Nehemiah 9 (TOMA)
1 Alugi naa nɔ ma volo ʋuufelegɔ maazu naanigɔi (24) ma, Izilayɛle nuiti ti ɠaalɛɛni ba ga ti zugi zo, ti maaɠilia ɠɛni de ga saa wɔlɔ wo seɠei, ti fufiligi ʋu tɔungiti ma. 2 Izilayɛle nuiti ti ɠulani zɔɔma ziiti saama, ti lo yɛ, ti lo zɔ ga ga ta-kotoiti, ta ti-mɛmɛwolani ta-vaaɠaaza golaiti. 3 Naa ʋoluma ti ɠɛni wuzeɠezu, ti lo, ti woilo ta-ƓALAGI Ɠɔoɠɔ GALAGI ná-tɔ sɛʋɛi zu wooi ma, nii ti ɠɛni kalasu lɛlɛ saʋagɔ laawu, lɛlɛ saʋagɔ ɠili daawu ti nɔkɔ ta-ƓALAGI Ɠɔoɠɔ GALAGI wu, ti lo zɔ ga ga ta-ɠotoiti. 4 Ʋɛ ná ɓɛtɛa ɠɛni de ga Levi nuiti tosuʋɛ, Levi nui niiti ti loni miná: Zozuwe, Ɓani, Kadimiyɛle, Saɓania, Ɓuni, Seleɓia, Ɓani, ta Kenani, ti ɗa wooɠula gola ta-ƓALAGI, Ɠɔoɠɔ GALAGI ma. 5 Naa ʋoluma, Zozuwe, Kadimiyɛle, Ɓani, Ɠasabiniya, Seleɓia, Wodiya, Saɓania ta Petayia, tɛiti ti ɠɛni ga Levi nuiti, ti ɠɛni ma: «À wuzeɠe, wo mamagi ve wa-ƓALAGI Ɠɔoɠɔ GALAGI ʋɛ, ɠɔoɠɔ!«Ɠɔoɠɔ GALAGI, ɛsɛ gilagilagi pɛ ge ɗa-lɛbiya laaseigi maamusɛ, nii bɔɔlɔai é ɓudɛ mamagi ta maamusɛi pɛ maazu. 6 «Ɗa ɠila kpe ka è ná, Ɠɔoɠɔ GALAGI, ɗa ɠa è geeɠɔlɔgi ɓɛtɛa, geeɠɔlɔgi niiti ti maaɠoozaai, ta somideɠaiti, zooi ta gaa aniiti kpein, kpoloɗɛiti ta ti wu aniiti. Ɗa ɠa è zɛnvui veezu kpɛtɛ aniiti kpein zea, geeɠɔlɔgi ta gaa aniiti kpein ta nɔkɔsu è wu. 7 «GALA, Ɠɔoɠɔ GALAGI, ɗa ɠa è yiimazeɠeni ga Abalame, ɗa ɠa è kulani Uul ʋa, Ɓaɓilɔne yooi zu, è daaseigi ʋɛɛ ga Abalaame. 8 È kaani ga toɠa ga wooɠɛɠila nu è ʋɛ, è minazeɠegi ɓɛtɛ wo yɔɠɔzu wa tɔ, è minazeɠeni ga ɗa Kanaan nuiti, ta Ɠɛte nuiti, ta Amool nuiti, naa ʋɛɛ Felɛze, ta Yeɓuse, ta Giilegase nuiti ta-yooi veezu Abalaame naa ʋɛ, mavofodaiti ti ʋa zei ná. È ɗa-minazeɠegi laazeelini bɛ, mazɔlɔɔ è lelebogɛ. 9 «È gi-mɛmɛwolani ta-maanɔɠɔi ɠaani Ezipete yooi zu, è ta-ɓee wooi mɛni Seeli Kpoloɗɛi laaʋɛ. 10 È poogiti ta maaɓɛlɛ vaa wolaiti kɛɛni Falaɠɔn ta ná-botiɠɛ nu wolaiti daalɔɠɔma, è kɛ ná-zooi zu nuɓusɛiti pɛ daalɔɠɔma, mazɔlɔɔ è ɠɛni Ezipete nuiti ta-wasogi ɠwɛɛ, nii ti ɠɛni kɛɛzu ga gi-mɛmɛwolani. È lɔɠɔi zɔlɔɔni naama ziɛgi zu, tama zaaɠaza è-lɔɠɔi ɠulaʋɛ. 