Psalms 69 (TBIAOTANT)
undefined Devit ighiar kam osiri.Gumazir onger akar kabar faragha zuim gumazibav gɨa ghaze, //“Me Akɨmarir Aghuibar tiarimɨn gɨn mangɨ, ighiar kam bangɨ.” 1 O God, nan akuragh.Dɨpam na avaragha anaga nan fɨragharimɨn tu. 2 Kɨ beghneazim itir dɨpamɨn suegha uaghiri.Kɨ tugh gavgavighamin nguazir gavgaviba puvatɨ.Kɨ dɨpar konimɨn arua zuima,dɨpam bar na avaraghasava ami. 3 O God, kɨ nɨn dia ghua nan dɨmdiaba bar moghɨra gɨvagha taghizɨ,nan kuarim nan pɨrizɨ, nan gavgaviba gɨfa.Kɨ uabɨn akurvaghasa fomɨra nɨ bagha gara ikia ghua,nan damazimning na gami. 4 Gumazir bar avɨrim pura nan apanim gami.Men dɨbobonim bar nan dapanir arɨzibagh afira.Nan apaniba arazir kurabar na gami,ezɨ bizir me na gamir kaba mɨngariba puvatɨ.Apanir kaba na gasɨghasɨghasa, akar ifavaribar na gami.Kɨ men bizitam okemezir puvatɨ,me pura uan akaba na gasa ghaze, kɨ bizitaba pura me danɨngam. 5 God, nɨ na gɨfo kɨ gumazir onganim.Nan arazir kurabar osɨmtɨziba nɨn damazimɨn mongezir puvatɨ. 6 O Ekiam, nɨ Ikiavɨra Itir Godɨn Gavgaviba Bar Itim, nɨ nan dɨmdiam baragh,nɨ na baraghan koghtɨ, nɨghnɨzir gavgavim nɨn iti darasi aghumsɨzim iniam.O Israelian God, nɨ nan dɨmdiam baragh,puvatɨghtɨ, gumazamiziba nɨn ziam fe darazi dɨpova, akar kurabar me mɨkɨmam. 7 Nɨ bangɨn, gumazamiziba dɨbovir akabar na mɨgeimakɨ aghumsɨsi. 8 Nan aveghbuaba gumazir igharazimɨn gari moghɨn nan gari.Ezɨ nan adarazi nguibar igharazibar gumazimɨn gari moghɨn nan gari. 9 Nan navir averiam bar nɨn Dɨpenim gifuegha a baghavɨra iti.Egha kɨ pamtemɨn Dɨpenir kamɨn ingara deragha an garima, a deraghavɨra iti.Gumazamizir maba akar kurabar nɨ mɨgei, ezɨ men akaba nan izi. 10 Kɨ dagheba ataghɨragha, arazir kamɨn kɨ nɨn damazimɨn uabɨra uabɨ abɨri.Ezɨ gumazamiziba akar kurabar na mɨgei. 11 Kɨ azirakar korotiaba azui,ezɨ gumazamiziba na dɨpovava akar kurabar na mɨgɨavɨra iti. 12 Gumaziba tuavir akabar uari akuva ikia, na geghara na mɨgei.Gumaziba wainɨn dɨpaba apava onganigha, na dɨghora onger akabagh ami. 13 O Ikiavɨra Itir God, kɨ uabɨ bizir kabagh nɨghnɨzir puvatɨ, kɨ nɨ ko mɨkɨmasa.Nɨ dughiatamɨn uan ifongiam ko apangkuvir ekiamɨn gɨn mangɨ nan azangsɨzim ikaragh.Nɨ na ko akam akɨrigha gɨvagha an gɨn zui.Kamaghɨn, nɨ guizbangɨra nan akuragh. 14 Nɨ beghneazir kamɨn aven ua na inightɨ,kɨ an aven mangɨ ovengan kogham.Nɨ deragh na geghuv nan gantɨ, nan apaniba na gasɨghasɨghan kogham.Eghtɨ osɨmtɨzir kam, dɨpar konimɨn mɨn na avaraghan kogham. 15 Nɨ na ateghtɨ aperiam na avan markɨ.Nɨ na ateghtɨ kɨ mozimɨn magɨrɨghtɨ, a na avan markɨ.Nɨ na ateghtɨ dɨpar konim na avan markɨ. 16 O Ikiavɨra Itir God, nɨ zurara nan apangkuvir arazir kam bar dera,kamaghɨn nɨ zurara nan azangsɨziba baragh.Nɨn apangkuvim zurara nan iti,kamaghɨn nɨ izɨ nan akuragh. 