Nehemiah 9 (YAPE)
1 Rofen ni reliw’ nge aningeg fen ko re pul i n’em, me mu’ulung yu Israel ngar paged e abich ni aram e yad be dag gelngin e kireban’ rorad ko denen rorad, ni kar chuwgad ko mad ni tutuw ma kar ted e fiyath nga fithik’ i lolugrad ni pow nike kolngan’rad. 2 Miyad chuw u fithik’ girdi’en yugu boch e nam ngar pired nga bang ni go’ yad. Miyad sak’iy ngar puwofay niged e denen rorad nge denen rok e pi chitamangirad ni kakrom. 3 Mi ni be’eg ngorad e Motochiyel rok SOMOL ni Got rorad ni gonap’an dalip e awa, ma kogonap’an dalip e awa e ra puwofay niged e denen rorad ma yad be tay fan SOMOL ni Got rorad. 4 Ma ba’ bangi ban’en ni ka ni ngongliy nib tolang boch ni fan ngak e pi Levite, nu daken e ba sak’iy i Jeshua, nge Bani, nge Kadmiel, nge Shebaniah, nge Bunni, nge Sherebiah, nge Bani, nge Kenani riy. Miyad meybil ngak SOMOL ni Got rorad ni ba ga’ lamrad. 5 I Jeshua, nge Kadmiel, nge Bani, nge Hashabneyah, nge Sherebiah, nge Hodiah, nge Shebaniah, nge Pethahiah ni yad bogi Levite e rogned ni nga ni pining e sorok ngak Got ni nge lunguy:“Mu sak’iygad ngam pininged e sorok ngak SOMOL ni Got romed;ngu’um pininged e sorok ngak ni dariy n’umngin nap’an.Nge gubin e girdi’ ma nge pining e sorok nga feni gilbugwan fithingam,ni yugu ara’ rogon ni sorok ni bay i pining e girdi’ ngom e dabi gaman.” 6 Miyad meybil ni aray rogon,“Gur SOMOL, e kemus ni gur e SOMOL;gur e mu sunumiy lanelang nge pi t’uf ni bay u lanelang.Gur e mu sunumiy e but’ nge day nge urngin ban’en ni bay riy;me gur e mpi’ e yafos ko gubin ban’en;pi engel nu tharmiy e yad ma siro’ ngom ma yad ma liyor ngom. 7 Gur SOMOL ni Got e mmel’eg Abram,ma ga pow’iy nga wuru’ yu Ur ni bay u lan yu Babylonia;ma ga thiliyeg fithingan ngam tunguy Abraham ngak. 8 Mu nang ni be par nib yul’yul’ ngom,ma ga ngongliy ba m’ag u thilmew.Mmicheg ngak ni bay mpi’ e nam nu Kanaan ngak,ni nam rok e Hittite nge Amorite,nge nam rok e Perizzite, nge Jebusite, nge Girgashitenge par nib nam ni bayi par e pi’in ni owchen riy.Ma ga tay nga tagil’ e n’en ni mmicheg ngak, ya gab yul’yul’. 9 “Gur e um guy rogon e gafgow ni i tay pi chitamangimad ni kakrom u Egypt;mu rung’ag e man ayuw nra ninged ngom ko fa gi Day ni Red Sea fithingan. 10 Ma’ang’ang nni gin ngay e mu ngongliy nib togopluw ngak Farao,nge ngak e pi tolang ni bay nga tan pa’ nge girdi’ ko nam rok,ya mu nang gelngin e gafgow ni yad be tay ngak e tirom e girdi’.Me gilbuguwam ni bod rogon e bin daba’ e rran ni ka ba gilbuguwam. 