Psalms 22 (TBIAOTANT)
undefined Devit ighiar kam osiri.Gumazir onger akabar faragha zuim gumazamizibav kemezɨ me tiarir kamɨn ighiam bange, “Mɨzarazimɨn asɨzir dian amebam.” 1 O nan God, nan God,nɨ tizim bagha na ataki?Nɨ manmaghsua saghon ikia nan ararem baraghanan akurvaghan aghua? 2 O nan God, kɨ aruebar nɨn deima, nɨ na barazir puvatɨ.Kɨ dɨmagaribar nɨn azangsɨghavɨra ikia tong avughsir puvatɨ. 3 Ezɨ nɨrara bar deragha zuegha, arazir aghuibaram amua,uan atrivir dabirabim gaperaghav itima, Israelia nɨn ziam fe. 4 Fomɨra en ovaviba nɨghnɨzir gavgavim nɨn iti.Me nɨghnɨzir gavgavim nɨn itima,nɨ men akurazɨ, men apaniba me abɨrazir puvatɨ. 5 Me nɨn diava araima, nɨ men akuragha ua me ini.Ezɨ nɨghnɨzir gavgavir me nɨn itir kam,a pura ghuzir puvatɨ. 6 Ezɨ kɨrara, kɨ gumazim puvatɨ, kɨ pura apizir kuramɨn mɨn iti.Gumazamiziba bar nan atara na dɨpova na dɨkabɨra, akɨriba igha na gasi. 7 Gumazamiziba bar nan gara akaba na gasa,mɨzeba onga na garɨgha uan dapaniba roi. 8 Me ghaze, “Nɨ nɨghnɨzir gavgavim Ikiavɨra Itir Godɨn iti.A manmaghsua nɨn akuragha ua nɨ inizir puvatɨ?God nɨ gifongegha nɨ bagha bar akonge,egha manmaghsua a nɨn akurazir puvatɨ?” 9 O God, nɨ nan amebamɨn navir averiamɨn na inigha azenan na atɨzɨ,kɨ uan amebamɨn otem apavɨra itima,nɨ na geghuva deragha nan gari. 10 Nan amebam na batezir dughiamɨn iza datɨrɨghɨn, kɨ nɨghnɨzir gavgavim nɨn iti.Nan amebam na batezir dughiamra, nɨ nan Godɨn iti. 11 Osɨmtɨzim bar nan boroghɨn izegha gɨvazɨ,nan akurvaghamin gumaziba puvatɨ.Kamaghɨn amizɨ, nɨ nan saghon ikian markɨ! 12 Nan apanir avɨriba bulmakaun apuribar mɨn na ekɨarugha gɨfa.Me mati, Distrik Basanɨn bulmakaun gavgaviba. 13 Me, laion uan akam akara asɨzibav sogha dagh asɨghasɨzi moghɨn,me na gasɨghasɨghasava ami. 14 Nan gavgaviba bar gɨfa,mati me dɨpam nguazim gingezɨ a ghua pura gɨfa.Nan namnamɨn aghariba bar nan apunapuni.Kendel purama emɨra uaghiri moghɨn,nan navir averiam purama amɨragha uaghiri. 15 Nan kuarmɨzim mɨner bɨghizir mamɨn mɨn na mɨsɨngi.Ezɨ nan mɨzem iza nan akatorimɨn aven pura itoroghav iti.Nɨ na ataghizɨ,kɨ nguazir mɨnemeniamɨn mɨn irɨghav ikia bar ovengasava ami. 16 Gumazir kuraba bar na ekɨarugha gɨfa,mati afiaba bar asɨzim okarigha gɨfa.Me nan suemning ko dafarimning ginivaghasi. 17 Nan aghariba bar azenim girezɨ,gumazir kaba nan ganigha na dɨpova bar akonge. 18 Me nan korotiaba tuiragh uarira uari danɨngasa,da bagha satu gikararai. 19 O Ikiavɨra Itir God, nɨ nan saghon ikian markɨ.Nɨ nan Akurvazir Gumazim,nɨ zuamɨra izɨ nan akuragh. 20 Nɨ nan akuraghtɨ men mɨdorozir sabam na atughan kogham.Nɨ nan akuraghtɨ, gumazir afiabar mɨn itir kaba na mɨsueghtɨ kɨ aremeghan kogham.Kɨ angamɨra ikɨvɨra ikiam. 21 Laionba asɨzir atiabav sogha da api moghɨn, me na agɨvasa.Egha bulmakaun atiabar mɨn uan kombar na ginivasa.Kamaghɨn amizɨ, nɨ nan akuraghmen dafariba da ua na inigh. 22 Kɨ uan adarazir tongɨn ikɨ nɨn ziamɨn gun me mɨkɨmam.Gumazamiziba uari akuvamin danganimɨn,kɨ men tongɨn ikɨ nɨn ziam fam. 23 Kɨ kamagh mɨkɨm suam,“Ia Ikiavɨra Itir Godɨn atiatia an apengan iti darasi, ia an ziam fɨ.Ia Jekopɨn ovavir boriba, ia ziar ekiam a danɨng.Ia Israelia, ia an damazimɨn tugh an ziam pɨrafɨ.” 24 Gumazamizir onganaraziba,a men osɨmtɨzibar gara pura da ataghɨrazir puvatɨ.A kamaghɨn mɨgeir puvatɨ, men osɨmtɨziba pura biziba.A men saghon itir puvatɨ.A men azangsɨziba barasi. 25 Gumazamiziba uari akuvagh nɨn ziam famin dughiamɨn,kɨ nɨ amizir biziba bagh nɨn ziamra fam.Egh gumazamizir nɨn atiatia nɨn apengan itibar damazimɨn,kɨ fomɨra nɨn ofa damuasa akam akɨrizir biziba,kɨ nɨ bagh dar damuam. 26 Gumazamizir onganaraziba,me damasa ifongezɨ moghɨn, damɨ bar izɨvagh ikiam.Gumazamizir Ikiavɨra Itir Godɨn boroghɨn zuiba, me an ziam pɨrafɨ.Men naviba amɨragh deraghvɨra ikɨ mamaghɨra ikiam. 27 Nguazimɨn itir ikɨziba bar,me Ikiavɨra Itir God gɨnɨghnɨgh,a bagh izɨ an guamɨn teviba apɨrigh an ziam fam. 28 Me fogh suam,Ikiavɨra Itir God atrivimɨn ikia,kantriba bar dar gumazamizibagh gativagha men gari. 29 Bar guizbangɨra, gumazamizir uarira uari feba, an guamɨn teviba apɨrigh an ziam fam.Eghtɨ gumazamizir ovengasava amiba,me bar Godɨn guamɨn teviba apɨrigh an ziam pɨrafam. 30 Gumazamizir gɨn otivamiba, Ekiamɨn ingangarim damuam.Gumazamiziba, uan ovavir borir gɨn otivamiba,me an akamɨn gun me mɨkɨmam. 31 Gumazamizir men amebaba tɨghar me batamiba, me gɨn otivightɨ, me me mɨkɨm suam,“God uabɨ uan gumazamizibar akuragha ua me ini.”