1 Timothy 5 (MNT)
1 ጋርቼ ዓቲንቆ ዓዶ ማሂ ዛጊ ዞዞራንዳኣፓዓቴም ጎሪ''ፖ፤ ዼጌ ዓቲንቆ ናኣቶ'' ኔኤኮ ጌርሲንሢ ማሂ፥ 2 ሃሣ ጋርቾ ላኣሎ ኔኤኮ ዒንዶንሢ ማሂ ዛጌ፤ ዬያጉዲ ዼጌ ዉዱሮ ናኣቶ'' ኔኤኮ ጌሮንሢ ማሂ ጌኤሺ ዒናና ዛጌ። 3 ጎኔና ዜኤሮይንዶ ማዒ፥ ሜታዼ ላኣሎ ዛጊ ማኣዴ''። 4 ዜኤሪንዶኮ ናይ፤ ሃሣ ናኣዚ'' ናይ ዓኣቶ ዬንሢ ናኣቶ''ንሢ ፔ ማኣሮ ዓሶ ማኣዳ''ያ ሃሣ ዔያቶ ሾዔ ዓሶና ዓሆ፥ ማዖ ማዔ ዓሶም ኮሺ ማዺ ማሃኒ ኮይሳያ ማዔሢ ዔሮንጎ፤ ዓይጎሮ ጌዔቴ ዬይ ፆኦሲ ዎዛሳያ ማዔሢሮኬ። 5 ጎኔና ዜኤሪንዶ ማዒ፥ ፔኤሮ ናንጋዛ ፔኤኮ ሃጊ ማዓንዳ ዎዞ'' ፆኦዛሢዳ ጌሢ፥ ዋንቴና ሮኦሪና ፆኦሲ ማኣዶ ኮዒ፥ ዒዛ ሺኢጲሢና ዶዲ ናንጋኔ። 6 ሓያ ዓጮ'' ዎዞ'' ሌሊ ናሽካ፥ ዜኤሮይንዶ ማዔ ላኣላ ጋዓንቴ ዔቂ ዓኣዖ ሓይቄያኬ። 7 ዔኤቢ ዾንኪሳ ባኣዚ'' ባኣያ ማዒ ናንጋንዳጉዲ ዔያቶ ዞሬ። 8 ፔ ዒጊኖም ባሼና ፔኤኮ ዑኬ ማኣሮ ዓሶ ማኣዱዋኣሢ፦ ፆኦሲ ጉሙርቂፆ ካኣዦ ሃሼ''ያኬ፤ ፔቶ'' ኪሪስቶሴ ጉሙርቁዋ ዓሶፓ ባሼ ፑርታ ዓሲኬ። 9 ሌዓ ላሂታሚ'' ሌዔኮ ዴማ'' ማዔ ዜኤሪንዶ ማዔ ላኣሎ ፃኣፒ ዓርቆ ቤዛ ዓርቂፖ፤ ሓሣ ሱ'ንፃ ዓርቂንታ ዓሳ ፔቴ'' ዓሲም ሎዔ ላኣሊ ማዓንዳያ ኮይሳኔ። 10 ሓሣ ናይ ቃራሲ ዲቻያ፥ ሾኦቺ ዔካያ፥ ፆኦሲም ዱማዼ ዓሶኮ ቶኪ ማስካያ፥ ሜታዼ ዓሶ ማኣዳ''ያና ዓይጎዋ ኮሺ ማዾ ቢያ ማዺሢና ዔርቴያ ማዓኒ ኮይሳኔ። 11 ጋርቺባኣ፥ ዶዲ ማዔ፥ ዜኤሮይንዳሢ ጋዓንቴ ፃኣፒ ዓርቂፖ፤ ዓይጎሮ ጌዔቴ ዔያቶ ዓሽኮ ሱኡካ ባሼም፥ ኪሪስቶሴ ዔያታ ናሽካ ናሹማ ዻኬ''ም ሎዓኒ ዔያታ ኮዓንዳያታሢሮኬ። 12 ዬያይዲ፦ ቤርታ ዔያታ ኪሪስቶሴና ጫኣቄ ጫኣቁሞ ሃሻ''ንዳሢሮ ፑርታና ዎጊንታንዳኔ። 13 ሓሣ ዔያታ ማዾ ሃሺ'' ዓሲ ማኣሪ ሃንቲሢ ዓርቃንዳኔ፤ ማዾ ሃሺ'' ሃንታ ዓሲ ሌሊ ማዒባኣዖ፦ ዓሲ ዾንካያ፥ ዓሲ ባኣዚ''ዳ ጌላያ፤ ሃሣ ጌስታኒ ኮይሱዋ ባኣዚ'' ጌስታያ ማዓንዳኔ። 