୍ଡେନ୍ ଓଞୋଲ୍କୁୟ୍ଞେନ୍ ଇନି ? ଞେନ୍ ଇନ୍ନିଙ୍ ଏର୍କନର୍ସନ୍ ଅଡ଼୍କୋ ମନ୍ରାନ୍ ଆମଙ୍ ମନଙ୍ବରନ୍ ଅପ୍ପୁଙ୍ବର୍ତାୟ୍, କେନ୍ଆତେ ମା ଓଞୋଲ୍କୁୟ୍ଞେନ୍, ତିଆସନ୍ ଞେନ୍ ମନଙ୍ବରନ୍ ଅରପ୍ପୁଙ୍ବର୍ତାଞନ୍ ଆସନ୍ ଞେନ୍ ଓଞୋଲ୍କୁଜନ୍ ଇନ୍ନିଙ୍ ଅଃବ୍ବେଡ୍ବେନ୍ । 19 ଇନିଆସନ୍ଗାମେଣ୍ଡେନ୍ ଏଙ୍ଗାଲ୍ଡେନ୍ ଞେନ୍ ଗୋଗୋୟ୍ ମନ୍ରାନ୍ ଞାଙ୍ଲେ ରପ୍ତିତାୟ୍, ତିଆସନ୍ ଞେନ୍ ଆନ୍ନିଙ୍ ଆ କମ୍ୱାରିମର୍ ତଡ୍ ଜନଙ୍ଡେନ୍, ଞେନ୍ ଅଡ଼୍କୋ ମନ୍ରାନ୍ ଆ କମ୍ୱାରିମର୍ ଅନ୍ତମ୍ ଡେଲିଁୟ୍ । 20 ଏଙ୍ଗାଲ୍ଡେନ୍ ଞେନ୍ ଜିଉଦିମରଞ୍ଜିଆଡଙ୍ ଞାଙ୍ଲେ ରପ୍ତିଆୟ୍, ତିଆସନ୍ ଞେନ୍ ଜିଉଦିମରଞ୍ଜି ଆମଙ୍ ଜିଉଦିମରଞ୍ଜି ଅନ୍ତମ୍ ଅମ୍ମେଲନାୟ୍; ଆରି ମୋସାନ୍ ଆ ବନାଁୟ୍ବର୍ ଆଞଣ୍ଡ୍ରମ୍ତନେଞ୍ଜି ଆ ମନ୍ରାଜିଆଡଙ୍ ଆଞନାଙ୍ ଆସନ୍, ଞେନ୍ ବନାଁୟ୍ବରନ୍ ଆ ଜାୟ୍ତା ଅଃଡ୍ଡକୋଲନାୟ୍ ଜନଙ୍ଡେନ୍, ବନାଁୟ୍ବରନ୍ ଆ ଜାୟ୍ତା ଆଡ୍ରକୋତନ୍ ଆ ମନ୍ରା ଅନ୍ତମ୍ ଅମ୍ମେଲନାୟ୍ । 21 ତିଅନ୍ତମ୍ ଏଙ୍ଗାଲ୍ଡେନ୍ ଞେନ୍ ଏର୍ଜିଉଦିମରଞ୍ଜିଆଡଙ୍ ଞାଙ୍ଲେ ରପ୍ତିଆୟ୍, ତିଆସନ୍ ଞେନ୍ ଇସ୍ୱରନ୍ ଆ ବନାଁୟ୍ବର୍ ଅଃନ୍ନାଲ୍ଲେଲାୟ୍ ଜନଙ୍ଡେନ୍, କ୍ରିସ୍ଟନ୍ ଆ ବନାଁୟ୍ବର୍ ଞଣ୍ଡ୍ରମ୍ଡାଲନ୍ ଏର୍ଜିଉଦିମରଞ୍ଜି ଆମଙ୍ ଏର୍ଜିଉଦିମରଞ୍ଜି ଅନ୍ତମ୍ ଅମ୍ମେଲନାୟ୍ । 22 ଏଙ୍ଗାଲେ ଞେନ୍ ଏର୍ବପ୍ପୁମରଞ୍ଜିଆଡଙ୍ ଞାଙ୍ଲେ ରପ୍ତିତାୟ୍, ତିଆସନ୍ ଞେନ୍ ଏର୍ବପ୍ପୁମରଞ୍ଜି ଆମଙ୍ ଏର୍ବପ୍ପୁମରଞ୍ଜି ଅନ୍ତମ୍ ଅମ୍ମେଲନାୟ୍; ଏଙ୍ଗାଲ୍ଡେନ୍ ଞେନ୍ ଏଙ୍ଗାଗୋଜନଙ୍ ଆ ମନ୍ରା ଞାଙ୍ଲେ ରପ୍ତିଆୟ୍, ତିଆସନ୍ ଞେନ୍ ଅଡ଼୍କୋ ମନ୍ରାନ୍ ଅନ୍ତମ୍ ଅମ୍ମେଲନାୟ୍ । 23 ଞେନ୍ ମନଙ୍ବରନ୍ ଅପ୍ପୁଙ୍ବର୍ରେ, ଆସିର୍ବାଦନ୍ ଆଞନାଙ୍ ଆସନ୍ ଞେନ୍ କେନ୍ ଅଡ଼୍କୋନ୍ ଲୁମ୍ତାୟ୍ । 