17 Kɨ nɨn ingangarir gumazim, kamaghɨn nɨ nan mongan markɨ.Osɨmtɨzir ekiam nan iti, kamaghɨn nɨ zuamɨra nan azangsɨziba ikaragh. 18 Nɨ nan boroghɨn izɨ egh nan akuragh.Nɨ nan apanibar dafaribar ua na inigh. 19 Gumazamizir akar kurabar na mɨgeiba, nɨ dagh fogha gɨfa.Egha nɨ fogha gɨfa, me na dɨpovava aghumsɨzim na ganɨngi. 20 Akar kurar kaba, nan nɨghnɨzim gasɨghasɨgha nan navim gamizɨ, a bar moghɨrama oseme.Ezɨ gavgaviba ua nan puvatɨ.Kɨ ghaze, gumazitaba ti tong nan apangkuvam,ezɨ bar puvatɨ. 21 Mɨtiriam nan azima,me aguiam daghem gatɨgha na ganɨngi.Ezɨ kuarim nan pɨrima,me pura wainɨn kuram amasa na ganɨngi. 22 Kamaghɨn deragham,dughiar me isar ekiaba bagha uari akuvibar,men isar ekiar kaba me damutɨ me irɨ,mati azuazim asɨzim mɨsoke. 23 Nɨ men damazibar amightɨ amɨnim men pɨrightɨ,me ua ganan kogham.Nɨ men akɨragharibar amightɨ,me tugh gavgavighsɨ damuva avegham. 24 Nɨ puvɨra men atar mɨzazim me gasɨ.Nɨn anɨngagharir kam me initɨ me oveng. 25 Eghtɨ nguibar me itir kam pura ikɨtɨ,nɨ gumazitaba ateghtɨ, me men purirpenibar ikian markɨ. 26 Gumazamizir maba, nɨ faragha men arazir kuraba ikarvagha me gasɨghasɨki,ezɨ gumazir kurar kaba paza me gamuavɨra iti.Gumazamizir maba, nɨ men mɨkarzibagh asɨghasɨghizɨ me mɨzaziba inizɨ,gumazir kuraba osɨmtɨziba me garɨgha dɨbovir akabar me mɨgei. 27 Nɨ gumazir kurar kabar arazir kurabagh nɨghnɨghvɨra ikɨ.Egh me ateghtɨ me nɨn gumazamizibar aven izan markɨ. 28 Nɨ gumazamizir kabar ziaba, akɨnafarir zurara itimɨn aven da angarigh.Egh men ziaba, nɨn damazimɨn zuezir gumazamizibar ziaba koma ada osiran markɨ. 29 O God, kɨ osɨmtɨzir ekiam atera mɨzazim isi.Nan akuragh ua na inightɨ kɨ ua deraka. 30 Kɨ Godɨn ziam fɨ egh onger akabar amuam.Egh a mɨnabɨva an ziar ekiamɨn gun mɨkɨmam. 31 Ikiavɨra Itir God, kɨ damuamin arazir kam, nɨ a bagh bar akongegham.Me bulmakauba tue da bar isia mɨghɨrir ofaba dera,eghtɨ nan arazir kam Godɨn damazimɨn bar dagh afiragham. 32 Gumazamizir osɨmtɨziba ateriba, me God nan akurazir bizimɨn ganigh bar akuegham.Gumazamizir Godɨn ziam feba, me ua gavgavir igiam iniam. 33 Ikiavɨra Itir God gumazamizir biziba puvatɨzibar azangsɨziba barasi,egha uan gumazamizir kalabusɨn itiba, a me gɨn amadir puvatɨ. 34 Ia overiam ko, nguazim, ongarim ko osiriba ko, bizir bar ongarimɨn itiba,ia bar Godɨn ziam fɨ. 35 Guizbangɨra, God Saionɨn nguibamɨn gumazamizibar akuragh,men apanibar dafaribar ua me inigh,Judan nguibaba ua dar ingaram.Godɨn ingangarir gumaziba nguibar kabar aven deraghvɨra ikɨva,nguazir kaba bar ada iniam. 36 Eghtɨ Godɨn ingangarir gumazibar ovavir boriba,nguazir kaba iniam.Gumazamizir kaba bar God gifongegh,nguazir kamɨn ikɨ mamaghɨra ikiam.