Nehemiah 9 (KAPI)
1 1-2 Di madalua maa haa laangi o di malama deelaa, gei digau Israel ga dagabuli belee haga onge, e haga modongoohia nadau manawa gee gi nadau huaidu. Digaula guu wwae ginaadou gi daha mo digau tuadimee, gu ulu nadau gahu manawa gee, ge guu wanga nadau gelegele dogolia gi nadau libogo, e haga modongoohia nadau manawa gee. Ga nomuli, gei digaula gaa tuu gi nua, ga daamada ga haagi nadau huaidu mo nia huaidu o nadau maadua mmaadua. 3 Di waalooloo o nia aawaa e dolu, nia haganoho o Dimaadua go di nadau God ne dau ang gi digaula, ga nomuli, nia aawaa labelaa e dolu, digaula ga haagi nadau ihala mo di daumaha gi Dimaadua go di nadau God. 4 Aanei go digau Levi ala nogo tuu i hongo nadau hada: go Jeshua, Bani, Kadmiel, Shebaniah, Bunni, Sherebiah, Bani mo Chenani. Digau aanei e dalodalo gi nua ang gi Dimaadua go di nadau God. 5 Gei aanei go digau Levi: go Jeshua, Kadmiel, Bani, Hashabneiah, Sherebiah, Hodiah, Shebaniah mo Pethahiah, ala ga helekai boloo:“Goodou tuu gi nua, hagaamuina Dimaadua di godou God.Goodou hagaamuina gaa hana hua beelaa!Gidaadou huogodoo gi hagaamuina dono ingoo madamada,ma e aha maa tadau hagaamu la digi dohu loo.” 6 Digau Israel gaa hai talodalo deenei,“Meenei Dimaadua, Kooe hua go Yihowah,ma Kooe hua dela ne hai di langimo nia heduu ala i lala di langi.Ma Kooe hua dela ne hai henuailalamo di moana mono hagahonu huogodoo,gei Goe gu haga mouli nia maa huogodoo.Di buini gau di langi gu dogoduligu daumaha adu gi di Goe. 7 Meenei Dimaadua, Kooe dela di God dela ne hilihili a Abramgaa lahi a mee gi daha mo di waahale go Uri tenua go Babylonia,gaa gahi dono ingoo hoou bolo Abraham. 8 Goe ne iloo bolo mee e manawa dahi adu gi di Goe,gei Goe guu hai dau hagababa gi mee.Goe ne hagababa bolo Goe gaa wanga gi meetenua o digau Canaan, tenua digau Hittite mo digau Amor,tenua digau Perizzite, digau Jebus mo digau Girgash,belee hai di gowaa e noho ai dono hagadili.Goe gu haga gila dau hagababa dela ne hai,idimaa Goe e manawa dahi. 9 “Goe guu mmada labelaa gi nia hagaduaduao madau maadua mmaadua ala nogo i Egypt,ge gu longono e Goe nadau dangidangii di hagamaamaa i taalinga Tai Mmee. 10 Goe guu hai au mogobuna haga goboinae hai baahi ang gi di king,mo ang gi digau aamua a maamo nia daangada huogodoo dono henua,idimaa, Goe gu gidee nadau hagaduadua au dama.Deelaa ga gila ai do ingoogaa dae mai gi dangi nei. 11 Goe guu hai dau ala i lodo tai ang gi au dama,ge guu lahi digaula i lodo tai bagu.Goe guu hai digau ala e waluwalu digaulagi mmaalemu gi lodo tai,gadoo be di hadu ma ga abulu gi lodo di moana. 12 Goe guu dagi digaula gi di baahi gololangi i di aa,ge boo Goe ne haga maalama digaula gi di ulaula di ahi. 13 Goe ne haneia i di langi gi hongo di Gonduu Sinai,gei gu helekai gi au daangada.Goe guu wanga gi digaula nia haganoho ala e donumo nia agoago ala e humalia. 14 Goe gu hagi anga gi digaulabolo gi hagamadagu ina di Laangi Sabad,mo di wanga gi Moses nia haganohobolo gi hagi anga go mee gi digaula. 15 “I di nadau madagoaa ne hiigai,gei Goe guu wanga gi digaula nia palaawaa mai i di langi;i di nadau madagoaa ne hieinu,gei Goe guu wanga gi digaula nia wai mai di hadugalaa.Goe guu hai gi digaula bolo gii hula gi hai mee gi tenuadela ne hagababa Kooe bolo e wanga gi digaula. 16 “Gei madau maadua mmaadua gu hagamuamua ge lodo hamaaloo,gu hagalee hiihai e hagalongo gi au haganoho. 17 Digaula hagalee hiihai e hagalongo adu gi di Goe,gu de langahia e ginaadou au mogobuna huogodooala ne hai i nadau baahi.I lodo nadau hagamuamua,digaula gu hilihili di nadau dagibelee dagi ginaadou gi muli gi di mouli hege i Egypt.Gei Goe go di God dela e manawa dumaalia ge aloho,hagalee hagalimalima e hagawelewele.Do dumaalia e aamua, Goe hagalee diiagi digaula, 18 ma e aha maa digaula guu hai di nadau ada balu gode hai gadoo be tama kau daane,mo di helekai bolo deelaa di godne laha mai ginaadou i Egypt!Meenei Dimaadua, e damanaiee huoloo nadau hagahuaidu Goe! 19 Gei goe digi diiagi digaula i lodo di anggowaa,idimaa, do dumaalia le e damanaiee.Goe digi daawa ina gi daha di baahi gololangibe di ulaula o di ahi dela ne haga modongoohia gi digauladi ala dela e hula iei digaula boo mo aa. 20 Mai i do manawa dumaalia,Goe gu helekai gi digaula i nadau mee ala bolo gi heia.Goe gu haangai digaula gi nia ‘manna’,gei gu haga inu digaula gi nia wai. 21 I lodo nia ngadau e mada haa i lodo di anggowaa,gei Goe gu madamada humalia i digaula,digaula guu dohu i nadau mee huogodoo.Nadau gahu digi mooho,gei nadau wae digi hagahula ge digi mmae. 22 “Goe gu dumaalia bolo digaula gi aalii nnagadilinga henua ala i golo,nia henua ala laa daha mo nadau geinga.Digaula gu aali i Heshbon,tenua dela e dagi go Sihon,mo Bashan, tenua dela e king go Og. 23 Goe gu haga dogologo nadau damagii hai be nia heduu ala i di langi,gei gu dumaalia gi digaulabolo gii gila gii noho i tenua dela ne hagababa Kooegi nadau maadua mmaadua. 