24 ଅଣ୍ଡିନ୍ନେ ପଡ଼ିଆଲୋଙନ୍ ଆନାଜି ଇର୍ତଜି, ଆନିଞ୍ଜି ଅଡ଼୍କୋଞ୍ଜି ଇର୍ତଜି, ବନ୍ଡ ଆବୟ୍ନେନ୍ ତୁମ୍ ଓଞୋଲ୍କୁଜନ୍ ଞାଙ୍ତେ, ଆମ୍ୱେଞ୍ଜି କେନ୍ଆତେ ଜନାଜି ତଡ୍ ପଙ୍ ? ଆମ୍ୱେଞ୍ଜି ଏଙ୍ଗାଲ୍ଡେନ୍ ଓଞୋଲ୍କୁଜନ୍ ଞାଙ୍ଲେ ଏରପ୍ତିତେ, ତିଅନ୍ତମ୍ ଇର୍ବା । 25 ଅଙ୍ଗା ମନ୍ରା ଅଣ୍ତିନ୍ନେଲୋଙନ୍ ଅଲ୍ବାଡ୍ଡତେ, ଆନିନ୍ ଞଙ୍ନେ ଇଙନ୍ ଅଡ଼୍କୋ ବର୍ନେଲୋଙନ୍ ଜୁଲନ୍ ଡକୋତନ୍; ଆନିଞ୍ଜି ଅଙ୍ଗା ରନୁବ୍ବବ୍ ଆଞନାଙ୍ ଆସନ୍ ଇର୍ତଜି, ତି ଆ ରନୁବ୍ବବ୍ ମୋସ୍ସାତେ, ବନ୍ଡ ଇନ୍ଲେନ୍ ଅଙ୍ଗା ରନୁବ୍ବବ୍ ଆଞନାଙ୍ ଆସନ୍ ଇର୍ତବୋ, ତି ଆ ରନୁବ୍ବବ୍ ଆଙ୍ଗିୟ୍ ଅଃମ୍ମୋସ୍ସାଏ । 26 ତିଆସନ୍, ଞେନ୍ ଏର୍ସନେଙ୍ସେଙନ୍ କାଣ୍ଡାରେଙ୍ ଅଃନ୍ନିରେ; ଅବୟ୍ ସନେଙ୍ସେଙ୍ ଜାଗାଲୋଙନ୍ ତୁଙ୍ତେ ଗାମ୍ଲେ ଞେନ୍ ଇର୍ତେ, କୁମ୍କୁମ୍ସିଲନ୍ ଆରଲ୍ତିଡ୍ତେଞ୍ଜି ଆ ମନ୍ରାଜି ଅନ୍ତମ୍ ଞେନ୍ ତିଡ୍ତାୟ୍, ବନ୍ଡ ଞେନ୍ କାଣ୍ଡାରେଙ୍ ରିଙ୍ଗେନ୍ ଅଃତ୍ତିଡାୟ୍ । 27 ଆନ୍ନାମରଞ୍ଜି ଆମଙ୍ ମନଙ୍ବରନ୍ ଅପ୍ପୁଙ୍ବର୍ରାୟ୍ ଜନଙ୍ଡେନ୍ ଏଙ୍ଗାଲ୍ଡେନ୍ ଞେନ୍ ଅଃବ୍ବନାସ୍ସେଡାଇଁୟ୍, ତିଆସନ୍ ଡଣ୍ଡନ୍ ସଏଲେ ଡଅଙ୍ଞେନ୍ ରବ୍ଡୋଲେ ଆବ୍ବୟ୍ଲେ ଡକୋତନାୟ୍ ।
In Other Versions
1 Corinthians 9 in the ANTPNG2D
1 Corinthians 9 in the BNTABOOT
1 Corinthians 9 in the BOATCB2
1 Corinthians 9 in the BOGWICC
1 Corinthians 9 in the BOHNTLTAL
1 Corinthians 9 in the BOILNTAP
1 Corinthians 9 in the BOKHWOG
1 Corinthians 9 in the KBT1ETNIK
1 Corinthians 9 in the TBIAOTANT