11 Mu ngongliy ba kanawo’ u fithik’ e day ni fan ngak e girdi’ romma ga pow’iy e girdi’ rom ngranod riy nike mlik’ e but’ riy nga barba’.Pi’in i tuluf rad e ra lumoch gad kore daynem,ni bod rogon ba malang ni ligil nga ar u lan e rigur ni be cham e day riy. 12 Ma bayi rran ma bangi manileng e ga be pow’iyrad ngay,ma bayi nep’ ma ggal’ e gin ni ngranod riy nga ramaen ba nifiy ni be mat. 13 Mub u lang nga daken e burey ni Sinaima ga welthin ngak e girdi’ rom u rom;ma ga pi’ ngorad e motochiyel ni bfel’ nge fonow nib yal’uw. 14 Mmachibnag ngorad rogon ni ngar ayuweged e pi sabbath rom nib thothup,u pa’ Moses ni tapigpig rom e mu pi’ fapi motochiyel rom riy ngorad. 15 “Fa’ani yib e bilig ngorad ma ga pi’ e flowa u tharmiy ngorad,ma ga pi’ e ran nge yib u fithik’ e war nga but’ ko ngiyal’ nike yib e belel ngorad.Ma ga yog ngorad ni ngranod ra tafned fare nam ni mmicheg ni bay mpi’ ngorad. 16 Machane pi chitamangimad ni kakrom e ra ufanthin gad miyad gelan’,ngar siyegned ni ngar folgad ko tin kamog ngorad ni ngar rin’ed. 17 Ra siyegned ni ngar folgad rom, ma kar paged talin urngin e pin’en ni um rin’;ra paged talin fapi maang’ang ni um ngongliy.Miyad duwgiliy be’ u fithik’ e ufanthin ni nge yog e thin roradme fulwegrad nga Egypt ngar pired ni yad e sib.Machane gur ba Got ni ga ma n’ag fan u wun’um e kireb;gab gol ma ba t’uf e girdi’ rom, ma ba sowath ni gama damumuw.Runguy rom e ba ga’, aram fan nda mu n’agrad. 18 Ra ngongliyed ba liyos ni bod ya’an ba garbaw,miyad yog ni ir fare kan ni fekrad nga wuru’ yu Egypt! SOMOL, rib ga’ e dariy fan nra ted ngom! 19 Machane da mu n’agrad u rom u daken e ted nder tugul ban’en riy,ni bochan e runguy rom nib ga’.Da mchuweg fa gi manileng nge fare nifiyni i pow’iyrad ni rran nge nep’. 20 U mog ngorad e n’en ni ngar rin’ed ni bochan e gab gol;um durwi’iyrad ko manna mu’um pi’ e ran ni ngar unumed. 21 Urngin ban’en ni nge yag ngorad u daken e ted i yane um pi’ ngorad ni aningeg i ragag e duw;mi i par e mad rorad nde wod,ma rifrif u ayrad e de thow nge amith. 22 “Gur e mu pagrad ngar gelgad ngak e pi nam nge pi pilung,ko yungi nam ni yad bmathil.Ra gelgad ko nam nu Heshbon, ni Sihon e pilung riy,nge nam nu Bashan, ni Og e pilung riy. 23 Ma ga yo’ornag pifakrad ni pumo’on ngar boded feni yo’or e t’uf u lanelang,ma ga ayuwegrad ngar gelgad ngranod ra pired ngalan fare namni mmicheg ngak pi chitamangirad ni kakrom ni bay mpi’ ngorad. 24 Ra gelgad ko nam nu Kanaan;mu gel ngak e girdi’ nma par u rom.Mpi’ mat’wun e tirom e girdi’ e ngiyal’nem ni ngar rin’ed e tin yad ba’adagngak e girdi’ nge pi pilung ko nam nu Kanaan. 25 Girdi’ rom e ra koled e pi binaw ni ka ni yororiy ni fan ko mael,nge binaw nib yong’ol, nge naun nib sug ko machaf,nge luwed nike m’ay i ker,nge gek’iy ni olive, nge gek’iy ni yima kay wom’ngin, nge yungi woldug ni grapes.Mu ur ked urngin e tin yad ba’adag ni ngar ked ngar pired ni kar sugsuggad;mi i felfelan’rad ko urngin e pin’en ni bfel’ ni mu pi’ ngorad. 