11 È kpoloɗɛi ʋalini su ti luɠɔ, ti ziɛ ada vɔɔi zu kpoloɗɛi zaama. Zɔiti ti ɠɛni ti ɓɛɛzu, è naati daaʋilini pali ɓokulagi zu, ti yei bu eɠɛ kɔtui é yeizu ziɛ wuuzeigi wu. 12 «Foloi è loni ɗa-nuɓusɛiti tuɠɔ ga tonaɓiingi, è lo ti luɠɔ kpidii ga abuzogi, nii é ɠɛni pelei zuɠalasu ti ʋɛ. 13 È zeɠeni geeɠɔlɔgi zu, è yei Sinayi gizei ma, è ɓɔɛ ti ʋɔ, è ti-ziɛ ʋele ʋagɔiti dɛɛ ga tiye, è kala gooiti fe ti ya ti ga gaamai, ta tɔgiti, naa ʋɛɛ deve ʋagɔiti ba. 14 È ɗa-looɠo folo ɲadegai lɛ ga tiye, è kala gooiti ta tɔgiti fe ti ya, naa ʋɛɛ deveiti ba, ga ɗa-wotiɠɛ nui Moize maaʋele. 15 È daamianigi ɠulani geeɠɔlɔgi zu, è fe ti ya, pului ti zogai ma. È ziɛi ɠulani fasai ʋa, kpɔɔle wɔin ti zogai ma. È ɠɛni ti ma ti zooi zeɠe ga tɔnɔ, nii è ɠonani ga ɗa feezu ti ʋɛ. 16 «Kɛlɛ gi-mɛmɛwolani ti wasoni, ti kololalai ɠɛ ga ɗe, ti la kɛɛni ti ʋa ɗa-leveiti so. 17 Ti la kɛɛni ti ʋa ɠolo, ti yeema ɗa-vaa ʋapagiti ma, niiti è ti ɠɛɛni ti ʋɛ. Ti goizuɓɔlɔi ɠɛɛni, ti yiimazeɠeni ga ti ɠale ma ʋolu ta-luɔlai zu Ezipete. Kɛlɛ ɗɔun, è la ɠɛni ɠɛlɛni ti ʋa, mazɔlɔɔ ɗa ga maavaayɛ GALAGI ta maawɔinɠa ƓALAGI, nii é zaalai veezu, zii la ɠula fala, kpɛtɛai wooɠɛɠiladai zu. 18 Ti nikɛ yiʋoi ɓɛtɛni ɓɔɠɔ ʋɛ ga zanugi puai, ti ɗa ɠɛ ma: ‹Wɛlɛ ɗa-ƓALAGI ʋa, é è ɠulaai Ezipete yooi zu.› Ti woo ɲɔiti bo è laalɔɠɔma. 19 «Ɗa ma, ɗa-ɠaazumaawɔinɠaa maaʋele ma, è la ɠɛni ɠɛlɛni ti ʋa teʋebai zu. Tonaɓiingi la ɓɔlɔni ga pelei lɛa ga tiye foloi, abuzogi ɓalaa la looɠoni losu ti luɠɔ kpidii ti-ziɛ ʋelei zu. 20 È ɗa-yɛnvu ʋagɔi veeni ti ya, nii a kɛ ti ɠigi zɔlɔɔ, è la ɠɛni ɠɛlɛni manegi veezu ti ya ga ti-ɠɔnɔgi, è ziɛi veeni ti ya ga ti ɓɔɔle la. 21 È yeezeini ti wu kona ʋuunaanigɔ (40) laawu teʋebai zu, ti la ʋalani ani nɔpɛ ma, ta-zeɠeiti ti la zaɠani ga, ti-ɠɔɠɔiti ti la veni. 22 «È masa zooiti dɔɔni ti yeezu, ta nuɓusɛiti, ti ti ɠoba yooiti seɠe, Ɠɛsɛɓon masagi Siɠon ná-zooi, ta Ɓasan masagi Wɔge ná-zooi. 23 È ti ɓuɠuni, ti-lointi ti mɔin, eɠɛ geeɠɔlɔgi ɠaa zomideɠaiti, è ti laazeeli zooi naa zu, nii è ɠɛni ti-mɛmɛwolani ma, ti seɠe ga tɔnɔ. 24 Ti lɛɛni zooi naa zu, ti seɠe ga tɔnɔ, è zooi naa zu nuɓusɛiti dɔɔni ti yeezu, Kanaan nuiti, ta ta-masagiti, ti naati so ga yiima ʋele. 25 Ti taaiti soni niiti siɠigi ti ma, ani ɓɛtɛzu you ʋagɔiti, ti pɛlɛiti so, ti laavegai ga naavoloi, ti ziɛyeɠeiti so, niiti nu ɠiligaa ti bɔai, ta leezɛn ɓeleiti, ta wolive wuluiti, naa ʋɛɛ gwaa wulu mɔinmɔin ba. Ɗa-nuʋagɔlai maaʋele ma, ti ɠɛni daamii wosu ga yiimai, ti ɠɛni yiɠozu, é zeeli kwɛma. 