14 ዬያሮ ጋርቺባኣ ዜኤሪንዶ ማዔ ዶዶ ላኣላ፦ ሎዓንዳጉዲ፥ ናይ ሾዓንዳጉዲ፥ ማኣሮዋ ፔኤኮ ኮይሳ ጎይሢና ዎይሣያ ማዓንዳጉዲ ታ ዞራኔ፤ ያዺዴቴ፦ ሞርካሢ ኑና ጫሽኮንዶ ባኣዚ'' ባይዛንዳኔ። 15 ጎኔና ሃያኮ ቤርታ ፃላሄ ጊንፆ ሃንታኒ ፔቴ'' ፔቴ'' ዜኤሪንዶ ማዔ ላኣላ ፆኦሲ ጉሙርቂፆ ጎይፃፓ ዻቢንቲ ኬስኬኔ። 16 ፔቴ'' ኪሪስቶሴ ጉሙርቃያ ማዔ፥ ላኣሊኮ ማርካ ዜኤሪንዶ ማዔ ላኣሊ ዓኣቶ፦ ዔያታ ሺኢጲፆ ማኣሮኮ ሜቶ ማዑዋጉዲ ዒዛ ዔያቶ ማኣዶ''ንጎ፤ ዬያይዲፆና ሺኢጲፆ ማኣራ ፔቴ''ታዖ ማኣዳ'' ዓሲባኣ፥ ዜኤሮይንዶ ሌሊ ማኣዳ''ኒ ዳንዳዓንዳኔ። 17 ሺኢጲፆ ማኣሮ ዓሶ ቃራሲ ዎይሣያ፤ ባሼ ኮዦ ሃይሶ ኬኤዚሢና ዔርዚሢና ላባ'' ጪሞም ዒንጎ ባኣዚ'' ጳንጬ ማሂ ዒንጋኒ ኮይሳኔ፤ 18 ዓይጎሮ ጌዔቴ ጌኤዦ ማፃኣፓ፦ «ሃኣኮ ሺርካ ጌሜኮ ዻንጎ ቱኪ''ፖ» ዬያጉዲ ሃሣ፦ «ማዻሢም ማዾ'' ዛሎ'' ዒንጊንታንዳያ ኮይሳኔ» ጋዓኔ። 19 ላምዖ ሃሣ ሃይሦ ዓሲ ማርካዺባኣንቴ ሺኢጲፆ ማኣሮ ጪሞ ዑፃ «ዻቤኔ» ጎዖ ባኮ ዋይዚፖ። 20 ሜሌ'' ዓሳ ዒጊጪ ካፒንታንዳጉዲ ጎሞ ማዻ ዓሶ፡ ዓሶ ቢያኮ ቤርታ ጎሬ። 21 ኔኤኒ ማዻ ማዾ''ና ቢያ፡ ፔቴ''ያ ባጋሢዳፓ ባሺሱዋዖ ሃሣ ዖናኣ ዱማሱዋዖ ሃያ ታኣኮ ዞሮ'' ቢያ ኔ ኩንሣንዳጉዲ ፆኦሲና ዬሱስ ኪሪስቶሴና ሃሣ ዶኦሪንቴ ኪኢታንቾና ማርካ ማሂ ታ ኔኤም ኬኤዛኔ። 22 ዖጊዳኣ ኔ ኩጮ ጌሥሢና ዶኦራኒ ሩኡሪፖ፤ ሜሌ'' ዓሶና ዎላ'' ጎሜ ማዺሢሮ ፔቴ'' ማዒፖ፤ ኔ ቶኦኮ'' ጌኤሺ'' ካፔ። 23 ኔኤኮ ጎጶ ዶርዓሢና ቢያ ዎዴ ኔና ሃርጋ ሃርጎ ዛሎ'' ዎይናፓ ኮሾ''ና ዑዦ ዻካ'' ዑሽኬ፤ ዋኣሢ ሌሊ ዑሽኪፖ። 24 ፔቴ'' ፔቴ'' ዓሶኮ ጎማ ዔርቴያ ማዒ፥ ጋፒንፆ ዎጎ ኬላ'' ሄሉ''ዋንቴ ቤርታዺ ዔያቶ ዓርቃኔ፤ ዛሎ'' ዓሶ ጎማ ጋዓንቴ ጊንፃዺ ዓርቃኔ። 25 ዬያጉዲ ኮሺ ማዾ ፔጋኣኬ፤ ፔጋ ማዒባኣዖ ዓቴ''ያ ያዺ ዓኣሺንቲ ዓታ''ዓኬ።