Psalms 22 (TOMA)

1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Sobuzobu lopai». Davide ná-guyei. 2 Nà-GALAGI, nà-GALAGI, lee vaa zu è ɠɛlɛa bà?È loni ɠoozama, è la ʋaazu, è ʋa ɓɔ bà, anɛɛ ni nà kpalagiti bosu? 3 Nà-GALAGI, nà kpeei loozu foloi, è la gòoɠaaʋotesu,gè la maaɠɛsu kpɔ kpidii. 4 Anɛɛ naa ʋe, ɗa ga GALAGI, Ɲadegai,ɗa zeini Izilayɛle ná-maamusɛi zaama. 5 Ɗa ɠa gi-mɛmɛwolani ti ɠɛni ɠalivaazu è ma,ti ɠɛni ɠalivaazu è ma, è ɗa ti unmɔɔ. 6 Ti ɠɛni wooɠulazu è ma, ti ɗa vie,ti ɠɛni ɠalivaazu è ma, ti la ɠɛni unfeni pɛ. 7 Kɛlɛ nɔ̀un nà, gè ɠɛa ga kpeinɲaɠagi, gè la mɔ ga nu,kɛni fulu nuiti ta-ɲɛɛɠulasu anii, wɔ̀inzeɠea nuɓusɛiti ma. 8 Nii kpein é pɛ̀tɛsu, naati ta ɲɛɛɠulazu sù,ti ɗa laaɓɛɛlu, ti ɗa ɠɔmɔɔni, ti ɗa ɠɛ ma: 9 «É ɠitoni Ɠɔoɠɔ GALAGI ʋa,deɠɛmu niizu, Ɠɔoɠɔ GALAGI fie niina!Tɔɔzei nɛɛʋɛ bɛ, é kizo na mu!» 10 Ungo, ɗa ɠa è kùlaa dèe ɠoozu,ɗa ɠa è kàlivaani dèe ná-ɲiimiiti ma. 11 Gè zɔlɔɔni nɔ feya, ti kàliva è ma,kùlaai ma dèe ɠoozu nɔ feya, è ɠɛni ga nà-GALAGI. 12 Mina maaɠooza bà, mazɔlɔɔ kidaaʋiligi maaɓuɠa bà,tɔɔzei nu la ʋaazu, é ʋa ɓɔ bà! 13 Sìli nuiti tatigɛ mà, eɠɛ nikɛ zinɛ ɓulugi,Ɓasan nikɛ zinɛ ɓulugi ɠooliʋɛ mà. 14 Ta laalaosu dàalɔɠɔma eɠɛ zalai,nii é anii ʋalizu ga, é ɗa zikɔ. 15 Gè ɠɛa eɠɛ ziɛi é yeizu,kàeiti kpein ti ɠula ga,zìi ɠɛa eɠɛ kedoi,gaa ɠa wuunsu, kòozu zɔɔlaiti saama. 16 Sùvikɛi vɔa, é ʋaliʋali eɠɛ penɛi,nɛ̀gi ɗa ɠata dàa ɠoozuʋɛ ʋa.È dɔ̀a saai ma vufiligi zu. 17 Mazɔlɔɔ gilɛiti ti màaɠooliʋɛ,faa ɲɔu ɠɛ nuiti ma ɓulugi màaɠooliʋɛ,ti zèeiti bɔɔʋɛ ta kɔ̀ɠɔiti. 18 Nà mà ɠaeiti kpein gaalusu.Ta naa ʋɛtɛsu, ti ɠaazulo bà. 19 Ta nà-seɠeiti gaaɠwɛɛzu ɓɔɠɔ ʋa,ti kpakutoomai ɠɛ ga màazeɠeiti. 20 Kɛlɛ ɗɔun, Ɠɔoɠɔ GALAGI, mina maaɠooza bà!Ɗa ɠa è ga sùvikɛi, ʋa fala è ɓɔ bà! 21 Zìi ɠula boɠa zɔkpɔi ɠa,è zɛ̀nvui ɠula gilɛiti zea! 22 Kìzo zalai laaʋɛ ma,ta teɠui minɛiti! È gòoɠaaʋoteni! 23 Nà zeze ga è-laaseigi kɛ̀ɛleaiti saama.Nà è maamusɛ maaɓɔgi zaama. 24 Wɔiti wo luazu Ɠɔoɠɔ GALAGI ʋa, à maamusɛ!Zakɔɓe mavofodaiti kpein à dɛbi!Wo zasuɓali tuɠɔ, Izilayɛle mavofodaiti kpein! 25 É la bala nui ʋɛlɛʋilini, naa ná-maanɔɠɔ ziɛgi zu,é la ɠaazuzeɠeni ba, é ʋa maaɠooza ba.Kɛlɛ é woiloni, siɛgi zu naa ɓainni da, é wooɠula ma. 26 È-zaalai zu, nà è maamusɛ maaɓɔ golai zu.Gè nà-minazeɠegiti daazeeli naati gaazu, niiti ti luazu è ʋa. 27 Maawɔin nuiti ti daami wo, ti yiɠo.Naati ti Ɠɔoɠɔ GALAGI maamusɛ, niiti ti eteai ziɛzu tɔun bɛ,wo-zii zuɠooza eyɛsu ɠɔ! 28 Zou ɓela ga ɲɛgɛlɛin, ta ɠizɛ Ɠɔoɠɔ GALAGI zu, ti lati tɔun ma.Zii ɠiligiti ta-ʋɛlɛyeɠeiti kpein, ta nɔkɔ tɔun bu. 29 Mazɔlɔɔ masadai ɠa ɠɛ ga Ɠɔoɠɔ GALAGI nɔnɔ,toɠa masadai ɠɛɛzu zii ɠiligiti unda. 30 Etea zu zobobɛ nuiti kpein, ta daami wo, ti nɔkɔ bu,niiti kpein ti yeizu kabai zu, naati ta maayei bɛ,niiti ti la zooga ti ʋa ti-yɛnvui makɛ. 31 Ti-mavofodai ɠa Maliɠii lɛbi,ta ná-fai wo yamanii naazu nuiti ma, niiti ti wuzeɠezu. 32 Mavofodai naa ɠa Ɠɔoɠɔ GALAGI ná-telebodai lɛ adaʋɛ pɛ,é naa laazeeli nuɓusɛiti ma, ti ʋaazu zɔlɔɔsu,nii Ɠɔoɠɔ GALAGI kɛa ná-nuiti ta-ɠizo fai zu.

Psalms 22 (TOMA)

In Other Versions