Nahum 2 (TBIAOTANT)

1 1-2 Apaniba faragha Israelia gasɨghasigha, men biziba bar da inigha ghue.Ezɨ datɨrɨghɨn Ikiavɨra Itir God, Israelɨn ziar ekiam damutɨ,a faragha ikezɨ moghɨn uam otivam.O Niniven adarasi, apaniba datɨrɨghɨn ia mɨsosi.Ia gasɨghasɨghamin gumazim izegha gɨfa.Ia mɨdorozir gumaziba arɨghtɨ me ian nguibar ekiamɨn okarigham.Ia bar deravɨra tuavibar gan.Ia mɨsoghsɨ tuivigh gavgavigh gan. 3 Ian apaniba orar aghevibar suigha, mɨdorozir korotiar agheviba aghuigha,ia mɨsoghasa izi.Me mɨsoghasa ivemara izima, men karisba taghtasi,mati avim isi.Ezɨ men afuzir ruarir me painɨn temebar ingariziba,da mɨsoghasa amua dar koniba igha izi. 4 Men karisba bar pamten ivemara nguibar ekiamɨn aven izi,egha gumazamiziba uari akuvir danganibar me dar mangɨ izegh gami.Me adenir avibar mɨn isia,tintinibar ghua mati onɨmarim taghtasi. 5 Men faragha zuir gumazim, mɨdorozir gumazir dapanibar diazɨ,me ivemara asaghpora irasava amua dɨvazim bagha zui.Me zuamɨra ivemara ghua averpenimɨn aven zui,me averpenimɨn apengan, dɨvazim ginivtɨ, anekaramin temer otevir mam iti. 6 Me temer otevir kam, tiar akar fanemɨn boroghɨn itim ginivima,tiar akam akariaghɨrɨ.Ezɨ dɨpam bar puvɨra ivemara, atrivimɨn dɨpenimɨn aven izima, aperiar ekiam otozɨ,gumazamizir atrivimɨn dɨpenimɨn itiba bar atiatingi. 7 Apaniba Asirian atrivim gamizɨ, a tughav itima, me an amuimɨn korotiaba suegha,a inigha kalabusɨn ghu.Ezɨ an ingangarir amizibar naviba bar ikuvizɨ me aziava,bar an apangkuvigha uan evaribav sosi. 8 Dughiar bar ruarimɨn Niniven nguibar ekiam nɨmɨra iti, mati dɨpar akarem.Ezɨ datɨrɨghɨn an gumazamiziba ara nguibar ekiam ategha azenan zui,mati dɨpam apɨrizir dɨvazim akariaghɨrɨzɨ, dɨpam puvɨra ivemari.Men marazi pamten dɨa ghaze,“Ia mɨtifigh, ia mɨtifigh. Ia arɨ mangan markɨ.”Ezɨ tav mɨtɨgha uamategha zuir puvatɨ. Bar puvatɨ. 9 An apaniba kamaghɨn uan adaraziv gei,“Aria, ia men gol ko silvaba okemegh bar da inigh.Bizir aghuir bar avɨriba, men nguibar ekiam gizɨfa.” 10 Ninive bar ikuvigha, pura danganir kɨnir gumazamiziba puvatɨzimɨn mɨn iti.Gumazamiziba nguibar ekiam ategha tintinibar are.Me puvɨram aguava bar atiatigha, men sueroghofariba nɨsi.Men gavgaviba bar gɨvazɨma, men naviba me gɨghaghirima,men damaziba atiaghiregha guaba bar ghuari. 11 11-12 Nguibar ekiar kam faragha bar gavgafi,mati laionba itir danganim, ezɨ datɨrɨghɨn puvatɨ.Ninive fomɨra mati laionɨn igiaba ikia apir danganim, ezɨ laionɨn apuriba ko, amebaba ko, men nguziba an moga deravɨra itima,apaniba me mɨsozir puvatɨ.Laionɨn apurim asɨzibav sogh da nguemsɨrightɨ, amebam ko, nguziba deravɨra damam.Egha asɨzir naba isa dɨpenim garɨzima a izɨfa.Ezɨ datɨrɨghɨn laionɨn dɨpenim a managh iti?A ikuvigha gɨfa. 13 Ikiavɨra Itir Godɨn Gavgaviba Bar Itim kamaghɨn Ninivebav gei,“Kɨrara ian apanim.Kɨ ian karisba dapongtɨ da bar isigham.Eghtɨ ian mɨdorozir gumaziba,laionɨn igiabar mɨn mɨdorozimɨn aven arɨmɨghiregham.Eghtɨ bizir ia igharaz darazi da iniziba, kɨ bar uam ada inigham.Eghtɨ Kantrin Igharazibar Gumazamizibaua ian abuir gumaziba baraghan kogham.”

Nahum 2 (TBIAOTANT)

In Other Versions