Revelation 5 (MKNFD)
1 Na an Ramootta ndona gagrirta ramoot paŋanna mbiracrena taupca mbiraca eacri, na aku mana par umbaimo watrinanna, timbigta kap ianna eacrena. Na an timbigta kapca, ma timbiŋ rapar rocotna kirar, mina rukumbca leacrina, na mana waŋniŋa titirirap eacrenan. Na mina rukumrina, na kendelna manŋar mbuŋa mina kɨdrɨk par kabeapa mbut mbuniŋmo tɨkca maŋtikirinan, na mina an kendelna maŋtikirina taup par kabeapa mbut mbuniŋmo ŋgaŋgatraca morina. 2 Na aku mbaiŋna aiŋa morena ŋeroŋ gargar ianna watrinanna, ma kam aniac keca gaindoprina, “Titocna ramoot laŋ ŋgoin, ma mɨn te, ma an kendelna manŋarpaikca mina an timbigta kapmo maŋtikica, eacrenanmo goara gootna?” 3 Na auŋ tamuŋnan, co, gan tiacarpaiknan, co, mana inikca eacrena ramoot ianna an timbigta kap gootta mana inikca watna mɨnna wanaiŋ. 4 Na aku gaind mbatrinanna, ramoot laŋ ŋgoin ianna anna mba eacrena, na ma an timbigta kapmo gootca mana inikca watna mɨnna wanaiŋ, na aku nananae aniaca mamoat. 5 Ri, anna ramoot paŋan ianna aukmo aindopatna, “U kai ae teac, u warac. An Laionna Iudana wiwitmo larurinanna, na ma Dewitna rɨmbɨn ŋgamrir mbuŋa larurina Kacrir, na runduŋmo ruŋga ma minmo mo irikrinan, na mana puŋnaŋgepmo ma mo irikatna. Ainda moca ma an par kabeapa mbut mbuniŋna kendelna manŋarpaikca maŋtikica timbigta kapmo maŋtikica eacrenanmo ma gootna mɨn.” 6 Na aku watrinanna, Sipsip Nuoc ianna wɨtɨkca eacrenan. Na mana wapatta mina manmo moa menacrina kirar toc. Na ma an gagrirta ramoot paŋanna mbiracrena taupapa, an reik paura eteacna watapnanna, rɨkca wɨtɨkca eacrena, na an ramtaɨr paŋaindta mbibiracna reik laiŋga manmo korereca eacrenan. Mana paŋanna lacara parmbaiapa mbut mbuniŋap, na parmbaiapa mbut mbuniŋna lamnikap, na anna Raraŋ Aetaniacna parmbaiapa mbut mbuniŋna ŋerŋgaur. Na Raraŋ Aetaniaca minmo gan tiacarpaikmo tamtamma mandaca mina taŋrinan. 7 Karica an Sipsip Nuoca, taŋga an gagrirta ramoot paŋan mbiracrena taupca mbiraca eacrena Ramoot, ndambuŋna par umbaina timbigta kap maaŋgɨat. 8 Ri, ma an timbigta kap aŋgɨca, an eteacna watapna reik paurapa 24na mɨnna ramtaɨr paŋainda mina Sipsip Nuocna kɨtɨmmo tutpemb rɨmbɨtca eacrenan. Na an ramtaɨr paŋainda muruŋa kemma werena reaca gita tocapa, golna tuoŋap utiŋrina, na an tuoŋgoura iŋpemb laiŋta tactuora muruŋa larurenanna. Anna Raraŋ Aetaniacna meikramtaɨrta mbembendeina kirar. 9 Ri, mina ŋap ŋgam ianmo gainda umbrinan, “U mɨn ŋgoin,u gan timbigta kapca aŋgɨna laŋ ŋgoin,na an kendelna maŋtikina manŋaratimbigta kapmo maŋtikica eacrenanmo,u muruŋcamiŋmo goarna mɨn.Na anna mɨnɨŋa gaind,mina umo mo menacrinan,na una racaindpaik mbuŋau meikramtaɨrmo mac nda oikrinan,na u minmo Raraŋ Aetaniaca neaŋnandet.Na anna gidik,u meikramtaɨrmo muruŋa oikrinan,na an meikramtaɨr muruŋcamiŋamina titocna kambtan,co, titocna tik iŋitnan,co, titocna pitrik waŋnan. 10 Na u minmo moamina gagrirta ramoot paŋannataup ndamtaɨrta wiwit ndarurinan,na mina aina Raraŋ Aetaniacnataup ndamtaɨra eacrenan.Na mina gagrirta ramtaɨr paŋainda eac te,mina gan tiacarpaiknameikramtaɨrmo raupŋinandet.” 11 Karica aku mac wattatnanna, aku mbaiŋna aiŋa morena ŋerŋgaur wɨt aniac ŋgoinna kambca waracrina. Na mina ŋgaŋganŋgɨa wɨt aniac ŋgoin, na nduna mɨnna wanaiŋ. Mina an gagrirta ramtaɨra mbiracrena taupapa, an eteacna watapna reik paurapa ramtaɨr paŋaindmo korereca wɨtɨkca eacrenan. 12 Na mina kamb aniaca keca aindoprenan, “Gan Sipsip Nuocaŋgaua mina manmo moa menacrina,na ma i aniac aŋgɨna mɨn ŋgoinapa, reik laiŋapa,landamŋi laiŋapa,gargar aniac aŋgɨna mɨn.Na meikramtaɨra mana i aŋgɨ ŋgepna mɨn ŋgoin,na manmo toŋgona,na manmo kamb laiŋ neaŋna.” 13 Na aku Raraŋ Aetaniaca morina reikta kambca muruŋa waracrinan, na anna an reikca tamuŋna auŋ ndeacrenanapa, gan tiacarpaiknanapa, gan tiacarpaikna kaŋgaukca eacrenanapa, macait inikca eacrenan. Na anna gidik, an reikca tentenna eacrenanna, aku kambmo gainda waracrinan, “An ramootta ma ndonagagrirta ramoot paŋanna mbiracrena taupca mbiraca eacrenan,na Sipsip Nuoc toc,maniŋa kamb laiŋmo muruŋa aŋgɨnanapa,i aniacapa, toŋtoŋapa,gargarapmo memetmbaca iarwara aŋgɨraŋnandet.” 14 Na an eteacna watapna reik paura gaindopraŋnandet, “Anna gidik.” Na ramtaɨr paŋainda tutpemb rɨmbɨtca maniŋmo mbendeirina.