24 Digaula guu kumi tenua go Canaan,gei Goe gu haga magedaa nia daangada ala nogo noho i golo.Goe guu wanga gi au dama di mogobunabolo gi heia nadau hiihai ang gi nia king mo digau Canaan. 25 Au daangada guu kumi nia waahale maaloo,mo nia henua gelegele humalia,mo nia hale e honu i nia maluagina,mo nia monowai ala guu lawa di geli,mo nia laagau olib, nia laagau ala e huwa, mo nia hadagee waini.Digaula gu maaluu nadau gai nia mee aanei, guu pedi.Digaula gu manawa lamalia gi nnagadilinga humaliaala ne wanga Kooe gi digaula. 26 “Malaa, au daangada gu hai baahimo di de hagalongo adu gi di goe,ge guu huli gi daha mo au haganoho.Digaula gu dadaaligi nia soukohp ala nogo agoago digaula,ala ne hai gi digaula bolo ginaadou gii huli gi muli adu gi di Goe.Nnolongo e logo, gei digaula guu hai hagahuaidu Goe. 27 Deelaa laa, gei Goe gu dumaalia bolo nadau hagadaumeegi kumidia mo di dagi digaula.I lodo nadau haingadaa,digaula ga gahigahi Goe gi hagamaamaa ina ginaadou,gei Goe gu helekai gi digaula mai i di langi.Mai do dumaalia aamua,Goe guu wanga gi digaula nadau dagiala ne haga dagaloaha ginaadou. 28 Di aumaalia ma ga hanimoi labelaa,gei digaula gu ihala labelaa,gei Goe gu dumaalia labelaagi nadau hagadaumee gi kumidia digaula.I di nadau lui nadau manawa,ga tangi adu gi di Goe gi benabena ina ginaadou,Goe gu hagalongo gi digaula mai i di langi.Nnolongo e logo, gei Goe gu haga dagaloaha digaulamai do dumaalia aamua. 29 Goe gu agoago gi digaula gi hagalongo gi au agoago,gei i lodo nadau hagamuamua,digaula guu huli gi daha mo au haganoho,ma e aha maa digaula gu iloo bolo di ala dela e hana gi di moulila go di haga gila aga au haganoho.Digaula gu hagamuamua ge lodo hamaaloo,ge gu de hiihai di hagalongo adu gi di Goe. 30 Nia ngadau e logo, gei Goe gu agoago digaulamai do manawa hagakono.Gei Goe guu hai gi au soukohp gi helekai,gei di maa au daangada nogo hagalongoduli,dela gei Goe ga dumaalia gi nia guongo ala i gologi kumidia digaula. 31 Malaa, mai do dumaalia damanaiee,gei Goe digi diiagi digaula,be e hagahuaidu digaula gi hagalee.Goe go di God manawa dumaalia ge e manawa aloho. 32 “Meenei God, go di madau God dela koia e aamua huoloo!Goe e hagamadagudia ge e mahi huoloo!Goe e manawa dahi, e daahi au hagababa mai gi gimaadou.Mai di madagoaa nia king o Assyria ne hagaduadua gimaadou,gaa dae mai loo gi dolomeenei,madau hagaduadua la gu damanaiee huoloo!Madau king, madau dagi, madau gau hai mee dabu,madau soukohp, madau maadua mmaadua,mo madau daangada huogodooguu noho i lodo di hagaduadua damanaiee. 33 Goe guu donu i do hagaduadua gimaadou.Goe dela e manawa dahi, ma e aha maa gimaadou guu hai di huaidu. 34 Madau maadua mmaadua, madau king, madau dagi,mo madau gau hai mee dabu gu hagalee haga gila aga au haganoho.Digaula gu hagalee hagalongo gi au helekai, mo au aago. 35 Mai i do manawa humalia,nia king nogo dagi au daangadai lodo tenua damana ge humalia dono gelegeledela ne wanga Kooe gi digaula.Gei digaula digi huli gi daha mo nadau huaidu,ga hai hegau adu gi di Goe. 36 Malaa, dolomeenei, gei gimaadou guu hai nia hegei lodo tenua dela ne gaamai Kooe gi gimaadou,tenua humalia deenei dela e gaamai madau meegai. 37 Nia hagahonu o tenua deenei le e hula hua gi nia king,ala guu dugu Kooe belee dagi gimaadou,idimaa, gimaadou gu ihala.Digaula e hai nadau hiihai mai gi gimaadou mo madau manu.Gimaadou guu noho i lodo nia haingadaa llauehaa!” 38 “Mai i tagadilinga deenei guu lawa di hai, gimaadou ala go digau o Jew, gimaadou e hai di madau hagababa hagalabagau, e hihi gi lodo di lau beebaa, gei madau dagi mo digau Levi mo madau gau hai mee dabu gu haga modongoohia di maa gi nadau maaga.”