26 “Machane me cheal e tirom e girdi’ ngu’ur togopluwgad ni da kurfolgad rom;ra pi’ed keru’rad ko Motochiyel rom,Ra thanged e fan rok e pi profet ni ur fonow niged yad,ya urogned ngorad ni ngar sulod ngom.Mu ur pired ngu’ur darifan niged gur; 27 aram ma ga pag e pi to’ogor rorad ngar gelgad ngorad miyad par nga tan pa’rad.U fithik’ e gafgow ni yib ngorad miyad ning e ayuw ngom,ma ga fulweg taban e meybil rorad u tharmiy.Runguy rom nib ga’ e mu pi’ ngorad e pi’in ni ngu’ur gagiyeg niged yadni yad e ra chuweged yad u pa’ e to’ogor rorad. 28 Fa’ani sul e gapas ngorad miyad tabab ko denen bayay,ma ka ga pag e pi to’ogor rorad bayay ngar gelgad ngorad.Ma nap’an e yad pi’ keru’rad rorad ngar weniggad ngom ni ngam ayuwegrad,ma ga rung’ag lamrad nga tharmiyma ga lagrad bayay ni bochan e runguy rom nib ga’. 29 Um ning chiylen ngorad nthingar ra folgad ko fonow rom,ma fithik’ e tolangan’ rorad miyad n’ag e pi motochiyel rom,ni yugu aram rogon ni kanawo’ ko yafos e Motochiyel rom ni ngan fol riy.Feni gel lanin’rad nge farad gelan’, miyad siyeg ni ngar folgad. 30 Um ginangrad u fithik’ e gumaen’ u reb e duw ngu reb.Thin rom e i yog e pi profet rom,machane ba man tel e girdi’ rom,aram ma ga pagrad nge gel boch e nam ngorad. 31 Machane bochan e runguy rom ni ba ga’ma da mu n’agrad ara mu thang owcherad.I gur ba Got ni gab gol ma ga ma runguy e girdi’! 32 “Rib sorom, i gur Got ni Got romad!Ri ba ga’ madgum, ma rib gel gelngim!Ga be par nri gab yul’yul’ ko m’ag ni mu ngongliy u thilmed e girdi’ rom.Ngiyal’ ni gafgow nagmad e pi pilung nu Assyriake mada’ ko chiney e ba gel e gafgow ni kug pired nga fithik’!Pi pilung romad, nge pi’in yad ma gafaliymad, nge pi prist nge pi profet romad,nge pi chitamangimad ni kakrom nge urngin e girdi’ romad nra gafgowgad.Mu leamnag gelngin e gafgow ni yib ngomad. 33 Mmat’aw e tin mu rin’ ko gechig ni mpi’ ngomad;um par ni gab yul’yul’ ngomad, ni yug aram rogon ni gamad be denen. 34 Pi chitamangimad ni kakrom, nge pi pilung romad, nge pi’in yad ma gafaliymad, nge pi priste da ur folgad ko Motochiyel rom.Da ur motoyilgad ko tin mog ni ngan rin’ nge tin um ginangrad riy. 35 Mu ayuweg e pi pilung rok e tirom e girdi’ e ngiyal’nem ngu’ur gagiyeggadnnap’an ni ur pired u lan fare nam ni ba ga’ ma ba yong’ol e but’ riy ni gur e mpi’ ngorad,machane dar pi’ed keru’rad ko denen ngar folgad rom. 36 Ma chiney e kug manged sib u lan fare nam ni gur e mpi’ ngomad,nre but’ ney nib yong’ol ni be pi’ e ggan ngomad. 37 Yong’olen fare but’ e be yan ngak e pi pilungni kam taymad nga tan pa’rad ni bochan e gu denengad.Tin yad be finey e yad be rin’ ngomad nge garbaw romad,ma gamad be par u fithik’ e kireban’ nib gel!” 38 Bochan urngin e pin’en nike buch romad ma gamad e girdi’ nu Israel e kug yoliyed ba m’ag ni nge par, ma pi’in yad ma yog e thin romad, nge pi Levite romad, nge pi prist romad e kar ted e hang rorad ngay.