26 «Kɛlɛ ti wuzeɠeni è laalɔɠɔma, ti ɓaka, ti ʋoluave ɗa-lɔgi ʋa, ti ɗa-ƓALA goo wo nuiti paa, niiti ti ɠɛni ɠɛɛzu ti ma, ti ɠale ma è ʋɔ, ti-zɔgiti gola ɲɔu. 27 Názu è ti veeni ti zili nuiti zea, naati ti ɗa ti maanɔɠɔ. Ti wooɠulani è ma kpɔlɔi ma ziɛgi zu, è yɛni geeɠɔlɔgi zu, è ti woomɛni. Ɗa-ɠaazumaawɔinɠai maaʋele ma, è unmɔɔ nuiti teʋeni ti ma, naati ti ti ɠula ti zili nuiti zea. 28 Izilayɛle nuiti ti dooɠogi zɔlɔɔni nɔ feya, ti tɔɔzeini gaamanɔ ga kotoi ɠɛa è laalɔɠɔma. Názu ɠa è ti lɔa la ti zili nuiti zea ʋolu, ti zei ti unda. Ti tɔɔzeini mɔnɔ ga kpee loa è ma, è yɛni geeɠɔlɔgi zu, è ti woomɛni. Ɗa-ɠaazumaawɔinɠaa wolai maaʋele ma, è ti unmɔɔni ná zeizu ɠɛ mɔinmɔin. 29 È ɓɔini ti la ga ti ɠale ma ɗa-lɔgiti ma, kɛlɛ ti wasoni, ti la ɠoloni ɗa-lɔgiti bɛ. Ti la woiloni ɗa-leveiti ma, niiti ta ɗa zɛnvui ve naati bɛ, ti ziɛzu ga tiye, ti kpakagi ta woozotalai ɠɛɛni, naa ʋɛɛ goizuɓɔlɔi ʋa. 30 È yeezeini ti wu kona mɔinmɔin daawu, ɗa-ƓALA goo wo nuiti ti ɗa ti lɛnɛ ga ɗa-yɛnvui. Kɛlɛ ti la woiloni naati goo ma, è lati, è ti lɔ zii ɠiligiti zea. 31 Kɛlɛ ɗa-ɠaazumaawɔinɠaa wolai maaʋele ma, è la ti undaaʋilini, è la ɠɛlɛni ti ʋa, mazɔlɔɔ ɗa ga gaazumaawɔinɠaa ƓALAGI, ta faanɛɛ ɠɛɛ ƓALAGI. 32 «Naa ɠa é ba, ee, gá-ƓALAGI, ɗɛi è wɔɔlɔai, è yeeɠaaɓaai, è maayikiai, ɗɛi è ɗa-minazeɠegi makɛsu, ta ɗa-wooɠɛɠiladai, soma è mina gá-maanɔɠɔi ɠa ga faa yɔɠɔfɛlɛ, nii é zeizu gi ma, gá gá-masagiti, ta gá-ɠundiɠiiti, gá-zalaɠa ɠula nuiti, ta gá-ƓALA goo wo nuiti, gi-mɛmɛwolani, ta ɗa-nuɓusɛiti gi pɛ ma, é tɔɔzei Asiili masagiti ta-ziɛgi zu ma, é zeeli za ma. 33 Ɗɔun è lelebogɛ, naa kpein su seeliai gi ma, è ti pɛ kɛɛʋɛ ɗa-wooɠɛɠiladai zu, gá ma faa ɲɔi ɠa gi ɠɛa kɛɛzu. 34 Gá-masagiti, ta gá-ɠundiɠiiti, naa ʋɛɛ gá-zalaɠa ɠula nuiti ta gi-mɛmɛwolani ba, ti la ɗa-lɔgi zoni, ti la woiloni ɗa-leveiti ta tookisu ɓɔɛiti ma, niiti è ɠɛni ti wosu ti ma. 35 Siɛgi kpein ti kɛɛni ta-masa zooi zu, undaanɛ wolaiti saama, niiti è ti ɠɛɛni ti ʋɛ, zou wolai zu nii è feeni ti ʋɛ, ti la ɠɛni zeɠeni ti-ɠɛɛwoti ɲɔiti polu, ti ʋa botii ɠɛ è ʋɛ. 36 «Wɛlɛ gi ʋa za duɔlai zu, naama yooi zu nii è feeni gi-mɛmɛwolani bɛ, ga ti baalɔnɔgiti mi. 37 Zooi naa ʋaalɔnɔ mɔinmɔingi kpein ka ga masagi naati tɔnɔ, niiti è gi lɔai ti yeezu, gá-ɠotoiti maaʋele ma. Tiya ɠa ti yiimaɠɛɛzu gi zu, gá gá-loganiiti, eɠɛʋelei nɛai la ti ʋɛ, kidaaʋili golai ɠa gi su.»